Tou Tokaga Lelei Ki Te Hahaʼi ʼAē Neʼe Fia Logo
1 Mokā tou tufa tatatou ʼu nusipepa pea mo ʼihi ʼu tohi faka teokalatike, ʼe tou fakahā ʼi te ʼu faʼahi fuli te logo ʼaē neʼe faka mafola e Sesu Kilisito. Koia ʼe tonu anai ke tou fai he faiga makehe ke tou toe ʼaʼahi ia nātou fuli ʼaē neʼe fia logo.
2 Kapau ʼe koutou fakahā he alatike makehe ʼo te nusipepa Koutou ʼaʼala! ʼe fia logo ia ki ai, koutou fakahā age ʼihi ʼu puani ʼo te alatike mokā koutou toe ʼaʼahi ki ai, ʼo fakatafito takotou fai palalau ki he vaega ʼo te Tohi-Tapu pea lagi mo he palakalafe e tahi peʼe lua. Kapau ʼe hoholo atu tana fia logo, koutou fakahā age te nusipepa Koutou ʼaʼala! ʼe ʼaoga ki te famili katoa. Ko te ʼu alatike fuli ʼe talanoa ki te ʼu manatu kehekehe, ohage la ko te kele, te hikihiki ʼo totatou maʼuli te felāveʼi mo te ʼu faigataʼaʼia ʼi te temi nei, pea mo te ʼu fehuʼi ʼaē ʼe ʼaoga ki te kau tūpulaga.
3 Koteā te meʼa ke fai mokā ʼe mole ina fia lau te ʼu alatike foʼou ʼo te nusipepa Koutou ʼaʼala! ʼE mole tonu leva ke fakaʼosi te fai palalau, ʼe feala anai pe ke koutou fakaʼaogaʼi te temi faigamālie ʼaia moʼo fakamahino age kia ia te gāue ʼa te kau Fakamoʼoni ʼa Sehova ʼaki hakotou fakaʼaogaʼi te manatu ʼaē ʼi te pasina 400 ʼo te tohi Comment raisonner.
4 Kapau neʼe koutou tuku he nusipepa ʼo “Te Tule Leʼo” ʼi takotou fakaʼaogaʼi ia 2 Timoteo 3:1-5 pea mo fakahā age te talanoa ʼaē ʼi te pasina 2 ʼo te nusipepa, mokā koutou toe ʼaʼahi ia ia, ʼe feala ke koutou ʼui age fēnei:
◼ “ ʼI tatā ʼuluaki felogoi, neʼe tā palalau ki te ʼuhiga ʼo te ʼu meʼa ʼe hoko ʼi te temi ʼaenī. Tokolahi te hahaʼi ʼe mole kei nātou tokaga ki te ʼAtua pea mo tana ʼu lekula ʼi tonatou maʼuli ʼaē neʼe ina fakahā ʼi te Tohi-Tapu. Ko te faʼahi ʼaia neʼe lave mālohi ki te felogoi ʼa te hahaʼi, ohage ko tona tuʼu ia 2 Timoteo 3:1-5. ʼI tau manatu ʼe ʼi ai koa he tupuʼaga tāfito ʼo hatatou ʼamanaki ki he ʼu ʼaluʼaga lelei ʼi te temi ka haʼu?” ʼI te ʼosi ʼo tana fakahā mai tana manatu, ʼe feala ke koutou fakahā age kia ia te manatu ʼaē ia 2 Petelo 3:13. ʼOsi ʼaia pea koutou fakahā age te ʼu pasina 336 ki te 341 ʼo te tohi Comment raisonner, pea koutou fakamahino age te meʼa ka fai anai e te Puleʼaga maʼa te malamanei.
5 Mokā koutou fai te ʼaʼahi, ʼe feala ke koutou fakatokagaʼi ʼe mole faʼa fia palalau ia ia ʼaē ʼe felogoi mo koutou ki tana lotu, heʼe ʼi tana manatu ʼe mole kau ai he tahi. ʼE feala pe ke koutou ʼui age ki ai he meʼa fēnei:
◼ “ ʼAki te lahi ʼo te ʼu lotu ʼi te malamanei ʼaē kua liliu ʼo veliveli, ʼuhi ko te ʼu meʼa faka felogoi ʼaē kua vave tona mafola, ko te mālohi ʼo te ʼu faʼahiga tui kua logoʼi ʼi te malamanei, peʼe koutou faka tui kiai peʼe kailoa. Koia, ko te femahinoʼaki ʼa te hahaʼi ʼe feala ke maʼu ai he felogoi maʼuhiga logope la te tui kehekehe ʼaē ʼa te hahaʼi. ʼE feala ke ina lolomi he koga ʼo te fehiʼa ʼo ʼuhiga mo te ʼu akonaki faka lotu. Koteā koa tau manatu?” ʼI te ʼosi ʼo tana fakahā mai tana manatu, koutou fakahā age te tānakiʼaga ʼo te ʼu kupu ʼo te tohi L’humanité à la recherche de Dieu.
6 Ke tou fai katoa he faiga mālohi ʼo ʼaʼahi ia nātou fuli ʼaē neʼe fia logo ki te moʼoni pea mo tokoni kia nātou ke nātou haʼele ʼi te ala ʼaē ʼe taki ki te maʼuli heʼegata. — Soane 4:23, 24.