Te Tali Ki ʼAkotou ʼu Fehuʼi

◼ Koteā te ʼu tohi e lua ʼaē ʼe tonu ke ako e tatatou kau ako Tohi-Tapu?

Ko te tohi Te Ako Mai Te Tohi-Tapu, ʼe ko te tohi tāfito ʼaia moʼo kamata pea mo fai ia te ʼu ako Tohi-Tapu. Logolā ʼe mole tapu ia te fakaʼaogaʼi ʼo he tahi tohi, ohagē ko he kiʼi pepa lotu, moʼo kamata he ako. Kae ʼe tonu ke tou foimo kamata ia te ako ʼaki te tohi Te Ako Mai Te Tohi-Tapu. Neʼe maʼu te ʼu fua lelei fakaofoofo ʼaki te fakaʼaogaʼi ʼo te tohi Te Ako Mai Te Tohi-Tapu moʼo kamata he ʼu ako.

ʼI te kua ʼosi ʼo te tohi Te Ako Mai Te Tohi-Tapu pea mo tuputupu ia ia ʼaē ʼe ako, ʼe tonu leva ke fai te ako ki te tohi Koutou Atolasio Ki Te ʼAtua. (Kol. 2:7) ʼI te pāsina 2, ʼe fakamahino fēnei ia te fakatuʼutuʼu ʼo te tohi ʼaia: “Ko te Tohi-Tapu ʼe ina fakaloto mālohiʼi te hahaʼi fuli ʼaē ʼe nātou ʼoʼofa ki te ʼAtua, ‘ke nātou mahino . . . [ki te] māʼoluga pea mo te loloto’ ʼo tona ʼu moʼoni maʼuhiga. (Efeso 3:18) Neʼe teuteuʼi te tohi ʼaenī ki te faʼahi ʼaia. ʼE mātou fakaʼamu ʼe tokoni atu anai ke koutou tuputupu ʼi te faʼahi fakalaumālie, pea mo koutou maʼu te ʼu meʼa fuli ʼaē ʼe lava tokoni atu ʼi takotou haʼele ʼi te ala fāveliveli, ʼaē ʼe ina taki ki te mālama foʼou pea mo faitotonu ʼa te ʼAtua.”

Kapau kua feala kiā ia ʼaē ʼe ako ke papitema kae ʼe mole heʼeki ʼosi te ʼu tohi ʼaia ʼe lua, ʼe feala ke hoko atu ia te ako ke fakaʼosi lelei ia te ʼu tohi ʼaia. Tatau aipē pe kua papitema, kae ʼe feala ke tohi e ia ʼaē ʼe ina fai ia te ako ia te hola, te ʼaʼahi, pea mo te ako Tohi-Tapu. Ko ia ʼaē ʼe hoa mo ia ʼaē ʼe ina fai te ako pea mo kau kiai, ʼe feala ke ina toe tohi mo ia te hola.