Tou Fakahā Te Tule Leʼo ʼi Maio
1 Ko te ʼuhiga ʼo Te Tule Leʼo ʼe fakahā ʼi te ʼu numelo fuli ʼi ʼoluga ʼo te pasina 2. ʼO ʼalu tahi mo te ʼuhiga ʼaia, ʼe feafeaʼi koa hatatou tokoniʼi te hahaʼi ʼe tokolahi? ʼI maio, ʼe tou fai anai he faiga makehe moʼo tokoni kia nātou fuli ʼaē ʼe fia fai ki te logo ʼo te Puleʼaga ke nātou lau Te Tule Leʼo tuʼumaʼu ʼaki te apone.
2 Ki he tahi ʼe ʼui mai e kilisitiano, ʼe feala ke tou ʼui age:
◼ “E mātou fai te fehuʼi ki tomatou ʼu vahaʼa fale, pea ʼe mātou fia ʼiloʼi takotou manatu ʼo ʼuhiga mo te fahaʼi ʼaia. Neʼe akoʼi tatou e Sesu ke tou faikole ke haʼu te Puleʼaga ʼo te ʼAtua pea ke hoko tona finegalo ʼi te kele ohage ko selo. ʼI takotou manatu ʼe hoko moʼoni anai koa te finegalo ʼo te ʼAtua ʼi te kele? ” Tuku ke tali mai, pea koutou toʼo ia Isaia 55:10, 11 pea koutou fakahā age ki ai ko te ʼu lea faka polofeta ʼa te ʼAtua ʼe hoko moʼoni anai ia. — rs, p. 13, ʼi lalo ʼo te talanoa “Puleʼaga” lua palalau ʼo ʼuhiga mo te ʼuluaki palalau.
3 ʼE feala takotou toe ʼui age:
◼ “ Ko he tahi ʼuhiga ʼo te nusipepa ʼo Te Tule Leʼo ʼe ko te faigaʼi ke fakatokaga te hahaʼi ki te ʼu lea faka polofeta ʼo te Tohi-Tapu kua hoko. Koutou vakaʼi te alatike ʼaenī.” Fakahā age te ʼuluaki alatike ʼo Te Tule Leʼo ʼo te ʼaho 1 ʼo maio, “1914: Te taʼu ʼaē neʼe ina fakamaveuveu te malamanei”, ʼosi ʼaia pea koutou ʼui age: “ ʼE lagi ʼe koutou fehuʼi anai ‘Pe koʼe ʼe tou tokaga ki te taʼu 1914? ’ Koutou vakaʼi te manatu ʼe tuʼu ʼi te palakalafe lua ʼo ʼuhiga mo te taʼu 1914 pea mo Te Tule Leʼo.” Koutou lau age te palakalafe ʼaia.
4 Koutou fakafiafia mokā koutou fakahā te apone; fakamahino age te ʼu manuʼia ʼe maʼu ʼi te tali ʼo te apone mai te meli pea ko te nusipepa ʼe kofukofu anai ki he pepa. Kapau ʼe mole tali te apone fakahā age te ʼu nusipepa fakamuli.
5 Kapau ʼe koutou fia hoko atu takotou palalau, ʼe feala ke hoko takotou fakahā ʼaki ia Fakahā 21:3-5, ohage ko te fakahā mai ʼe tuʼu ʼi te tohi Comment raisonner.
ʼI te fahaʼi ʼaia, ʼi te ʼosi lau ia Isaia 55:10, 11, ʼe feala takotou ʼui age:
◼ “Ko te lea faka polofeta fakatalakitupua ʼo ʼuhiga mo te finegalo ʼo te ʼAtua ki te kele kua vave hoko. ʼE ʼi ai anai tona ʼu ikuʼaga ki tokotou maʼuli ʼo feiā pe mo ʼau. Fakalogo mai muʼa ki te manatu ʼaenī ʼe tuʼu ia Fakahā 21:3-5.” ʼE feala takotou lau te ʼu vaega ʼaia pea mo palalau ki te ʼu tapuakina ʼe haʼu mai te taki ʼo te Puleʼaga ʼo te ʼAtua. Koutou fakahā ko Te Tule Leʼo ʼe ina kalagaʼi te Puleʼaga ʼo te ʼAtua.
ʼE feala takotou toe ʼui age:
◼ “Ko te nusipepa ʼo te ʼaho 1 ʼo maio ʼe toe tuʼu ai te alatike ʼaenī “Ko ai anai ka hāo ‘ ʼi te temi ʼo te mamahi’? ” ʼE ina fakahā atu anai te meʼa ʼe tonu ke fai moʼo maʼuli ʼi te mālama foʼou pea mo faitotonu ka taki anai e te Puleʼaga ʼo te ʼAtua ʼaē ʼe tuʼu ia Fakahā 21.”
6 Tou fakaʼaoga Te Tule Leʼo moʼo fakatafito ʼo he ako faka tohi-tapu: Ko totatou maʼua ko te tokoniʼi ʼo te hahaʼi ke nātou maʼu te moʼoni ke feala ai tanatou liliu ko he kau gāue ʼa Sehova pea mo kalagaʼi tona Puleʼaga. Koia, kapau ʼe tou felāveʼi mo he ʼu hahaʼi ʼe fia logo ki te moʼoni, ʼe ʼaoga ke tou tohi tonatou ʼu higoa mo te ʼu meʼa fuli ʼe ʼaoga ki ai pea ke tou liliu fakavilivili ʼo ʼaʼahi ia ia.
7 Tou haga fakahā te moʼoni ki niʼihi atu kāiga ʼaki te tokoni ʼa Te Tule Leʼo pea mo kole tuʼumaʼu kia Sehova ke ina taki tatatou gāue ke feala ai hatatou maʼu pea mo fafaga te ʼu hahaʼi ʼe hage ko he ʼu ōvi. — Soane 21:15-17.