Te Tali Ki ʼAkotou ʼu Fehuʼi

◼ ʼI te temi ʼaenī kua tou maʼu ai te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe tonu ke loaloaga feafeaʼi te fai ʼo te ako Tohi-Tapu?

Neʼe fakahā ʼi Te Minisitelio ʼo Te Puleʼaga Fakafalani ʼo Sepetepeli 1993 ʼe feala ke hoko atu he ako Tohi-Tapu mo he tahi ʼe fia logo ki te moʼoni ʼo aʼu ki te ʼosi ʼo te ʼu tohi e lua. ʼI te temi ʼaenī kua tou maʼu te tohi Te ʼAtamai Mālama, pea ʼe ʼaoga ke fetogi te fakatuʼutuʼu ʼaia, ohage ko tona fakahā ʼi Te Tule Leʼo ʼo te ʼaho 15 ʼo Sanualio 1996 ʼi te pasina 13 pea mo te 14.

Neʼe fai te tohi Te ʼAtamai Mālama moʼo tokoni kia nātou ʼaē ʼe nātou “tali lelei te maʼuli heʼegata” ke nātou ako te meʼa ʼaē ʼe tonu ke nātou ʼiloʼi, ke feala ai hanatou foaki tonatou maʼuli kia Sehova pea mo nātou papitema. (Gāue 13:48) Koia, ʼi te ʼosi ako ʼo te tohi foʼou ʼaia, ʼe mole ʼaoga ke toe ako he tahi age tohi mo ia ʼaē ʼe ako Tohi-Tapu. Ko te ʼu hahaʼi ʼaē ʼe ako Tohi-Tapu mo koutou ʼaē kua nātou kamata tali te moʼoni, ʼe feala hakotou fakaloto mālohiʼi māmālie ia nātou ke nātou fakatuputupu tonatou ʼatamai mālama, ʼo nātou kau ki te ʼu fono ʼa te kau Fakamoʼoni ʼa Sehova, mo nātou lau te Tohi-Tapu pea mo te ʼu tohi faka Kilisitiano.

ʼE ko he meʼa lelei anai mo kapau kua koutou māhani lelei mo te ʼu fehuʼi ʼo te pasina 175 ki te 218 ʼo te tohi Organisés pour bien remplir notre ministère. Logope la ʼe mole koutou fakaʼaogaʼi te ʼu fehuʼi ʼaia pea ʼe mole koutou toe vakaʼi te ʼu fehuʼi ʼaia mo ia ʼaē ʼe ako Tohi-Tapu, ʼe tonu ke koutou faka maʼuhigaʼi te ʼu puani ʼi te tohi Te ʼAtamai Mālama ke feala kia ia ʼaē ʼe ako, ke ina fakahā lelei te ʼu moʼoni tāfito ʼo te Tohi-Tapu mokā vakaʼi anai e te ʼu tagata ʼāfea mo ia te ʼu fehuʼi ʼo ʼuhiga mo te papitema.

ʼE mole tonu ke hilifaki he tahi manatu ki te ʼu puani ʼaē ʼe talanoa kiai te tohi Te ʼAtamai Mālama, moʼo lagolago ki te ʼu akonaki ʼo te Tohi-Tapu peʼe moʼo fakatonutonuʼi ʼo te ʼu akonaki hala. Ko te faʼahi ʼaia ʼe ina fakaloaloaga fau anai te ako. Kae, ʼe tou fakaʼamu ke foimo fai te tohi ʼaia, lagi ʼi he ʼu māhina e ono. Koia ʼe ʼaoga ai ke tou ako fakalelei pea mo vakaʼi fakatomuʼa te tohi ʼaia, ke feala ai hatatou fakahā fakalelei pea mo matala lelei. Ko ia ʼaē ʼe ako ʼe toe fakaloto mālohiʼi mo ia ke ina vakaʼi fakatomuʼa te tohi, ke ina lau te ʼu vaega faka Tohi-Tapu, pea ke ina faigaʼi ke mahino lelei ki te ʼu meʼa ʼaē ʼe talanoa kiai te ʼu kapite fuli ʼo te tohi ʼaia.

Neʼe fakahā e Te Tule Leʼo ʼe ʼaoga ki te kau Fakamoʼoni ʼa Sehova ke nātou fai he ʼu ako Tohi-Tapu ʼe lelei ʼi he temi nounou. (Vakaʼi ia Isaia 60:22.) Ko te fakaʼaogaʼi fakalelei ʼo te tohi Te ʼAtamai Mālama ʼe feala ke tokoni ki te ʼu hahaʼi foʼofoʼou ke nātou maʼu te ʼatamai mālama ʼaē ʼe ina taki ki te maʼuli heʼegata pea mo nātou maʼuliʼi te ʼatamai mālama ʼaia.​—Soane 17:⁠3.