Te Tali Ki ʼAkotou ʼu Fehuʼi

◼ Koteā te ʼu tohi ʼaē ʼe feala ke tou vakaʼi mo he ʼu hahaʼi foʼofoʼou ʼi muʼa ʼo tonatou papitema?

ʼI muʼa ʼo tana foaki tona maʼuli kia Sehova pea mo tana papitema, ʼe tonu ke maʼu e he tahi te ʼatamai mālama totonu. (Soane 17⁠:⁠3) ʼE ina maʼu anai te ʼatamai mālama ʼaia ʼaē ʼe ʼaoga kia ia mokā ina ako anai te ʼu meʼa e lua, ko te kaupepa Koteā ʼAē ʼe Fakamaʼua Mai e Te ʼAtua Kia Tatou? pea mo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. ʼI te agamāhani, ʼe vakaʼi muʼa te kaupepa Fakamaʼua. Kae kapau neʼe kua kamata te ako ʼaki te tohi Te ʼAtamai Mālama, pea ʼosi ʼaia pea vakaʼi leva te kaupepa Fakamaʼua. Koteā tona tupuʼaga?

Ko te kaupepa Fakamaʼua ʼe ina fakahā te ʼu akonaki tāfito ʼo te Tohi-Tapu. Kapau ʼe ʼuluaki vakaʼi muʼa te tohi ʼaia, pea ʼe mahino ai anai ki te kau ako te ʼu meʼa tāfito ʼaē ʼe fakamaʼua mai e Sehova. Kae kapau ʼe vakaʼi fakamuli te kaupepa ʼaia, pea ʼe ko he fealagia anai ke tou toe vakaʼi te ʼu meʼa ʼaē neʼe ina ako ʼi te tohi Te ʼAtamai Mālama. Peʼe ʼuluaki fai peʼe fai fakamuli te kaupepa ʼaia, kae koutou fakaloto mālohiʼi te kau ako ke nātou lau te ʼu vaega Tohi-Tapu ʼaē ʼe tuʼu ai pea ke nātou metitasioʼi. Koutou talanoa ki te ʼu paki, heʼe ko he ʼu meʼa ako lelei.​—Koutou vakaʼi Te Tule Leʼo ʼaho 15 ʼo Sanualio 1997, ʼi te pasina 16 ki te 17.

Kapau kua ina ako te ʼu tohi ʼaia e lua, pea ʼe feala anai ke ina tali ki te ʼu fehuʼi fuli ʼaē ka fai age ki ai e te ʼu tagata ʼāfea ʼi tana teuteuʼi te papitema. Kapau koia, pea ʼe mole ʼaoga ke tou toe ako mo ia he tahi age tohi, kae ko ia ʼaē ʼe ina fai tana ako ʼe kei tonu ke ina vakaʼi peʼe haʼele ki muʼa.​—Koutou vakaʼi Te Tule Leʼo ʼaho 15 ʼo Sanualio 1996, ʼi te pasina 14 mo te 17.