ʼE Feafeaʼi Hakotou Fakaʼaogaʼi Ia Te Tohi “Te ʼOfa ʼo Te ʼAtua” Moʼo Fai ʼo He ʼu Ako Tohi-Tapu?
1. He koʼē neʼe fai ia te tohi “Te ʼOfa ʼo Te ʼAtua”?
1 Neʼe lagi kotou fiafia ʼi tatatou Fakatahi Fakatisitilike “Neʼe Takitaki e Te Laumālie ʼo Te ʼAtua” ʼaē neʼe tou maʼu ai ia te tohi foʼou “Kotou Haga Nonofo ʼi Te ʼOfa ʼo Te ʼAtua”! Ohagē ko tona tala ifo, ko te tohi ʼaia neʼe fai moʼo tokoni mai kiā tātou ke tou ʼiloʼi pea mo ʼofa ki te ʼu lēkula ʼa Sehova ʼo ʼuhiga mo te aga ʼaē ʼe tonu ke fai kae neʼe mole fai moʼo akoʼi mai ia te ʼu akonaki tāfito ʼo te Tohi-Tapu. ʼE mole tonu anai ke tou tufa ia te tohi ʼaia ʼi te fai fakamafola ʼi te ʼu ʼapi.
2. ʼE fakaʼaogaʼi feafeaʼi anai ia te tohi ʼaia, pea mo ai?
2 Ko te tohi ʼaia ʼe fakaʼaogaʼi anai ko te lua tohi ʼaē kā fai anai maʼa te kau ako Tohi-Tapu ʼi te hili ʼo te fai kātoa ʼo te tohi Te Ako Mai Te Tohi-Tapu. Kotou haga manatuʼi ʼe tahi ʼalu pē ia te tagata ʼi tana tuputupu ʼi te faʼahi fakalaumālie. ʼI te ako takitahi ʼe tonu anai ke fai ʼo mulimuli ki te tuputupu ʼo ia ʼaē ʼe ako. Kotou faiga ke kotou ʼiloʼi peʼe kua mahino lelei ia ia ʼaē ʼe ako ki te ʼu manatu ʼaē ʼe ina akoʼi. ʼE lahi te ʼu ʼaluʼaga, ʼe mole tonu ke fakaʼaogaʼi ai ia te tohi ʼaia moʼo kamata ʼo he ʼu ako Tohi-Tapu pea mo te hahaʼi ʼaē neʼe kua lagi lahi ia te ʼu tohi ʼaē neʼe kua natou ako ʼi te ʼu temi ki muʼa atu kae mole natou kau ki te ʼu fono ʼo te kōkelekāsio pea mo hā lelei ia tanatou mole fia fakaʼalutahi ia tonatou maʼuli pea mo te ʼu moʼoni Fakatohi-tapu ʼaē neʼe natou ako.
3. Koteā ʼaē ʼe tonu ke tou fai mo kapau ʼe tou lolotoga fai nei ia he ako ki te tohi Koutou ʼAtolasio Ki Te ʼAtua?
3 Kapau ʼe kotou lolotoga fai nei ia he ako ki te tohi Koutou ʼAtolasio Ki Te ʼAtua pea ʼe mole kei lahi ia te ʼu kāpite ʼaē ʼe kei toe, ʼe lagi kotou fakatuʼutuʼu anai ke kotou fai kātoa ia te tohi ʼaia pea mo kotou fakalotomālohiʼi ia takotou ako ke ina lau e ia totonu ia te tohi “Te ʼOfa ʼo Te ʼAtua.” Pea kapau ʼe mole koia, ʼe lagi lelei takolua hiki ia takolua ako ki te tohi foʼou pea kolua kamata mai te kamataʼaga. Ohagē pē ko te tohi Te Ako Mai Te Tohi-Tapu, ʼe mole ʼaoga anai hakotou vakaʼi ia te ʼu fai palalau fuli ʼaē ʼe tuʼu ʼi te tahi ʼu fakamahino.
4. Koteā ʼaē ʼe tonu ke kotou fai mo kapau ko ia ʼaē ʼe ako ʼe papitema kae mole heʼeki ʼosi tana ako ia te ʼu tohi Te Ako Mai Te Tohi-Tapu pea mo te tohi “Te ʼOfa ʼo Te ʼAtua”?
4 Kapau ko ia ʼaē ʼe ako ʼe papitema kae mole heʼeki ʼosi tana ako ia te ʼu tohi ʼaia e lua, ʼe tonu anai ke hoko atu ia tana ako ʼo kaku ki te ʼosi ʼo te tohi “Te ʼOfa ʼo Te ʼAtua.” Tatau aipē peʼe kua papitema ia ia ʼaē ʼe ako, ʼe kotou tohi anai te hola, mo te ʼaʼahi pea ko te ako. Ko te kaugā fagona ʼaē ʼe hoa mo koutou pea mo kau ki te ako ʼe ina toe tohi anai mo tona hola.
5. ʼE feafeaʼi he fakaʼaogaʼi ʼo te tohi “Te ʼOfa ʼo Te ʼAtua” moʼo tokoni ki he kaugā fai fakamafola ʼe mole kau tuʼumaʼu ki te minisitelio?
5 Kapau ʼe hinoʼi koutou e he tahi ʼi te Komitē Gāue ʼo Te Kōkelekāsio ke kotou fai ia he ako Tohi-Tapu mo he tahi kua vaivai ʼi te gāue fai fakamafola, ʼe lagi kole atu ke kolua vakaʼi ia he ʼu kāpite tāfito ʼo te tohi “Te ʼOfa ʼo Te ʼAtua.” Ko te ʼu taʼi ako ʼaia ʼe mole ʼaoga ke fai ʼi he temi loaloaga. ʼI fakatuʼutuʼu lelei ʼaupitō leva ʼe tou maʼu ʼi te tohi foʼou ʼaenī, ʼaē neʼe fai moʼo tokoni mai kiā tātou ke tou nonofo ʼi “te ʼofa ʼo te ʼAtua”!—Suta 21.