Tou Tufa Te ʼu Nusipepa ʼAē ʼe Natou Fakamoʼoni Ki Te Moʼoni
1. Koteā te ʼaoga ʼo Te Tule Leʼo pea mo te Réveillez-vous !?
1 Ko Te Tule Leʼo ʼe Ina Kalagaʼi Te Puleʼaga ʼo Sehova pea mo te nusipepa ʼaē ʼe oloi kiai ia te Réveillez-vous! ʼe ko te ʼu nusipepa ʼaia ʼe fakaʼaogaʼi tāfito ki te fakamafola ʼo te Puleʼaga pea mo te fai ʼo he ʼu tisipulo. (Mat. 24:14; 28:19, 20) ʼE tou fiafia ʼi te tufa tuʼumaʼu ʼo te ʼu nusipepa ʼaia e lua mokā tou kau ki te ʼu faʼahi kehekehe ʼo tatatou fakamafola ia te Puleʼaga.
2. Ko te ʼu fetogi fea ʼaē neʼe tou sisio kiai ʼo ʼuhiga mo Te Tule Leʼo pea mo te Réveillez-vous !, pea koteā tona tupuʼaga?
2 ʼAki te temi, neʼe tou sisio ki te ʼu fetogi ʼo te agaaga ʼo te ʼu nusipepa pea mo tonā ʼu ʼalatike, ʼo fēia mo tona faʼahiga tufa. Neʼe fai te ʼu fetogi ʼaia ʼaki te fakatuʼutuʼu ʼaē ke lahi age tona fia lau e te hahaʼi pea mo ʼaoga lahi age kiā nātou tonā ʼu ʼalatike, pea ke malave te logo ʼo te Puleʼaga ki te loto ʼo ‘te faʼahiga tagata fuli pē, ke haofaki nātou, pea ke natou aʼu ki te ʼatamai mālama totonu ʼo te moʼoni.’—1 Tim. 2:4.
3. ʼE tou fakaʼaogaʼi feafeaʼi anai te ʼu nusipepa ʼi te minisitelio?
3 Talu mai te māhina ʼo Sānualio 2006, kua tou māhani ki te fakaʼaogaʼi ʼo he ʼu ʼuluaki palalau kehekehe moʼo fakahā ia te Réveillez-vous ! ʼaē ʼe tā tuʼa tahi ʼi te māhina. ʼE tou toe fai fēia anai moʼo fakahā ia te nusipepa pē e tahi ʼi te ʼu nusipepa e lua ʼo Te Tule Leʼo ʼe Ina Kalagaʼi Te Puleʼaga ʼo Sehova ʼi tatatou minisitelio. Ko he ʼu manatu moʼo fakahā ia te ʼu nusipepa takitahi ʼaia, ʼe tuʼu anai ʼi te tuʼa pāsina ʼo Te Minisitelio ʼo Te Puleʼaga. ʼI te ʼu ʼuluaki palalau ʼaia, ʼe fakamaʼuhigaʼi anai he ʼalatike ʼi te ʼu ʼuluaki ʼalatike ʼo te nusipepa, kae ʼi ʼihi temi, ʼe talanoa ki he tahi ʼu ʼalatike ʼe fia lau anai kiai ia te hahaʼi. ʼE feala ke fua lelei age te fakaʼaogaʼi ʼo te ʼu manatu ʼaia, mokā kua tou ʼiloʼi lelei ia te ʼalatike ʼaē kā tou talanoa kiai, pea mo tou fakaʼaogaʼi tatatou ʼu palalau māhani moʼo fakaʼalutahi ia te ʼu manatu ʼaia mo totatou telituale.
4. He koʼē ʼe lagi fua lelei te fakaʼaogaʼi ʼo he tahi ʼu manatu ʼi tuʼa atu ʼo te ʼu manatu ʼaē ʼe tuʼu ʼi Te Minisitelio ʼo Te Puleʼaga?
4 Logolā ʼe maʼu ʼi Te Minisitelio ʼo Te Puleʼaga te ʼu faʼahiga manatu e lua moʼo fakahā ia te ʼu nusipepa takitahi, kae ʼe feala pē hakotou fakaʼaogaʼi he tahi age ʼu manatu moʼo fakahā te ʼu nusipepa. Koteʼuhi ko he tahi age ʼalatike ʼe lagi lahi age tona fia lau e te hahaʼi ʼi tokotou telituale. Peʼe lagi ʼi takotou manatu ʼe fua lelei age anai takotou fakahā ia te nusipepa ʼaki hakotou fakahā ia he ʼalatike ʼe kotou leleiʼia age.
5. Koteā ʼaē ʼe tonu ke kotou fai ʼi muʼa ʼo te teuteuʼi ʼo he ʼu palalau moʼo fakahā he nusipepa,?
5 ʼE Kotou Lava Teuteuʼi Feafeaʼi Takotou ʼu ʼUluaki Palalau: ʼUluaki, ʼe tonu ke kotou ʼiloʼi lelei te ʼalatike ʼaē ʼe kotou filifili ke kotou fakahā. ʼE lagi mole feala tuʼumaʼu ke kotou lau ia te ʼu ʼalatike fuli ʼo te nusipepa ʼi muʼa ʼo takotou kamata fakahā ʼi te minisitelio. Kae ʼo ʼuhiga mo te ʼu ʼalatike ʼaē ʼe kotou filifili ke kotou fakahā, ʼe tonu ke kotou talanoa fakafiafia kiai pea mo palalau fakamālotoloto. ʼE hoki feala hakotou fai ia te faʼahi ʼaia, mo kapau ʼe kotou ʼiloʼi lelei te ʼu manatu ʼaē ʼe kotou palalau kiai.
6. ʼE tou lava teuteuʼi feafeaʼi tatatou ʼu ʼuluaki palalau?
6 Pea ʼi takotou teuteuʼi ia takotou ʼu ʼuluaki palalau, kotou faigaʼi ke kotou fakaʼalutahi ia te fai palalau mo te ʼu manatu ʼaē ʼe fia talanoa kiai. Moʼo kamata he fai palalau, ʼe feala ke kotou lagaʼi he fehuʼi ʼe tupu ai anai hana fia lau ia te ʼalatike. Kotou falala tuʼumaʼu ki te mālohi ʼo te Folafola ʼa te ʼAtua ke malave takotou ʼu palalau ki te loto ʼo ia ʼaē ʼe fai palalau mo koutou. (Hep. 4:12) Kotou filifili he vaega ʼe ʼalutahi mo te manatu ʼaē ʼe kotou palalau kiai, ʼe lagi lelei ke kotou lau age ia he vaega ʼe tuʼu ʼi te ʼalatike ʼaē kā kotou fakahā. Kotou vakaʼi peʼe feafeaʼi te fakaʼalutahi ʼo te vaega pea mo te ʼalatike.
7. ʼE feafeaʼi hatatou faigaʼi ke lelei age ia tatatou ʼu ʼuluaki palalau?
7 ʼI Te ʼu Temi Faigamālie Fuapē: Ke fua lelei moʼoni ia he ʼu ʼuluaki palalau, ʼe tonu ke fakaʼaogaʼi tuʼumaʼu. Kotou fai fakamafola fakatahi mo te kōkelekāsio ki te tufa ʼo te ʼu nusipepa ʼi te Moeaki. Kotou foaki te ʼu nusipepa ki te hahaʼi ʼaē neʼe natou tali ki muʼa atu ia te tahi ʼu tohi. Kotou foaki tuʼumaʼu te ʼu nusipepa ki takotou kau ako Tohi-Tapu pea mo te hahaʼi ʼaē ʼe ʼi te ʼapi mokā kotou fai he ʼaʼahi. ʼE feala hakotou tufa te ʼu nusipepa ki te hahaʼi ʼaē ʼe kotou fai palalau mo ia mokā kotou fai fakatau, mokā kotou folau, peʼe mokā kotou talitali ʼi he fale tōketā. Kotou faigaʼi ke lelei age takotou ʼu ʼuluaki palalau mokā kotou fakaʼaogaʼi te ʼu palalau ʼaia ʼi te māhina.
8. He koʼē ʼe mole he tahi age ʼu nusipepa ʼe tatau mo Te Tule Leʼo pea mo te Réveillez-vous !?
8 ʼE mole he tahi age ʼu nusipepa ʼe tatau mo Te Tule Leʼo pea mo te Réveillez-vous ! ʼE nā fakavikiviki ia Sehova, te Tuʼi ʼo te ʼatulaulau. (Gāue 4:24) ʼE nā fakaloto fīmālie te hahaʼi ʼaki te logo lelei ʼo te Puleʼaga ʼo te ʼAtua pea mo fakaloto mālohiʼi te tui kiā Sesu Kilisito. (Mat. 24:14; Gāue 10:43) Tahi ʼaē meʼa, ʼe muliʼi e te ʼu nusipepa ʼaia te ʼu meʼa ʼaē ʼe hoko ʼi te mālamanei, ʼaē ʼe natou fakahoko te ʼu lea fakapolofetā ʼo te Tohi-Tapu. (Mat. 25:13) Kotou tokoni ki te hahaʼi ʼo tokotou telituale ke natou maʼu te ʼu lelei mai te ʼu nusipepa ʼaia e lua, ʼo kotou teuteu ke kotou tufa ʼi te ʼu faigamālie fuapē!
9. ʼE tou lava teuteuʼi feafeaʼi he ʼaʼahi?
9 Kapau neʼe kotou tuku he nusipepa, pe neʼe kotou fai palalau mo he tahi ki he ʼu manatu fakalaumālie, kotou lagaʼi he fehuʼi peʼe ko he manatu ʼe feala ai anai hakotou toe fai he ʼaʼahi pea mo fai palalau ki he tahi ʼu manatu fakalaumālie. Kapau ʼe tou faʼafai ʼi te tō ʼo te pulapula ʼo te moʼoni, ʼe feala ke tou tui papau ko Sehova ʼe ina ʼavahi anai te ʼu loto ʼo nātou ʼaē ʼe natou holi moʼoni ke natou ʼiloʼi ia Ia pea mo tauhi age kiā te Ia.—1 Ko. 3:6.