Koutou Filifili He ʼu Alatike ʼe ʼAlutahi Mo Te Meʼa ʼAē ʼe Fia Logo Kiai Te Hahaʼi
1 Ohage ko te ʼu tagata fana nahau ʼaē ʼe nātou faiva ʼi te fakaʼaogaʼi ʼo te ʼu kauʼi nahau, ʼe tokolahi te kau fai faka mafola pea mo te ʼu pionie ʼi te ʼu kokelekasio ʼe fua lelei tanatou gāue, heʼe nātou filifili lelei te ʼu alatike ʼo Te Tule Leʼo pea mo te Réveillez-vous! ʼaē ʼe ʼalutahi mo te ʼu meʼa ʼaē ʼe fia logo kiai te hahaʼi ʼo tonatou telituale. ʼE nātou faiga ke nātou ʼiloʼi pe ko ai ʼaē ka ina fia lau anai ʼihi alatike ʼo te ʼu nusipepa. ʼE nātou fai feafeaʼi te faʼahi ʼaia?
2 ʼUluaki, ʼe nātou lau katoa te ʼu nusipepa fuli. ʼOsi ʼaia, pea ʼe nātou feʼekeʼaki pe ko te faʼahiga hahaʼi fea ʼaē ka nātou lau anai te ʼu alatike ʼaia. Pea ʼe nātou faiga ke nātou ʼaʼahi te ʼu hahaʼi ʼaē ʼe nātou fia lau anai te ʼu alatike ʼaia. Ka nātou ʼiloʼi fakatomuʼa ʼe ʼi ai he faʼahiga alatike ʼe tokolahi anai te hahaʼi ʼo te telituale ʼaē ka nātou fia lau, pea ʼe nātou fakaʼui te tahi ʼu nusipepa.
3 ʼE Fakaʼapaʼapa Te Hahaʼi Ki Tatatou ʼu Nusipepa: Ko te tagata ʼe apone ki tatatou ʼu nusipepa pea ʼe gāue ki te sulunale ʼiloa ʼo Niselia, neʼe ina ʼui fēnei ʼo ʼuhiga mo te Réveillez-vous!: “ ʼE ʼau fakamālo atu ki te nusipepa ʼaia ʼaē ʼe feala ke lau e te hahaʼi fuli pe, pea ʼe lelei tokotahi ʼi te malamanei.” Ko te tagata ʼe ina lau tuʼumaʼu tatatou ʼu nusipepa neʼe ina ʼui fēnei: “Ko te poto ʼaē ʼe maʼu ʼi te ʼu nusipepa ʼaia ʼe hage ko he ʼu maka maʼugataʼa! Ko te ʼu faʼahiga alatike fuli ʼaē ʼe ʼau leleiʼia, ʼe feala haku maʼu [ʼi te ʼu nusipepa ʼaia].”
4 ʼE talanoa te ʼu nusipepa ki te ʼu meʼa kehekehe, ʼo kau ai mo te Tohi-Tapu, mo te ʼu meʼa ʼaē ʼe hoko ʼi te malamanei, mo te ʼu fihifihia ʼe tau mo te famili, mo te ʼu fihifihia faka sosiale, mo te hisitolia, mo te ʼu meʼa fakapoto lalahi, mo te maʼuli ʼo te ʼu manu pea mo te ʼu fuʼu ʼakau, pea mo te tahi ʼu meʼa. ʼE mahino papau ia, ʼe lahi hakita fia lau he nusipepa mokā talanoa ai ki te meʼa ʼaē ʼe ʼaoga kia kita, mo tokita ʼaluʼaga, peʼe ko takita gāue. Mai tona ʼuhiga ʼaē ʼe tokolahi te hahaʼi ʼaē ʼe tou fai palalau mo nātou pea ʼe kehekehe tonatou ʼu ʼaluʼaga pea mo tonatou ʼu fihifihia, koia ʼe fua lelei anai tatatou gāue mo kapau ʼe tou filifili lelei he ʼu alatike ʼe ʼalutahi mo te ʼu hahaʼi ʼaia ʼaē ʼe tou felāveʼi mo nātou.
5 Koutou fakatokagaʼi te meʼa ʼaē neʼe hoko ki te ʼu Fakamoʼoni e toko lua, ʼi tanā fakahā te Réveillez-vous! ʼo te ʼaho 8 ʼo Sepetepeli 1996 ki te tagata ʼe tohi sulunale. Neʼe fakamatala fēnei e te tagata ʼaia: “ ʼI muʼa ʼo taku ʼui age kia nāua neʼe mole ʼau fia logo, neʼe ʼui fēnei e te tahi ia nāua: ‘ ʼE ʼi ai te alatike ʼe talanoa ki te kau Initia ʼo Amelika. ʼE ma ʼiloʼi kua lahi te ʼu meʼa neʼe ke tohi ʼo ʼuhiga mo te faʼahi ʼaia.’ ” Neʼe ina toʼo te nusipepa, pea ʼi tana lolotoga kai ʼi te uhu, neʼe ina lau te alatike ʼo ʼuhiga mo te kau Initia, pea neʼe ina ʼui ki muli age “neʼe lelei ʼaupito” pea mo “moʼoni ʼi te ʼu faʼahi fuli.”
6 Koteā Te Meʼa ʼAē ʼe Fia Logo Kiai Te Hahaʼi ʼo Tokotou Telituale? Koteā te meʼa ʼaē neʼe koutou lau ʼi te ʼu nusipepa ʼi te ʼu māhina ʼaenī kua hili, ʼe lagi fia logo anai kiai te ʼu hahaʼi fakatau koloā, peʼe ko tokotou ʼu vāhaʼa fale, tokotou ʼu kaugā gāue peʼe ko tokotou ʼu kaugā ako? Koteā te ʼu alatike ʼaē ʼe fia lau anai e te kau avoka, mo te ʼu hahaʼi faiako, mo te ʼu hahaʼi fai tokoni ki te famili pea ki te kau tūpulaga ʼaē kei ako, pea mo te kau tōketā? Ka koutou vakaʼi te ʼu nusipepa foʼou, koutou manatuʼi tuʼumaʼu te ʼu hahaʼi kehekehe ʼaē ʼe koutou fai faka mafola kiai, pea ʼe koutou maʼu anai he ʼu puleʼaki lelei moʼo faka mafola te moʼoni.
7 Ka koutou felāveʼi mo he tahi ʼe ina fia lau he alatike ʼo Te Tule Leʼo pe ko he Réveillez-vous! pea ʼe ina toʼo te ʼu nusipepa, ʼe feala ke koutou ʼui fēnei: “Kapau ʼe ʼau sio ki he alatike ʼe ke fia lau anai ʼi te nusipepa ʼaē ka hoa kiai pea ʼe ʼau ʼaumai anai kia koe.” E lagi feala anai ke liliu ko he tahi ʼe ina toʼo tuʼumaʼu te ʼu nusipepa, pea ʼe koutou ʼaʼahi tuʼumaʼu anai ia ia mokā koutou maʼu anai te ʼu nusipepa foʼou. ʼE tatau te faʼahi ʼaia mo te meʼa ʼaē neʼe fai e ʼihi ke tali te ʼu hahaʼi ʼe nātou fia lau he ʼu faʼahiga alatike ʼi tatatou ʼu nusipepa, ke toe ʼaʼahi nātou.
8 Koutou Faka Maʼuhigaʼi Te ʼu Meʼa Fakalaumālie: Kua hili kiai ni ʼu taʼu, ko te tagata neʼe tokaga tāfito ki tana gāue, neʼe ina toʼo te Réveillez-vous! he neʼe talanoa ki he meʼa neʼe ina fia lau. Kae ko te tagata tui ʼaia, neʼe ina toe lau foki mo Te Tule Leʼo neʼe ina toʼo fakatahi mo te nusipepa ʼaia, pea neʼe ʼi ai te alatike neʼe ina uga ia ia ke ina vakavakaʼi lelei te akonaki ʼo te Tahitolu ʼaē neʼe faka tui kiai lolotoga tona maʼuli katoa. Hili kiai māhina e ono, pea neʼe papitema! Koia, ʼaua naʼa koutou fakameʼameʼa ʼi te fai palalau ki te ʼu meʼa fakalaumālie mo te hahaʼi ʼaē ʼe nātou lau te ʼu nusipepa. ʼE feala hakotou fakahā age kia nātou te kaupepa Koteā ʼAē ʼe Fakamaʼua Mai e Te ʼAtua Kia Tatou? pea mo fai palalau lolotoga he ʼu kiʼi minuta ki te kapite pe e tahi ʼi te ʼu temi fuli pe ʼaē ʼe koutou ʼave ai kia nātou te ʼu nusipepa foʼou.
9 Koutou fakakaukauʼi fakalelei pe ko ai ʼi takotou ʼu ʼaʼahi pea mo tokotou ʼu kaugā gāue ʼe nātou fia lau anai te ʼu Tule Leʼo pea mo te ʼu Réveillez-vous! foʼou. ʼOsi ʼaia, pea koutou faiga fakamalotoloto ke koutou ʼolo kia nātou ʼaia. Koutou tuku te ʼu nusipepa ʼaia ki te hahaʼi fuli ʼaē ʼe feala ke koutou tuku ki ai. Pea ʼaua naʼa galo kia koutou, kapau ʼe koutou faiga ke koutou tokoni ki te hahaʼi ʼaki te ʼu nusipepa, pea ʼe hage ʼe koutou ‘lī tokotou pane ki te fuga vai.’ ʼAki te temi, ʼe fua lelei anai te faʼahi ʼaia, heʼe lagi koutou maʼu anai he ʼu hahaʼi ʼe nātou liliu anai ko he kau tisipulo.—Tnk. 11:1, 6.