Tou Fai He ʼu ʼAʼahi Fakapotopoto
1 Ko te ʼu ʼaʼahi ʼe ko he faʼahi maʼuhiga ia ʼo te gāue ʼaē ʼe tou fai ia tatou ko te kau “kaugā gāue ʼa te ʼAtua”. (1 Ko. 3:6-9.) ʼE mole tonu ke tou tuʼaniaʼi te aga ʼa ia ʼaē ka tou ʼolo ʼo ʼaʼahi, heʼe kua ina fakahā tana fia logo ki te moʼoni. Ko he teuteu lelei ʼe hā ai totatou loto ke ina ʼiloʼi te moʼoni mokā ʼe tou palalau mo ia ki he manatu fakafiafia ʼo te Tohi-Tapu.
2 Tou palalau ke matala; tou fai ni ʼu fehuʼi fakapotopoto.
ʼI te ʼosi ʼo tatatou sioʼi te ʼu nota ʼaē neʼe tou tohi ʼi tatatou ʼuluaki felāveʼi mo ia, ʼe feala ke tou fehuʼi age:
◼ “Neʼe koutou fakakaukau koa ki te ʼu fakapapau ʼaē neʼe fai e te ʼAtua moʼo fakatuʼu te faitotonu ʼi te kele?”
Koʼeni te tahi manatu:
◼ “Neʼe koutou logoʼi koa ʼi takotou ʼu faikole ʼo ʼuhiga mo te Puleʼaga ʼo te ʼAtua kua maʼuhiga age ia, talu mai tatatou fai palalau ʼi te vahaʼa ʼaenī kua ʼosi?”
ʼI totatou fofoga pea mo te vaivai ʼo totatou leʼo ʼe hā ai tatatou tokaga fakamalotoloto mokā tou fai he ʼu faʼahiga fehuʼi feiā.
3 Tou faigaʼi he temi moʼo fakalogo kia ia ʼaē ʼe palalau mo tatou. Kapau ʼe tou fakalogo pea mo fakakaukau lelei ʼi muʼa ʼo hatatou tali, ʼe hā ai tatatou tokaga moʼoni ki ai. ʼAki te u manatu ʼe ina fakahā mai anai, ʼe feala ai tatatou fakahā he manatu faka tohi-tapu ʼe ʼalu tahi mo tatatou ʼuluaki felōgoʼi. Tou teuteu ke feala ai hatatou fakahā kia ia he manatu foʼou ʼi tatatou ʼu ʼaʼahi fuli. Kapau ʼe palalau mai ia ki he fahaʼi neʼe mole kita ʼamanaki ki ai, tou fakaʼaogaʼi te tohi Comment raisonner moʼo maʼu te ʼu manatu ʼaoga ki te fahaʼi ʼaia.
4 Kapau neʼe tou tuku “Te Tule Leʼo” ʼo te ʼaho 1 ʼo maio 1992, ʼe feala hatatou ʼui age:
◼ “I tatatou felōgoʼi fakamuli, neʼe tou palalau ai ki te taʼu 1914. Ko te tau ʼaē neʼe hoko ʼi te taʼu ʼaia neʼe hoko ai te ʼu fetofetogi faka politike pea, talu mai ai, neʼe lahi ʼihi ʼu fetogi kua hoko ki muli mai. Kae ko ʼihi fetogi ʼi te fahaʼi ʼaia, pe ʼe ko te ʼu fetofetogi fuli, neʼe fua lelei koa ia ki te maʼuli ʼo te hahaʼi? ʼE feala koa hanatou foaki mai he tokalelei heʼe gata? [Tuku ke fai mai hana tali.] Neʼe akoʼi e Sesu tana kau tisipulo ke nātou faikole ki he puleʼaga ʼe feala ke ina fakatokatoka te ʼu faigataʼa ia ʼi te temi nei. [Lau ia Mateo 6:9, 10.] ʼI takotou manatu, koteā anai ka fai e te Puleʼaga ʼo te ʼAtua? [Tuku ke fai mai hana tali.] Ko te ʼu manatu ʼe foaki mai e te Tohi-Tapu ʼe maʼuhiga ʼaupito.” Lau leva ia Taniela 2:44. ʼE lagi ʼe tou fia fakahā age anai te fakatā ʼi te ʼu pasina 12 pea mo 13 ʼo te tohi Mauli O Heegata te ʼu lelei ʼe tou maʼu anai ʼi te tuʼu ʼo te Puleʼaga ʼo te ʼAtua.
5 Kapau neʼe tou tuku te numelo ʼo te ʼaho 8 ʼo maio 1992 ʼo te “Réveillez-vous!”, ʼe feala ke tou ʼui age:
◼ “ ʼI tata felāveʼi fakamuli, neʼe tā palalau ki te ʼu hahaʼi ʼaē neʼe nātou mavae ʼi tonatou fenua ʼaē neʼe nātou tutupu ai, ʼuhi ko te ʼu aga heʼe faitotonu pea mo te ʼu mamahi. ʼI takotou manatu ʼe tuʼaniaʼi moʼoni koa e te ʼAtua te ʼu mamahi ʼaē ʼe tonu ke kātakiʼi e te hahaʼi ʼuhi ko te ʼu ʼaga ʼa ʼihi?” ʼAki tatatou mulimuli ki tana tali mai, ʼe tou lau age anai ia Tagata Tānaki 4:1 pe ʼe ia Pesalemo 72:12-14, ʼosi ʼaia pea tou lau pe ʼe tou fakahā pe te ʼu manatu tafito ʼo te ʼu palakalafe 27 ki te 29 ʼo te ʼu pasina 14 pea mo 15 ʼo te kaupepa “Voici!”, pea mo tou fai te ʼu fehuʼi ʼe ʼalu tahi mo te ʼu palakalafe ʼaia.
6 Tou haga fakahā he faiga takitokotahi ki te hahaʼi pea ke ia tatou he ʼu manatu faka tohi-tapu fakatalakitupua moʼo palalau ai mo nātou ke feala ai hatatou fai ʼo hatatou ʼu ʼaʼahi fakapotopoto.