ʼE Koutou Uga Koa Te Fakakaukau ʼa Te Hahaʼi ʼAki Te Tohi-Tapu?
1 Ko he tagata tau faiva ʼe ʼalu ki te tau mo tana ʼu meʼa tau pea mo tana ʼu meʼa hāofaki. Ko he tagata faiva ʼe teuteu ʼalu ki te laga fale lahi ʼe ina ʼave anai te ʼu meʼa gāue fuli ʼe ʼaoga ki te faʼahi ʼaia. Ko he kaugana ʼa Sehova ʼe kau ki te minisitelio ʼe ʼi ai tana “heletā” ʼi tona nima pea ʼe ina fakaʼaogaʼi fakapotopoto anai ʼi te temi fuli pe ʼe ʼaoga ki ai (Ef. 6:17). ʼE koutou fai takitokotahi koa te faʼahi ʼaia? Mokā koutou kau ki te fai faka mafola, ʼe koutou tuku koa ia te Folafola ʼa te ʼAtua ke palalau, ke feala ai te hū ʼo te laumālie maʼoniʼoni ki te loto ʼo te hahaʼi ʼaē ʼe fakalogo mai? — Taag. 8:1, 6.
2 Ko te fai faka mafola ʼe mole ko he gāue ʼe faigafua tuʼumaʼu tona fai. ʼI ʼihi ʼu telituale e tahitahiga te nonofo ʼa te hahaʼi ʼi tonatou ʼapi, pea ko nātou ʼaē ʼe tou maʼu atu ʼe maʼumaʼua, ʼo siʼisiʼi ai te faigamālie ʼaē moʼo palalau ki te Tohi-Tapu. ʼUhi ko te Tohi-Tapu ko tatatou tohi tāfito, ʼe feafeaʼi koa tatatou fakaʼaogaʼi ʼo lahi ake ʼi te gāue faka mafola pea mo faka fealagia ki te logo ʼe haʼu mai te ʼAtua ke ina uga nātou ʼaē ʼe fakalogo mai?
3 ʼI te ʼu faigamālie fuli: ʼI te ʼu matapā fuli, ʼe tou fia fakaʼaogaʼi anai te Tohi-Tapu moʼo uga ʼo ia ʼaē ʼe fai palalau mo tatou. ʼE feala ke tou teuteu ki te faʼahi ʼaia tatau aipe pe koteā te kaupepa ʼaē ʼe tou tufa. Kapau ʼe maʼumaʼua ia ia ʼo mole feala ai te avahi ʼo te Tohi-Tapu pea mo lau age he vaega e tahi peʼe lua, ʼe feala koa hakotou fakamahino age peʼe fakahā pe te manatu tāfito ʼo he vaega ia muʼa ʼo te tuku ʼo te tohi? Ko te faʼahi pe ʼaia e tahi ʼe feala ai tana tuku ʼo tana gāue kae fakalogo mai. — Hep. 4:12.
4 Ohage la, kapau ʼe koutou fakahā age ia te nusipepa Koutou ʼaʼala! ʼo te ʼaho 8 ʼo tesepeli 1993, ʼi te alatike “Un monde sans maladie” (Ko he mālama ʼe mole ʼi ai he mahaki), ʼi te ʼosi fakahā age ʼo te pāki ʼo te tuai pasina, koutou lagaʼi te fehuʼi ʼaenī, “ ʼE koutou faka tui koa ʼe pulihi ʼosi anai te mahaki, ʼo maʼu ai leva e te hahaʼi fuli he mālōlō?” Tatau aipe pe koteā te tali ka ina fai atu, ʼe feala ke koutou lau fakahagatonu age ʼi takotou Tohi-Tapu peʼe fakamahino age pe te manatu tāfito ʼo te vaega, ohage la ko Isaia 33:24 peʼe ko Fakahā 21:4. ʼI te faʼahi ʼaia ʼe koutou tuku ia te Folafola ʼa te ʼAtua ke palalau.
5 ʼI te ʼu ʼaʼahi: ʼE tonu anai ke tou teuteu ia muʼa ʼo tatatou fai te ʼu ʼaʼahi. Kae, ʼi ʼihi temi ko te ʼu manatu ʼaē neʼe mole tou teuteuʼi ʼe feala ke lagaʼi ʼi te fai palalau. Pea ko te tohi Comment raisonner à partir des Ecritures ʼe ko te meʼa gāue maʼuhiga ki te faʼahi ʼaia. Ko tatatou talanoa peʼe ko te lau ʼo te vaega faka tohi-tapu ʼi te tohi Comment raisonner ʼe tokoni anai ki te hahaʼi ke nātou fakatokagaʼi ko tatou ko te ʼu minisi ʼa te ʼAtua ka mole ko te ʼu hahaʼi fakatau ʼo te Folafola. — 2 Ko. 2:17.
6 Kapau ʼe koutou manatuʼi neʼe mole ʼi ai he puani tāfito neʼe koutou palalau kiai, ʼe feala pe hakotou avahi te tohi Comment raisonner ʼi he talanoa ʼe ʼaoga, ohage la ko “Jésus Christ” (Sesu Kilisito), “Derniers jours” (Te ʼu ʼaho fakamuli), peʼe ko te “Résurrection” (Fakatuʼuake), pea koutou fakaʼaogaʼi he manatu e tahi ʼo te ʼu kupu tāfito ʼaia moʼo kamata ʼaki ʼo te fai palalau. ʼE feala ke fakaafe te hahaʼi ke nātou lau he ʼu vaega ʼi tanatou Tohi-Tapu. Pea ko te Tohi-Tapu ʼe maʼuhiga anai kia nātou, pea ko te laumālie maʼoniʼoni ʼo Sehova ʼe hifo mai anai kia nātou mokā ʼe nātou lotolelei.
7 Ko te faka mafola ʼo te logo lelei pea mo te valoki ʼo te tagata agakovi ko totatou maʼua maʼuhiga. Ko te logo ʼa Sehova, kae mole ʼa tatou. Koutou tuku ia tana Folafola, te heletā ʼo te laumālie, ke tokoni kia koutou.