ʼE ʼAoga Koa Ke Fetogi Te ʼu Faʼahiga Palalau ʼAē ʼi Te Fai Faka Mafola?

Ko te ʼu alatike fuli ʼo te Minisitelio ʼo te Puleʼaga ʼe ina tuku mai te ʼu faʼahiga palalau faka Tohi-Tapu ʼe feala ke tou fakaʼaogaʼi ʼi te fai faka mafola. Tokolahi te kau faka mafola faiva ʼe nātou nonofo tokaga ki te ʼu manatu foʼou, ke feala ai he fetogi ʼo tanatou ʼu ʼuluaki palalau. Ko te Minisitelio ʼo te Puleʼaga ʼe ina tuku age kia nātou te ʼu manatu maʼuhiga ʼaupito ʼi te māhina fuli.

Kae, e lagi ʼe feala pe, ke koutou fakatokagaʼi ʼe mole ʼaoga ke fetogi takotou ʼu faʼahiga palalau. E lagi ʼe feala pe ke koutou kau ki te fai faka mafola ʼi he ʼu hola ʼi te māhina fuli. ʼI te hoholo ʼo te temi, ʼe feala ke koutou fakamāmāhani mo he ʼu faʼifaʼitaki ʼe koutou māhani kiai, pea ʼe koutou maʼu ai he fua lelei mokā ʼe koutou fakaʼaogaʼi. ʼE feala ke koutou tautau fakaʼaogaʼi te ʼu vaega, ʼo kau kiai mo Pesalemo 37:​9-11, 2 Petelo 3:​13, Fakahā 21:⁠4, pea mo niʼihi atu. Kapau ʼe koutou fai feiā, ʼe mole ʼaoga takotou fetogi tuʼumaʼu ʼo takotou ʼu faʼahiga palalau. Ko tatatou ʼuluaki fakatuʼutuʼu, ko te vaevae ʼo te ʼamanaki ʼo te Puleʼaga mo niʼihi pea mo tokoni kia nātou ke nātou akoʼi te meʼa ʼe tonu ke nātou fai ke nātou maʼu ai te ʼu tapuakina ʼe haʼu mai ia Sehova. Kapau ʼe koutou maʼu ʼi te tohi Comment raisonner he ʼu faʼifaʼitaki ʼe tau pea mo ʼaoga ʼe koutou leleiʼia pea ʼe koutou maʼu ai he fua lelei, ke ʼaua naʼa koutou lotolotolua ʼi tonatou fakaʼaogaʼi.