ʼE Koutou Fakahoko Katoa Koa Tokotou Minisitelio?
1 ʼI te tohi ʼo Gaue, ʼe ina fakahā mai ko te ʼu tisipulo ʼa Sesu neʼe nātou fakahoko tonatou minisitelio, ʼo nātou “fagonogono katoa” ki te hahaʼi. (Gaue 2:40; 8:25; 28:23, MN ) ʼE mahino ia neʼe ko te fakatuʼutuʼu ʼaia ʼa te ʼapositolo ko Paulo. (Gaue 20:24) ʼE mole koa la ko takotou fakatuʼutuʼu ʼaia ʼi tokotou ʼuhiga minisi ʼo te logo lelei? ʼE koutou lava fakahoko feafeaʼi te faʼahi ʼaia?
2 Koutou Teuteuʼi Hakotou ʼu Palalau: Kapau ʼe koutou fia fai he fagonogono lelei ʼi te minisitelio, pea ʼe maʼuhiga ke koutou teuteuʼi. ʼE moʼoni tāfito te faʼahi ʼaia ʼo ʼuhiga mo te fakahā ʼo te ʼu nusipepa, koteʼuhi ʼe fetogi tuʼumaʼu te ʼu alatike. Moʼo tokoni kia tatou ʼi te faʼahi ʼaia, ʼe ʼi ai te meʼa foʼou ʼi te Minisitelio ʼaenī—ʼi te faʼahi hema ʼe tuʼu ai te ʼu palalau faigafua moʼo fakahā te ʼu nusipepa foʼou ʼo Te Tule Leʼo pea mo te Réveillez-vous ! ʼE talanoa anai ki he ʼu alatike ʼo te ʼu nusipepa ʼe leleiʼia anai e te hahaʼi. ʼE feafeaʼi hakotou fakaʼaogaʼi te ʼu kiʼi faʼifaʼitaki nounou ʼaia?
3 Koutou filifili te ʼu palalau ʼe koutou sio ʼe ʼaoga lelei anai ki tokotou telituale. Koutou lau fakalelei te alatike ʼaē ʼe talanoa kiai, pea koutou tāʼofi te ʼu puani tāfito ʼaē ka leleiʼia anai e te hahaʼi. Koutou kumi he vaega ʼi te nusipepa ʼe ʼalutahi mo te fai palalau, ke feala hakotou lau age kia ia ʼo te ʼapi. Koutou fakanounou takotou ʼu palalau fakaʼosi moʼo fakaloto mālohiʼi ke ina lau te nusipepa, pea kapau ʼe ʼaoga, koutou fakamahino fakanounou age ʼe feala ke ina foaki he meʼa ʼofa moʼo lagolago ki te gāue faka malamanei ʼa te kau Fakamoʼoni ʼa Sehova. ʼOsi ʼaia pea koutou lau liuliuga te ʼu palalau ʼaia.
4 Koutou Fakaʼaogaʼi Te Tohi-Tapu: Koutou fakatuʼutuʼu lelei ke koutou fakaʼaogaʼi he vaega faka Tohi-Tapu, ʼi te ʼu palalau ʼaē ka koutou fai. Ohage la, ko te kau fai faka mafola ʼaē kua māhani, ʼe lahi te ʼu koga meʼa ʼe fua lelei ai tanatou faka mafola ʼaki te Tohi-Tapu, heʼe nātou fakamālo ki te hahaʼi pea nātou ʼui fēnei:
◼ “ ʼE mātou fehuʼi ki te hahaʼi peʼe nātou tui ki te faʼahi ʼaenī . . .” Koutou lau ia Senesi 1:1, pea koutou fehuʼi fēnei: “ ʼE koutou tali koa te manatu ʼaenī?” Kapau ʼe ʼio kiai, pea koutou ʼui fēnei: “ ʼE ʼau faka tui mo ʼau ki ai. Kae ʼi tau manatu kapau neʼe fakatupu e te ʼAtua ia meʼa fuli, pea neʼe ina toe fakatupu koa mo te agakovi?” ʼI tana ʼosi tala atu tana manatu, koutou lau ia Tagata Tānaki 7:29. Avahi age te tohi ʼAtamai Mālama ʼi te pasina 71, pea koutou lau ia te palakalafe 2. Koutou fakaloto mālohiʼi ia ia ke ina lau te tohi. Kapau ʼe mole ina tali te manatu ʼo Senesi 1:1, koutou fakaloto mālohiʼi ia ia ke ina vakaʼi te tohi Création.
5 Koutou Fai Te ʼu ʼAʼahi: ʼE mole feala ke koutou fakahoko katoa tokotou minisitelio mo kapau ʼe mole koutou ʼolo ʼo hoko atu te fai palalau. Kapau ʼe lelei te fai palalau mo he tahi, tatau aipe pe neʼe koutou tuku age hana nusipepa peʼe ko hana tohi peʼe kailoa, koutou tohi tona higoa, pea mo tona tuʼasila. Koutou mulimuli lelei ki te fia ʼiloʼi ʼa te hahaʼi, ʼo koutou foimo liliu ʼo ʼaʼahi nātou. Koutou kole age ke fai hana ako Tohi-Tapu.
6 Ko te kau tisipulo ʼo te ʼuluaki sēkulō, neʼe nātou ʼiloʼi neʼe fakatotonu age e Sesu “ke nātou fagonogono katoa.” (Gaue 10:42, MN ) ʼE tonu mo tatou ke tou mulimuli ki te fakatotonu ʼaia, heʼe ko te fakatuʼutuʼu pe ʼaia moʼo fai ʼo ni ʼu tisipulo. (Mat. 28:19, 20) Tou faiga mālohi ke tou fakahoko katoa totatou minisitelio.—2 Tim. 4:5.