Neʼe Tou Fiafia ʼi Te Fakahā ʼo Te Tohi Foʼou:
ʼE Ina Faka Maʼuhigaʼi Te ʼAtamai Mālama ʼo ʼUhiga Mo Te ʼAtua
1 ʼI tatatou fakatahi faka tisitilike ʼaenī kua hili, neʼe tou fiafia ʼi te polokalama katoa! ʼI te Moeaki hoʼatā neʼe lahi ʼaupito tatatou fiafia ʼi tatatou logo ki te talanoa ʼaē ʼo ʼuhiga mo te tohi foʼou, Te ʼAtamai Mālama ʼAē ʼe Ina Taki Ki Te Maʼuli Heʼegata, pea mo te fakamatala ʼaē neʼe hoa mai kiai. ʼE ʼaoga ki te lauʼi miliale hahaʼi te ʼatamai mālama ʼaē ʼe foaki mai e te ʼAtua—te ʼatamai mālama ʼo ʼuhiga mo te ʼAtua pea mo tona ʼAlo, ko Sesu Kilisito.—Taag. 2:1-6; Soane 17:3.
2 Neʼe fakahā fakalelei e te tēhina te ʼu koga kehekehe ʼo te tohi ʼaia! Ko te ʼu agaaga ʼo te tohi ʼe leleiʼia anai e nātou fuli ʼaē ka nātou lau, ohage la ko te ʼu kupu tāfito, tona ʼu lea fakatātā ʼaē ʼe ʼaoga, te fakahā lelei ʼo te moʼoni, te ʼu fehuʼi ʼe mole faigataʼa, pea, ʼi te fakaʼosi ʼo te ʼu kapite fuli, ʼe ʼi ai te talanoa ko tona kupu “Te Sivi ʼo Tokotou ʼAtamai Mālama.” Kae ko nātou ʼaē ʼe tou fai tanatou ako faka Tohi-Tapu, ʼe nātou maʼu tāfito anai te ʼu fua lelei, koteʼuhi ʼe nātou mahino vave anai ki te ʼu akonaki ʼo te Tohi-Tapu.
3 ʼI te ʼu akonaki fakaʼosi ʼo te Moeaki pea mo te ʼAhotapu, neʼe fakaloto mālohiʼi tatou ke tou fakaʼaogaʼi te tohi foʼou ʼaia moʼo fai te ako faka famili. ʼI te temi nei, kua lagi tou fakamāmāhani mo te ʼu kapite ʼo te tohi ʼaia. ʼE mahino ia neʼe koutou toe palalau foki ʼo ʼuhiga mo te ʼu puani ʼe koutou fakaʼaogaʼi anai ʼi te tohi foʼou ʼaia ʼi te fai faka mafola.
4 Te ʼu Puani Ke Fakamanatuʼi: E lagi koutou manatuʼi ko te tēhina ʼaē neʼe ina fai te akonaki ko tona kupu tāfito “He Koʼe ʼe ʼAoga Ki Te Malamanei Te ʼAtamai Mālama ʼo ʼUhiga Mo Te ʼAtua,” neʼe ina faka maʼuhigaʼi te ʼu puani kehekehe, ohage ko te ʼu puani ʼaenī: (1) Mokā koutou fakaʼaogaʼi te tohi ʼaenī moʼo fai ʼo te ʼu ako Tohi-Tapu, ʼe mole lelei takotou fakaʼaogaʼi he tahi ʼu tohi, heʼe mole koutou mahino anai ki te ʼu puani tāfito; kae ke koutou fakamahino tāfito te ʼu meʼa ʼaē ʼe tuʼu ʼi te ʼu kapite fuli ʼo te tohi. (2) ʼE mole loaloaga fau te ʼu kapite ʼo feala ai takotou fai he kapite e tahi ʼi te temi ʼaē ʼe koutou fai ai te ako. (3) ʼI te fakaʼosi ʼo te ʼu kapite fuli, ʼe tokoni atu anai te ʼu fehuʼi ʼo te talanoa “Te Sivi ʼo Tokotou ʼAtamai Mālama” ke koutou tāʼofi ai te manatu tāfito.
5 Tou Fakaʼaogaʼi ʼi Te ʼu Ako Tohi-Tapu: ʼE lahi te ʼu kau faka mafola ʼe nātou fia ʼiloʼi peʼe feala hanatou fetogi te tohi ʼaē ʼe nātou fai ai tanatou ʼu ako Tohi-Tapu ʼaki te tohi foʼou ʼaia. Kapau neʼe koutou fai te ako ʼi he tohi ʼo aʼu mai ki te temi nei, ʼe lelei anai takotou fakaʼosi te ako ʼo te tohi ʼaia. ʼI te tahi faʼahi, ʼe kole atu ke hiki takotou ako ki te tohi ʼAtamai Mālama. Kapau neʼe koutou fakaʼaogaʼi he kaupepa peʼe ko he kiʼi pepa lotu moʼo kamata ʼo te ako faka Tohi-Tapu, ʼe feala hakotou fakahā te tohi foʼou ʼaia ʼi te temi ʼaē ʼe ʼaoga ai pea ke koutou fakaʼaogaʼi moʼo fai ʼo te ako faka Tohi-Tapu. ʼE fakahā anai te tahi ʼu puani ʼo ʼuhiga mo te fakaʼaogaʼi ʼo te tohi ʼAtamai Mālama, ʼi tatatou Minisitelio ʼo Te Puleʼaga ʼi te ʼu māhina ʼaē ka hoa mai.
6 Neʼe foaki mai e Sehova te tohi foʼou ʼaia, moʼo tokoni kia tatou ke tou akoʼi niʼihi ke nātou maʼu te ʼatamai mālama ʼaē ʼe ina taki ki te maʼuli heʼegata. ʼI te temi nei ʼe ʼaoga ke tou teuteu fakalelei ke tou kau katoa ki te gāue ʼaē ʼe kei toe ke fai.