Tou Fakaʼaogaʼi ʼAtatou ʼu Nusipepa ʼi Te Fai Faka Mafola ʼi Te ʼu ʼApi
1 Ko te fakatuʼutuʼu ʼo te nusipepa Koutou ʼaʼala! ʼe fakahā fakalelei ʼi te pasina 4 ʼo te nusipepa fuli: “Ko te nusipepa ʼaia ʼe ina fakatupu te falala ki te fakapapau ʼa te Tupuʼaga ʼo ʼuhiga mo he mālama foʼou fīmālie pea mo te tokalelei ʼi muʼa ʼo te mamate ʼo te taʼiake ʼaē neʼe mamata ki te ʼu faʼahiga meʼa neʼe hoko ʼi te taʼu 1914.” ʼE mahino ia ko te taʼi nusipepa ʼaia ʼe ʼaoga ke lahi tona tufa ʼi totatou minisitelio ʼaē ʼi te ʼu ʼapi!
2 Ko te nusipepa Koutou ʼaʼala! ʼe ko he meʼa lelei moʼo lagaʼi ʼo te fia logo ʼa te hahaʼi ʼaē ʼe mole holi ki te faʼahi fakalaumālie. Mokā tou lau te ʼu nusipepa fuli, tou kumi he ʼu puani ʼe ʼaoga ke tou vaevae mo niʼihi. Ko ʼihi kau faka mafola ʼe nātou fakaʼiloga ʼi tanatou ʼu nusipepa ʼanatou totonu, pea ʼi muʼa ʼo tanatou ʼolo ʼo fai faka mafola mo te ʼu nusipepa ʼaia, ʼe nātou toe vakaʼi tanatou ʼu nota ke nātou manatuʼi ai he ʼu puani tāfito ke vaevae mo te hahaʼi.
3 ʼE feala ke kamata tatatou ʼu fakahā ʼaki hatatou fakamahino age he puani ʼe talanoa kiai te nusipepa Koutou ʼaʼala! ʼaē ʼe tou tufa.
Kapau ʼe fakahā mai e he tahi tana fia logo, ʼe feala ke tou fakahā age te nusipepa, ʼo lagi tou ʼui age fēnei:
◼ “Ko te alatike ʼaenī ʼo te nusipepa Koutou ʼaʼala! ʼe maʼu ai te ʼu fakamatalatala lahi ʼo ʼuhiga mo te faʼahi ʼaia.” Pea tou lau he talanoa e tahi peʼe lua neʼe kua ʼosi teuteuʼi ki te faʼahi ʼaia, pea hoko atu tatatou palalau: “ ʼE ʼau sio ʼe ke fia logo ki te manatu ʼaenī, ʼe ke fia lau koa te alatike ʼaenī ʼo toe feiā aipe mo ʼihi ʼu alatike ʼo te nusipepa Koutou ʼaʼala! ʼaē ʼe talanoa ki te faʼahi ʼaia. Kapau ʼe ke leleiʼia, ʼe ʼau fiafia anai ʼi hona tuku atu pea mo Te Tule Leʼo”, ko tona totogi fakaʼofa ko te foʼi 50 ia te nusipepa e tahi.
4 Kapau ʼe ina fakahā mai tana fia logo ki te ʼu meʼa fakalaumālie, ʼe feala anai ke tou vakaʼi he vaega ʼi te Tohi-Tapu, ohage la ko 2 Timoteo 3:1-5 ʼo ʼuhiga mo te ʼu ʼaho fakamuli. Pea, mo uga ke ina fia toʼo tatatou ʼu nusipepa, ʼe feala ke tou lau te pasina 2 ʼo Te Tule Leʼo foʼou ʼi te faʼahi ʼaē ʼe kamata fēnei: “Ko te fakatuʼutuʼu ʼa Te Tule Leʼo.” ʼOsi ʼaia, pea tou tuku ki ai te ʼu nusipepa foʼou ʼo Te Tule Leʼo pea mo te nusipepa Koutou ʼaʼala!
5 ʼI te ʼu telituale ʼaē ʼe hage ʼe tokaga te hahaʼi ki te ʼu lotu kehekehe, ʼe mole tou fakahā age te ʼu nusipepa, kae ʼe feala anai ke tou ʼui age:
◼ “ ʼI te faʼahi ʼaenī, ʼe mātou felāveʼi mo te hahaʼi ʼe ʼi ai tanatou ʼu faʼahiga lotu ʼo kehekehe ia mo mātou. Ko te ʼu ala kehekehe neʼe toʼo e te hahaʼi moʼo kumi ʼo te ʼAtua. [Tou lau ia Gāue 17:26, 27.] ʼE koutou fakamoʼoni koa ki te manatu ʼaē ko te hahaʼi ʼe nātou muliʼi te lotu ʼo ʼanatou ʼu mātuʼa, ka mole nātou kumi totonu ia te ʼAtua? [Tou tuku ke fai mai hana tali.] Ko te puani ʼaia ʼe tuʼu ʼi te ʼuluaki kapite ʼo te tohi ʼaenī, L’humanité à la recherche de Dieu. [Tou fakahā age te talanoa ʼaē ʼi te palakalafe 12 ʼo te pasina 8.] ʼE ko he meʼa maʼuhiga pea mo poto tatatou ʼiloʼi he ʼu meʼa lahi ʼo ʼuhiga mo niʼihi ʼu lotu. Ko te tohi ʼaenī ʼe ina fakamatala ia te kamataʼaga, te ʼu aga, pea mo te ʼu akonaki ʼa te ʼu lotu lalahi ʼo te mālama.” Kapau ʼe fealagia te temi, tou fakahā ki ai te lisi ʼo te ʼu kapite pea mo he paki e tahi peʼe lua ʼi te tohi.
6 Ka tou fai faka mafola ʼi te ʼu ʼapi, tou manatuʼi ʼe ia tatou te ʼu meʼa gāue maʼuhiga ʼaupito e lua ʼi te mālama ʼaenī moʼo tokoni ki te hahaʼi ke nātou tuputupu fakalaumālie, ko Te Tule Leʼo pea mo te nusipepa Koutou ʼaʼala! Ke tou faiga ʼo uga te fia logo ʼa te hahaʼi ki te ʼu nusipepa ʼaia pea ke tou tufa ʼi te ʼu temi faigamālie fuli.