ʼE ʼAoga Ki Te Malamanei Ia Te ʼAtamai Mālama ʼo ʼUhiga Mo Te ʼAtua
“ ʼE ke mahino ai anai ki te manavasiʼi kia Sehova pea ʼe ke maʼu anai te ʼatamai mālama ʼo ʼuhiga mo te ʼAtua.”—Tāʼaga Lea 2:5.
1. He koʼe ʼe feala ke tou ʼui ko te mafu ʼo te tagata ʼe ko he meʼa fakatalakitupua neʼe faʼu e te ʼAtua?
ʼI TE temi nei kua teitei pe ke katoa te ʼu mafu ʼo te hahaʼi e toko 5 600 000 000 ʼaē ʼe tātā ʼi te kele. ʼI te ʼaho fuli, ʼe tuʼa 100 000 te tātā ʼo tokotou mafu, pea ʼe ina pamu te ʼu lite toto e 7,600 pea ia kilometa e 100 000 ʼe feʼāveʼaki ai te toto ʼi te ʼu ua ki tokotou mafu. ʼE mole ʼi ai he tahi koga ʼo tokotou sino ʼe lahi age tana gāue ʼi te meʼa fakatalakitupua ʼaia, ʼaē neʼe faʼu e te ʼAtua.
2. E feafeaʼi hakotou fakamahinohino te mafu fakatātā?
2 ʼE ʼi ai foki mo te ʼu mafu fakatātā e 5 600 000 000 ʼe gāue ʼi te kele. ʼI te ʼu mafu fakatātā ʼaia ʼe tou maʼu ai te ʼu meʼa ʼaē ʼi totatou loto, te ʼu meʼa ʼaē ʼe nātou uga ai tatou ke tou fai he meʼa, pea mo te ʼu meʼa ʼaē ʼe tou holi kiai. ʼE ko te potu ʼaia ʼaē ʼe maʼu ai tatatou ʼu manatu, totatou ʼatamai, pea mo te ʼu meʼa ʼaē ʼe loto kiai totatou ʼatamai. Ko te mafu fakatātā ʼe feala ke fialahi peʼe agavaivai, ke lotomamahi peʼe loto fiafia, ke fakapōʼuli peʼe mālama.—Nehemia 2:2; Tāʼaga Lea 16:5; Mateo 11:29; Gāue 14:17; 2 Kolonito 4:6; Efesi 1:16-18.
3, 4. ʼE malave feafeaʼi te logo lelei ki te ʼu loto ʼo te hahaʼi?
3 ʼE ʼiloʼi e Sehova ʼAtua te ʼu meʼa ʼaē ʼe ʼi te loto ʼo te tagata. ʼE ʼui fēnei ia Tāʼaga Lea 17:3: “Ko te kulo haka ukamea ʼe ina fakamaʼa te siliva pea ko te gutuʼumu kakaha ʼe ina fakamaʼa te aulo, kae ko Sehova ʼe ina sivi te ʼu loto.” ʼE mole gata pe ʼi tana lau te loto ʼo te tagata takitokotahi pea mo ina fakamāuʼi, kae, ʼe fakaʼaogaʼi e Sehova tana kau Fakamoʼoni ke nātou fakaaʼu te logo lelei ki te loto ʼo te tagata. Ko te meʼa ʼaia ʼe ʼalutahi mo te ʼu palalau ʼaenī ʼa te ʼapositolo ko Paulo: “ ‘Ko ʼaē ʼe fetapā ki te huafa ʼo Sehova ʼe hāo anai ia.’ Kae ʼe nātou fetapā feafeaʼi anai kia ia ʼaē ʼe mole nātou tui ki ai? Pea ʼe nātou tui feafeaʼi anai kia ia ʼaē ʼe mole heʼeki nātou logo ki he talanoa ʼo ʼuhiga mo ia? Pea ʼe nātou logo feafeaʼi anai, mo kapau ʼe mole he tahi ʼe fai faka mafola? Pea ʼe nātou fai faka mafola feafeaʼi anai, mo kapau ʼe mole fekauʼi nātou? Ohage ko te meʼa ʼaē neʼe tohi: ‘ ʼE matalelei te ʼu vaʼe ʼo nātou ʼaē ʼe nātou fagonogono te logo lelei ʼo te ʼu meʼa lelei!’ ”—Loma 10:13-15.
4 ʼE ko he meʼa fakafiafia kia Sehova tana fekauʼi tana kau Fakamoʼoni ki te ʼu potu taupotu ʼo te kele ke nātou “fagonogono te ʼu logo lelei ʼo te ʼu meʼa lelei” pea mo nātou maʼu ia nātou ʼaē ʼe nātou tali leleiʼi te logo lelei. ʼI te temi nei kua tou aʼu ki te toko 5 000 000 tupu kaugā fai faka mafola ʼi te kele katoa—ko tona faka ʼuhiga ko te fakamoʼoni e 1 maʼa te toko 1 200 hahaʼi. Ko te fakaaʼu ʼo te logo lelei ki te ʼu lauʼi miliale hahaʼi ʼi te kele ʼe mole ko he meʼa faigafua. Kae ʼe takitaki e te ʼAtua te gāue ʼaia ʼaki ia Sesu Kilisito, pea ʼe ina taki mai kia te ia te hahaʼi agatonu. Koia, ko te lea faka polofeta ʼaē ʼa Isaia 60:22 kua hoko moʼoni: “Ko ia ʼaē ʼe veliveli ʼe liliu anai ko te lauʼi afe e tahi, pea ko ia ʼaē ʼe veliveli ʼe liliu ia ko he puleʼaga mālohi. Ko ʼau, Sehova, ʼe ʼau fakavaveʼi anai te faʼahi ʼaia ʼi tona temi totonu.”
5. Koteā te ʼatamai mālama, pea koteā ʼaē ʼe feala ke ʼui ʼo ʼuhiga mo te poto ʼo te malamanei?
5 Kua hoko mai te temi ʼaia, pea kua mahino papau kia tatou te meʼa ʼaenī—ʼe ʼaoga ki te lauʼi miliale hahaʼi ʼi te kele ia te ʼatamai mālama. ʼI te agamāhani, ko te ʼatamai mālama ʼe ko te poto ʼaē ʼe tou maʼu ʼi te ʼu meʼa ʼaē ʼe hoko ʼi totatou maʼuli, te ʼu meʼa neʼe tou sio kiai, peʼe ko te ʼu meʼa ʼaē neʼe tou ako. Kua lahi ʼaupito te ʼu meʼa ʼaē kua ʼiloʼi e te mālama. Kua lahi ʼaupito te poto ʼo te tagata ʼo ʼuhiga mo te faʼu ʼo te ʼu meʼa feʼaluʼaki, te ʼu faitoʼo ke maʼu ai he maʼuli mālōlō, pea mo te ʼu meʼa kehekehe moʼo fakahoko ʼo te faka felogoi. Kae ʼe ko te ʼatamai mālama koa la ʼaia ʼaē ʼe ʼaoga moʼoni ki te malamanei? Kailoa ia! He ko te tau, te mamahi, te mahaki, pea mo te mate ʼe kei mafola pe ia ʼi te malamanei. Kae kua ʼiloʼi papau ko te poto ʼo te mālama ʼe fetogi ohage ko te fueʼi ʼo te ʼone e te tuʼani matagi.
6. ʼO ʼuhiga mo te toto, e feafeaʼi he fakatatau ʼo te ʼatamai mālama ʼo ʼuhiga mo te ʼAtua pea mo te poto ʼo te malamanei?
6 Koʼeni tona fakatā: Kua hili kiai sēkulō e lua, neʼe ko he agamāhani te ʼui ʼaē ko te tuʼusi ʼo he ua ke fakaʼalu te toto ʼe ko he faitoʼo. Neʼe hoko te faʼahi ʼaia kia George Washington, te ʼuluaki pelesita ʼo Amelika, ʼi te ʼu temi fakaʼosi ʼo tona maʼuli. ʼI te tahi lakaga neʼe ina ʼui fēnei: “Tuku ke ʼau mate fīmālie, he mole kei feala haku maʼuli fualoa.” Neʼe tonu tana manatu, koteʼuhi neʼe mate ia ʼi te ʼaho pe ʼaia—ʼi te ʼaho 14 ʼo Tesepeli 1799. Ia ʼaho nei ʼe mole kei tuʼusi te ʼu ua ʼo te hahaʼi ke fakaʼalu te toto, kae ʼe faka maʼuhigaʼi te ʼu foʼi huki toto ʼaē ʼe fakahū ai te toto ki te sino ʼo te tagata. Ko te ʼu faʼahiga meʼa ʼaia e lua neʼe fakatupu ai te mamate ʼa te hahaʼi. Kae, talu mai fualoa neʼe ʼui fēnei e te Folafola ʼa te ʼAtua: “[Ke koutou] fakamamaʼo . . . mai te toto.” (Gāue 15:29) Ko te ʼatamai mālama ʼo ʼuhiga mo te ʼAtua ʼe totonu tuʼumaʼu, ʼe feala hatatou falala kiai, pea ʼe kei ʼaoga ki totatou temi.
7. ʼO ʼuhiga mo te akoʼi ʼo te fānau, e feafeaʼi te fakatatau ʼo te ʼatamai mālama totonu ʼo te Tohi-Tapu pea mo te poto ʼo te malamanei?
7 Tou vakaʼi te tahi faʼifaʼitaki ʼe hā ʼaki ai ʼe mole feala hatatou falala ki te poto ʼo te mālama. ʼI te lolotoga ʼo ni ʼu taʼu neʼe lagolago te ʼu tōketā ʼaē ʼe nātou sivi te ʼatamai, ki te manatu ʼaē ke tuku te fānau ke nātou fai te meʼa ʼaē ʼe nātou loto kiai, kae mole tonu ke fakatonutonuʼi, kae ki muli age neʼe fakahā e te tahi tagata ia nātou pe ʼaia, neʼe nātou faihala. ʼI te tahi lakaga, neʼe ʼui fēnei e te Kautahi Faka Siamani ʼaē ʼe ina sivi te ʼu tohi, ko te tuku ʼo te fānau ʼaē ke nātou faʼifaʼitaliha, ʼe “toe kau pe foki ki te fakatupu ʼo te ʼu fihifihia ʼaē ʼe tau mo tatou ʼi te temi nei ʼo ʼuhiga mo te kau tūpulaga.” Ko te poto ʼo te mālama ʼe feala pe ke fetogi ohage pe neʼe fueʼi e he tuʼani matagi, kae ko te ʼatamai mālama totonu ʼo te Tohi-Tapu ʼe tuʼu maʼu ia. ʼE foaki mai e te Tohi-Tapu te ʼu tokoni fakapotopoto ʼo ʼuhiga mo te akoʼi ʼo te fānau. ʼE ʼui fēnei ia Tāʼaga Lea 29:17: “Akonakiʼi tou foha, pea ʼe ina fakafimālieʼi anai koe pea mo ina foaki atu anai he fiafia lahi ki tou nefesi.” Ko te taʼi akonaki ʼaia ʼe fai ʼaki te ʼofa, koteʼuhi neʼe tohi fēnei e Paulo: “ ʼU tāmai, ʼaua naʼa koutou fakatupu ʼita takotou fānau, kae ke koutou haga ako ia nātou ke nātou maʼu te akonaki pea mo te manatu ʼa Sehova.”—Efesi 6:4.
“Te ʼAtamai Mālama ʼo ʼUhiga Mo Te ʼAtua”
8, 9. E feafeaʼi hakotou fakamahino ia Tāʼaga Lea 2:1-6 ʼo ʼuhiga mo te ʼatamai mālama ʼaē ʼe ʼaoga moʼoni ki te malamanei?
8 Logope la ko Paulo neʼe ko he tagata neʼe ako, neʼe ina ʼui fēnei: “Kapau ʼe ʼi ai he tahi ia koutou ʼe manatu ʼe poto ʼi te tuʼu ʼo te ʼu faʼahiga meʼa ʼaenī, ke liliu ia ʼo vale ke feala ai hana liliu ʼo poto. Ko te poto ʼo te mālama ʼaenī ʼe matavale ia, ia mata ʼo te ʼAtua.” (1 Kolonito 3:18, 19) ʼE ko te ʼAtua tokotahi pe ʼaē ʼe feala ke ina foaki ia te ʼatamai mālama ʼaē ʼe ʼaoga moʼoni ki te malamanei. ʼO ʼuhiga mo te faʼahi ʼaia, ʼe ʼui fēnei ia Tāʼaga Lea 2:1-6: “Toku foha, kapau ʼe ke tali taku ʼu folafola pea mo ke taupau fakalelei ia te koe taku ʼu fakatotonu, ke feala ai hau tokaga ki te poto ʼaki tou taliga, ke ke fakafalele ai tou loto ki te fakasiosio tonu; pea tahi ʼaē, kapau ʼe ke pāui ki te ʼatamai pea kapau ʼe ke kalaga ʼaki tou leʼo ki te fakasiosio tonu, kapau ʼe ke haga kumi te meʼa ʼaia ohage ko te siliva pea [kapau] ʼe ke haga kumi tuʼumaʼu ohage ko he ʼu koloā maʼuhiga neʼe fufū, pea ʼe hoki ke mahino ai anai ki te manavasiʼi kia Sehova pea ʼe ke maʼu ai anai te ʼatamai mālama ʼo ʼuhiga mo te ʼAtua. Heʼe foaki e Sehova totonu ia te poto; ʼe haʼu mai tona gutu te ʼatamai mālama pea mo te fakasiosio tonu.”
9 Ko nātou ʼaē ʼe uga e he loto ʼe lelei ʼe nātou tokagaʼi te poto, ʼo nātou fakaʼaogaʼi fakalelei te ʼatamai mālama ʼaē neʼe foaki mai e te ʼAtua. ʼE nātou fakafalele tonatou loto ki te fakasiosio tonu, mo nātou fakafuafua lelei te ʼu meʼa ʼaē ʼe nātou ako. ʼE mahino ia, ʼe nātou pāuiʼi te ʼatamai, peʼe ko te fealagia ʼaē ke nātou ʼiloʼi te kehekehe ʼo he manatu mo he tahi manatu. Ko te hahaʼi ʼaē ʼe loto faitotonu ʼe nātou gāue ohage ʼe nātou kumi te siliva pea mo he ʼu koloā neʼe fufū. Kae koteā koa te koloā lahi ʼaē ʼe maʼu ʼe nātou ʼaē ʼe lelei tonatou loto? Ko “te ʼatamai mālama ʼo ʼuhiga mo te ʼAtua.” Koteā koa tona faka ʼuhiga? Ko tona faka ʼuhiga fakanounou, ko te ʼatamai mālama ʼaē ʼe maʼu ʼi te Folafola ʼa te ʼAtua, te Tohi-Tapu.
10. Koteā te meʼa ʼaē ʼe tonu ke tou fai ke tou maʼuli lelei ai ʼi te faʼahi fakalaumālie?
10 Ko te ʼatamai mālama ʼo ʼuhiga mo te ʼAtua ʼe hāo mai te ʼu hala, ʼe mole fetogi ʼi he temi, pea ʼe ina foaki te maʼuli. ʼE lagolago ki te lelei ʼo totatou maʼuli fakalaumālie. Neʼe fakaloto mālohiʼi e Paulo ia Timoteo ʼo ina ʼui fēnei: “Taupau maʼu te faʼifaʼitaki ʼo te ʼu folafola ʼo te maʼuli ʼaē neʼe ʼau fakahā atu, ʼaki te tui pea mo te ʼofa ʼaē ʼe pipiki kia Kilisito Sesu.” (2 Timoteo 1:13) Ko te lea ʼe mulimuli ki te faʼahiga faʼu ʼo te ʼu palalau. ʼO toe feiā aipe, ko te “lea maʼa” ʼo te moʼoni faka Tohi-Tapu, ʼe ina muliʼi “te faʼifaʼitaki ʼo te ʼu folafola ʼo te maʼuli,” ʼaē ʼe mulimuli ki te kupu tāfito ʼo te Tohi-Tapu, ʼo ʼuhiga mo te faka lākatonuʼi ʼo te pule faʼitaliha ʼa Sehova ʼaki te Puleʼaga. (Sofonia 3:9) ʼE ʼaoga ke tou taupau maʼu te faʼifaʼitaki ʼaia ʼo te ʼu folafola ʼo te maʼuli ʼi totatou ʼatamai pea mo totatou mafu. Kapau ʼe mole tou loto ke mahaki totatou loto fakatātā, pea ke tou mālohi ʼi te faʼahi fakalaumālie, ʼe tonu ke tou maʼuliʼi te Tohi-Tapu ʼi te ʼaho fuli, pea mo tou fakaʼaogaʼi fuli te ʼu meʼa kai fakalaumālie ʼaē ʼe foaki mai e te ʼAtua ʼaki “te tagata kaugana agatonu mo poto.” (Mateo 24:45-47; Tito 2:2) ʼE tonu ke tou manatuʼi tuʼumaʼu, kapau ʼe tou loto ke lelei totatou maʼuli fakalaumālie, ʼe ʼaoga kia tatou ia te ʼatamai mālama ʼo ʼuhiga mo te ʼAtua.
11. Koteā te ʼu tupuʼaga ʼaē ʼe ʼaoga ai ki te malamanei ia te ʼatamai mālama ʼo ʼuhiga mo te ʼAtua?
11 Tou vakaʼi te tahi ʼu tupuʼaga ʼaē ʼe ʼaoga ai te ʼatamai mālama ʼo ʼuhiga mo te ʼAtua ki te lauʼi miliale hahaʼi ʼi te kele. ʼE nātou ʼiloʼi fuli koa pe neʼe feafeaʼi te fakatupu ʼo te kele pea mo te tagata? Kailoa. ʼE ʼiloʼi koa e te malamanei katoa ia te ʼAtua moʼoni pea mo tona ʼAlo? ʼE ʼiloʼi koa e te hahaʼi fuli te ʼu fehuʼi ʼaē neʼe lagaʼi e Satana ʼo ʼuhiga mo te pule faʼitaliha ʼa te ʼAtua pea mo te nofo agatonu ʼa te tagata kia te ia? Kailoa. ʼE ʼiloʼi koa e te hahaʼi fuli, pe koʼe ʼe tou matutuʼa pea mo tou mamate? ʼE tou toe tali pe, kailoa. ʼE ʼiloʼi koa e te hahaʼi fuli ʼo te kele kua fakatuʼu ʼi te temi nei te Puleʼaga ʼo te ʼAtua, pea ʼe tou maʼuʼuli nei ʼi te ʼu ʼaho fakaʼosi? ʼE nātou ʼiloʼi koa ʼe ʼi ai te ʼu laumālie mālolohi pea mo agakovi? ʼE ʼiloʼi koa e te hahaʼi fuli peʼe feafeaʼi te maʼu ʼo he maʼuli faka famili fiafia? Pea ʼe ʼiloʼi koa e te hahaʼi, ʼe fakatuʼutuʼu e totatou Tupuʼaga ke ina foaki ki te hahaʼi fakalogo he maʼuli fiafia ʼi te Palatiso? ʼO toe feiā pe mo te ʼu fehuʼi ʼaia, ʼe tou tali kailoa. Koia, kua hā lelei mai ai, ʼe ʼaoga ki te malamanei ia te ʼatamai mālama ʼo ʼuhiga mo te ʼAtua.
12. ʼE lava feafeaʼi hatatou atolasio ki te ʼAtua “ ʼaki te laumālie pea mo te moʼoni”?
12 ʼE toe ʼaoga pe foki ki te malamanei te ʼatamai mālama ʼo ʼuhiga mo te ʼAtua, ʼuhi ko te meʼa ʼaē neʼe ʼui e Sesu ʼi tana faikole ʼi te po fakaʼosi ʼo tona maʼuli ʼi te kele. ʼE mahino ia, neʼe malave ʼaupito ki te loto ʼo tana ʼu tisipulo tanatou logo ki tana ʼui ʼaē: “Ko te faka ʼuhiga ʼaenī ʼo te maʼuli heʼegata: ke nātou ako te ʼiloʼi, ʼo koe, ʼaē ko te ʼAtua moʼoni pe e tahi pea mo ia ʼaē neʼe ke fekauʼi mai, ia Sesu Kilisito.” (Soane 17:3) Ko te maʼuliʼi ʼo te faʼahiga ʼatamai mālama ʼaia, ʼe ko te faʼahiga atolasio pe ʼaia e tahi ʼe tali e Sehova. Neʼe ʼui fēnei e Sesu: “Ko te ʼAtua ʼe Laumālie, pea ko nātou ʼaē ʼe nātou atolasio kia te ia ʼe tonu ke nātou atolasio kia te ia ʼaki te laumālie pea mo te moʼoni.” (Soane 4:24) ʼE tou atolasio ki te ʼAtua “ ʼaki te laumālie” mokā uga tatou e he loto ʼe fonu ʼi te tui pea mo te ʼofa. E feafeaʼi koa hatatou atolasio kia te ia ‘ ʼaki te moʼoni’? ʼAki tatatou ako tana Folafola pea mo tatatou atolasio kia te ia ʼo mulimuli ki tana ʼu moʼoni ʼaē neʼe ina fakahā mai—“te ʼatamai mālama ʼo ʼuhiga mo te ʼAtua.”
13. Koteā te meʼa ʼe fakamatala ia Gāue 16:25-34, pea koteā te puani ʼaē ʼe feala ke tou tāʼofi mai ai?
13 Ko te lauʼi afe hahaʼi ʼe nātou kamata tauhi kia Sehova ʼi te taʼu fuli. Kae, ʼe tonu koa ke fai fualoa te ʼu ako Tohi-Tapu mo te hahaʼi ʼaē ʼe fia logo ki te moʼoni, peʼe feala koa ki te hahaʼi fakamalotoloto ke nātou aʼu fakavilivili ki te papitema? Tou vakaʼi te meʼa neʼe hoko ki te tagata leʼo pilisoni pea mo tona loto fale ʼaē ʼe fakamatala ia Gāue 16:25-34. Ko Paulo pea mo Silasi neʼe nā pilisoni ʼi Filipe, kae ʼi te lolotoga ʼo te pōʼuli, neʼe hoko te mafuike lahi ʼo ava ai te ʼu matapā ʼo te fale pilisoni. ʼI tana manatu ʼaē kua feholaki te kau pilisoni fuli pea mo tana ʼiloʼi te tūʼa mamafa ʼaē ka fai kia ia, neʼe ʼalu ai te tagata leʼo pilisoni ko hona fakamate, ka neʼe ʼui age e Paulo ki te tagata ʼaia ʼe nātou katoa ʼi te fale pilisoni. Ko Paulo pea mo Silasi “neʼe nā palalau age kia ia pea mo tona loto fale katoa, ʼo ʼuhiga mo te folafola ʼa Sehova.” Ko te tagata leʼo pilisoni pea mo tona famili neʼe ko te kau Senitile ʼe mole heʼeki nātou ʼiloʼi te Tohi-Tapu Maʼoniʼoni. Kae, ʼi te po pe ʼaia, neʼe nātou liliu ai ko te ʼu hahaʼi ʼe tui ki te ʼAtua. Pea tahi ʼaē meʼa, “neʼe papitemaʼi fuli nātou, ia ia pea mo tona loto fale.” Neʼe tahitahiga te hoko ʼo te ʼu meʼa ʼaia, kae ko te hahaʼi ʼaē neʼe foʼofoʼou mai neʼe akoʼi kia nātou te ʼu moʼoni tāfito, pea mo nātou ako te tahi ʼu meʼa ʼi te ʼu fono ʼo te kokelekasio. ʼE tonu ke feiā ʼi te temi nei.
ʼE Lahi Te Taʼukai!
14. He koʼe ʼe ʼaoga ke tou fai he ʼu ako Tohi-Tapu ʼe lava lelei ʼi he kiʼi temi nounou pe?
14 ʼE lelei mo kapau ʼe feala ke fai e te kau Fakamoʼoni ʼa Sehova he ʼu ako Tohi-Tapu ʼe lava lelei ʼi he kiʼi temi nounou. ʼE ʼaoga moʼoni te faʼahi ʼaia. Ohage la, ʼi te ʼu fenua ʼo te Potu Hahake ʼo Eulopa, neʼe fai te lisi ʼo tohi ai te ʼu higoa ʼo nātou ʼaē ʼe nātou talitali ke fai hanatou ako Tohi-Tapu. Ko te faʼahi ʼaia ʼe toe hoko pe foki ʼi te tahi ʼu potu fenua. ʼI te tahi kolo ʼo te République Dominicaine, ko te kau Fakamoʼoni e nima ʼe mole feala pe la tanatou fai te ʼu ako Tohi-Tapu ʼa te hahaʼi fuli ʼaē neʼe nātou fakaʼui age te faʼahi ʼaia. Koteā te meʼa ʼaē neʼe nātou fai? Neʼe nātou fakaloto mālohiʼi te hahaʼi ʼaē ʼe fia ako, ke nātou ʼolo ki te ʼu fono ʼi te Fale ʼo te Puleʼaga, pea ke nātou tohi tonatou higoa ʼi te lisi ʼo te ʼu ako Tohi-Tapu. ʼE lahi te ʼu fenua ʼi te kele katoa, ʼe hoko ai te ʼaluʼaga ʼaia.
15, 16. Koteā te meʼa ʼaē neʼe foaki mai moʼo faka mafola fakavilivili ʼo te ʼatamai mālama ʼo ʼuhiga mo te ʼAtua, pea koteā te ʼui ʼo ʼuhiga mo te faʼahi ʼaia?
15 Ko te ʼu telituale lalahi—te ʼu gāueʼaga lalahi ki te taʼukai—kua ava ki te hahaʼi ʼa te ʼAtua. Logope la te kaugamālie ʼo te kau gāue ʼaē neʼe fekauʼi e “te ʼAliki ʼo te taʼukai” ʼaē ko Sehova, ʼe kei lahi te gāue ʼaē ʼe tonu ke fai. (Mateo 9:37, 38) Koia, ke mafola fakavilivili te ʼatamai mālama ʼo ʼuhiga mo te ʼAtua, neʼe foaki mai e te ‘tagata kaugana’ te tohi ʼe nounou tona ʼu fakamatala pea mo mahino lelei, ke feala ai te tuputupu ʼo te ʼu ako Tohi-Tapu ʼi te faʼahi fakalaumālie, ʼi tanatou ako ʼaē ʼe fai ʼi te vāhaʼa fuli. Ko te tohi foʼou ʼaia ʼe feala ke fai ai te ʼu ako Tohi-Tapu ʼo mole fualoa—lagi ʼi he ʼu kiʼi māhina pe. Pea ʼe faigafua tona ai ki tatatou ʼu kato, ki tatatou kato taki, peʼe ki te ʼu tagaʼi kofu! Ko te lauʼi teau afe hahaʼi ʼaē neʼe nātou kau ki te Fakatahi Faka Tisitilike ʼa te kau Fakamoʼoni ʼa Sehova ʼaē ko tona kupu tāfito “Tou Vikiviki Fakafiafia,” neʼe nātou fiafia ʼaupito ʼi tanatou maʼu te tohi foʼou ʼaia ʼe pasina 192, ʼaē ko tona kupu tāfito ʼaenī Te ʼAtamai Mālama ʼAē ʼe Ina Taki Ki te Maʼuli Heʼegata.
16 Neʼe teuteuʼi e te ʼu hahaʼi faitohi ʼo te ʼu fenua kehekehe te ʼu koga kehekehe ʼo te tohi ʼaia, pea neʼe toe sivi fakalelei ʼo fakatahiʼi ʼi te tohi Te ʼAtamai Mālama. Koia ʼe ʼaoga anai te tohi ʼaia ki te ʼu fenua kehekehe. Kae neʼe loaloaga koa te fakaliliu ʼo te tohi foʼou ʼaia ʼi te ʼu lea ʼa te hahaʼi ʼi te malamanei katoa? Kailoa, koteʼuhi ko he tohi ʼe pasina 192 ʼe vave age tona fakaliliu ʼi te ʼu tohi ʼaē ʼe mātolu. ʼI ʼOketopeli 1995, neʼe tali e te Komite Faitohi ʼo te Kolesi Pule ke fakaliliu te tohi ʼaia mai te lea fakapilitānia ki te ʼu lea e 130 tupu.
17. Koteā te ʼu meʼa ʼaē ʼe faigafua ai tatatou fakaʼaogaʼi te tohi Te ʼAtamai Mālama?
17 Ko te ʼu puani kehekehe ʼo te ʼu kapite ʼo te tohi Te ʼAtamai Mālama ʼe tokoni anai ki te kau ako Tohi-Tapu ke vave tanatou tuputupu ʼi te faʼahi fakalaumālie. ʼE fakahā e te tohi te ʼu moʼoni faka Tohi-Tapu ʼe fakatupu lotomālohi. ʼE mole lahi tana talanoa ki te ʼu akonaki hala. Ko te mahino lelei ʼo te lea pea mo te fakaʼaluʼalu lelei ʼo te manatu, ʼe tonu ke ina faka faigafua ai te fakaʼaogaʼi ʼo te tohi ʼaia ʼi te ʼu ako Tohi-Tapu, pea mo tokoni ki te hahaʼi ke nātou mahino ki te ʼatamai mālama ʼo ʼuhiga mo te ʼAtua. ʼE ʼi ai te ʼu vaega kua ʼosi tohi, kae ʼe ʼi ai te tahi ʼu vaega ʼe feala ke vakaʼi ʼe ia ʼaē ʼe ina ako te Tohi-Tapu, mokā ʼe ina teuteuʼi tana ako. E lagi feala ke lau te ʼu vaega ʼaia ʼi te lolotoga ʼo te ako mo kapau ʼe maʼu he temi, kae ʼe lagi mole lelei anai ke hilifaki kiai he tahi ʼu puani, heʼe feala ke mole mahino ai pe koteā te ʼu manatu tāfito. Kae, ko nātou ʼaē ʼe nātou fai te ʼu ako Tohi-Tapu, ʼe tonu ke nātou mahino lelei ki te manatu ʼo te kapite takitahi, pea mo nātou fakamahino age kia ia ʼaē ʼe ako. Ko tona faka ʼuhiga ko ia ʼaē ʼe ina fai te ako ʼe ina ʼuluaki ako fakalelei muʼa te tohi, ke feala hana mahino lelei ki te ʼu manatu ʼaia.
18. Koteā te ʼu tokoni neʼe tuku mai ʼo ʼuhiga mo te fakaʼaogaʼi ʼo te tohi Te ʼAtamai Mālama?
18 ʼE lava feafeaʼi te fakahoko fakavilivili e te tohi Te ʼAtamai Mālama ʼAē ʼe Ina Taki Ki Te Maʼuli Heʼegata ia te gāue ʼaē ko te fai ʼo te ʼu tisipulo? Ko te tohi ʼaia ʼe pasina 192 ʼe feala ke ako ʼi he kiʼi temi nounou, pea ko nātou ʼaē “ ʼe lotolelei ki te maʼuli heʼegata” ʼe tonu anai ke feʼauga te ʼu meʼa ʼe nātou ako lolotoga tanatou ako, ke feala ai hanatou foaki tonatou maʼuli kia Sehova pea mo nātou papitema. (Gāue 13:48) Koia ke tou fakaʼaogaʼi fakalelei te tohi Te ʼAtamai Mālama ʼi te minisitelio. Kapau ko he tahi ʼe ina ako Tohi-Tapu, ka kua lahi he ʼu kapite kua ina ako ʼi he tahi tohi, ʼe lagi lelei anai tana fakaʼosi fuli te tohi ʼaia. Kae, kapau ʼe mole koia ʼaia, pea ʼe lelei ke hiki te ʼu ako Tohi-Tapu ki te tohi Te ʼAtamai Mālama. ʼI te ʼosi ʼo te tohi foʼou ʼaia, ʼe mole hoko anai te ako Tohi-Tapu ʼi he tahi age tohi. Ko nātou ʼaē kua nātou tali te moʼoni, ʼe feala ke nātou fakatuputupu tonatou ʼatamai mālama, ʼo nātou ʼolo ki te ʼu fono ʼa te kau Fakamoʼoni ʼa Sehova, mo nātou lau te Tohi-Tapu, pea mo tanatou ʼu tohi faka Tohi-Tapu kehekehe.—2 Soane 1.
19. ʼI muʼa ʼo te fai ʼo he ʼu ako Tohi-Tapu ʼi te tohi Te ʼAtamai Mālama, he koʼe ʼe lelei anai ke tou vakaʼi te ʼu pasina 175 ki te 218 ʼo te tohi Organisés pour bien remplir notre ministère?
19 Ko te tohi ʼaē ko Te ʼAtamai Mālama neʼe fai ʼaki te fakatuʼutuʼu ʼaē, ke tokoni ki he tahi ke feala hana tali ki te ʼu fehuʼi fuli ʼaē, ka vakaʼi anai e te ʼu tagata ʼāfea mo te kau fai faka mafola ʼaē kua fia papitema, ke nātou liliu ko he kau Fakamoʼoni ʼa Sehova. Koia, ʼi muʼa ʼo takotou fetogi te tohi ʼaē ʼe koutou lolotoga ako mo takotou ako Tohi-Tapu ʼo hiki ki te tohi foʼou ʼaia, ʼe lelei muʼa ke koutou fakaʼaogaʼi he kiʼi temi ke koutou vakaʼi ai te ʼu fehuʼi ʼaē ʼe tuʼu ʼi te ʼu pasina 175 ki te 218 ʼo te tohi Organisés pour bien remplir notre ministère.a Ko te faʼahi ʼaia ʼe tokoni anai kia koutou ke koutou fakatokagaʼi tāfito te ʼu tali ʼo te ʼu fehuʼi ʼaia, lolotoga te fai ʼo te ako Tohi-Tapu ʼi te tohi Te ʼAtamai Mālama.
20. Koteā te meʼa ʼe koutou fakatuʼutuʼu ke koutou fai ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata?
20 ʼE tonu ke logo te hahaʼi ʼi te ʼu potu fuli ki te logo lelei. ʼIo, ʼe ʼaoga ki te malamanei ia te ʼatamai mālama ʼo ʼuhiga mo te ʼAtua, pea ʼe ʼi ai te kau Fakamoʼoni ʼa Sehova ʼe nātou fakahā te faʼahi ʼaia. ʼI te temi nei kua tou maʼu te tohi foʼou neʼe foaki mai e tatatou Tāmai ʼofa ʼe ʼi selo, ʼaki te tagata kaugana agatonu mo poto. ʼE koutou fakaʼaogaʼi anai koa te tohi ʼaia moʼo akoʼi ʼo te moʼoni ki te hahaʼi, pea moʼo faka maʼuhigaʼi ʼo te huafa maʼoniʼoni ʼo Sehova? ʼE mahino papau ia ʼe tapuakina anai koutou e Sehova ʼi takotou faiga ʼaē ke koutou fakahā ki te tokolahi ia te ʼatamai mālama ʼaē ʼe ina taki ki te maʼuli heʼegata.
[Nota ʼi te lalo pasina]
a Neʼe tā e the Watchtower Bible and Tract Society of New York, Inc.
ʼE Feafeaʼi Anai Hakotou Tali?
◻ E feafeaʼi hakotou fakamahinohino te mafu fakatātā?
◻ Koteā te ʼatamai mālama ʼo ʼuhiga mo te ʼAtua?
◻ He koʼe ʼe ʼaoga ki te malamanei ia te ʼatamai mālama ʼo ʼuhiga mo te ʼAtua?
◻ Koteā te tohi foʼou ʼaē kua tou maʼu, pea ʼe feafeaʼi anai takotou fakaʼaogaʼi?
[Paki ʼo te pasina 10]
ʼE lahi te ʼu tupuʼaga ʼaē ʼe ʼaoga ai te ʼatamai mālama ʼo ʼuhiga mo te ʼAtua ki te lauʼi miliale hahaʼi ʼo te kele