Te ʼu Ako Tohi-Tapu ʼe Kamata ʼi Te Gutu Matapā Pea Mo He ʼu Ako Tohi-Tapu ʼe Fai ʼi Te Telefoni
1. Koteā ʼaē ʼe tou fakaʼamu kiai mokā tou fai ni ʼu ako Tohi-Tapu?
1 ʼE ko he meʼa fakafiafia mokā kita kamata he ako Tohi-Tapu! Kae ko te maʼu ʼo he tahi ʼe ina fia ako ia te Tohi-Tapu, ʼe ko te kamataʼaga pe ʼaia. Ko te ako ʼe fai moʼo tokoni ki ʼaē ʼe ina ako te Tohi-Tapu ke liliu ko he tisipulo moʼoni ʼa Kilisito. (Mat. 28:19, 20) Koteā ʼaē ka tokoni mai kiā tatou ke tou fai ia te faʼahi ʼaia?
2. E feafeaʼi te fai ʼo he ako Tohi-Tapu ʼi te gutu matapā peʼe ʼi te telefoni, pea he koʼe ʼe ko he faʼahiga fai ʼe lelei?
2 Te Hahaʼi ʼAē ʼe Maʼumaʼua: Ko te hahaʼi ʼi te temi nei ʼe nātou maʼumaʼua ʼaupito. ʼI ʼihi fenua, tokosiʼi te hahaʼi ʼaē ʼe nātou tali ʼi te kamata, ke fai hola kātoa tanatou ʼu ako Tohi-Tapu. Moʼo tokoni ki te faʼahiga hahaʼi ʼaia, neʼe fakaloto mālohiʼi tatou ke tou kamata pea mo fai ni ʼu ako Tohi-Tapu ʼi te ʼu gutu matapā peʼe ʼi te telefoni. ʼI te kamata, ʼe fai fakanounou anai ia te ʼu ako ʼaia pea ʼe mole tou vakaʼi fuli anai te ʼu vaega Tohi-Tapu ʼaē ʼe tuʼu ʼi he palakalafe e tahi peʼe lua ʼo te tohi, ohage ko te tohi Te Ako Mai Te Tohi-Tapu. ʼE feala hatatou fakavikiviki ki te kau fai faka mafola ʼaē kua nātou fai ʼi te temi nei te ʼu ako Tohi-Tapu ʼaiaʼi te ʼu gutu matapā peʼe ʼi te telefoni!
3. He koʼe ʼe tonu ke tou faiga ke faka fuafualoa te ako ʼaē ʼe fai ʼi te gutu matapā?
3 Kae ʼe tonu koa ke hoholo atu pe tata fai ia te ako ʼi te gutu matapā? Kailoa. Logola ʼe mole ko he aga fakapotopoto anai ʼi te kamata, ke kita nofo fualoa moʼo fai ia te ako ʼi te gutu matapā, kae koʼeni te tokoni ʼaē ʼe tou maʼu ʼi Te Minisitelio ʼo Te Puleʼaga Fakafalani ʼo te māhina ʼo Maio 1990 ʼi te pasina 8: “Kapau kua haʼele lelei te ako Tohi-Tapu ʼa he tahi pea kua lahi tana fia mahino, pea ʼe feala ke koutou faka fuafualoa atu te fai ʼo te ako.” ʼE maʼuhiga ke tou fai feiā. Tou toʼo he fakatā: ʼE feala ki he tamasiʼi pakupaku ʼi te kamata ke fafaga veliveli pe, ʼo aʼu ki te fakahaʼuhaʼu ʼo tana fia kai, kae ʼe mole feala anai ke ina toe maʼu tona mālohi kātoa pea mo haga lahilahi ake, mo kapau ʼe fafaga veliveli pe ia lolotoga ni ʼu māhina. ʼO toe feiā ki te fai ʼo ni ʼu tisipulo, ʼe lelei age anai te fai tuʼumaʼu ʼa he ako Tohi-Tapu ʼi he ʼaho kua tukupau, ke feala hana liliu ko he kaugana ʼa te ʼAtua ʼe mālohi ʼi te faʼahi fakalaumālie.—Hep. 5:13, 14.
4. Koteā te ʼu fua lelei ʼe tou maʼu mo kapau ʼe tou fai he ako Tohi-Tapu ʼi tona loto fale?
4 Te ʼu Ako Tohi-Tapu ʼAē ʼe Fai ʼi Te ʼu Loto Fale: ʼE lelei age ke fai he ako Tohi-Tapu ʼi te loto fale peʼe ʼi he faʼahi ʼe lava fai ai. ʼE faigafua hana ako pea mo toe lahi age anai tana mahino ki te Folafola ʼa te ʼAtua. (Mat. 13:23) ʼI te faʼahiga fai ʼaia, ʼe feala anai kiā ia ʼaē ʼe ina fai ia te ako, ke ina ʼiloʼi lelei ia te ʼu faʼahi ʼaē ʼe ʼaoga kiā ia ʼaē ʼe ako Tohi-Tapu. Tahi ʼaē, ka fuafualoa te fai ʼo te ako pea ʼe feala kiā ia ʼaē ʼe ako ke ina vakaʼi fakalelei te Folafola ʼa te ʼAtua pea mo maʼu ai he tui ʼe mālohi.—Loma 10:17.
5. E feafeaʼi hatatou takitaki te ako ʼaē ʼe tou fai ʼi te gutu matapā ke tou fai ʼi tona loto fale?
5 Koteā ʼaē ʼe feala ke koutou fai ke liliu te ako ʼaē ʼe koutou fai ʼi te gutu matapā ko he ako ʼe koutou fai ʼi te loto fale? Hili he ʼu ako nounou kua koutou fai liuliuga, he koʼe ʼe mole koutou kole age ke fuafualoa atu te fai ʼo tana ako, ʼo tukupau te temi ʼaē ka fai ai? Peʼe koutou fehuʼi fakahagatonu age: “ ʼE mole ke loto koa ʼi te ʼaho nei ke tā heheka muʼa pea mo fai palalau ki te faʼahi ʼaenī?” peʼe koutou fehuʼi fēnei age: “ ʼI te ʼaho nei, ʼe ke loto ke minuta fia tatā fai palalau?” Kapau ʼe mole heʼeki loto ia ki te faʼahi ʼaē ʼe koutou fakaʼui age, koutou haga fai pe tana ʼu ako Tohi-Tapu ʼaē ʼe fai fakanounou ʼi te gutu matapā. ʼI he tahi temi faigamālie, koutou toe fakaʼui age ke fai tana ako ʼi tona loto fale.
6. Koteā tatatou fakatuʼutuʼu ʼi tatatou minisitelio, pea ʼe lava tokoni feafeaʼi mai te ʼu tokoni ʼo te alatike ʼaenī ke lava ia te fakatuʼutuʼu ʼaia?
6 Tou haga kumi te hahaʼi ʼaē ʼe tuha mo nātou ia te logo lelei, ʼo tou fakatuʼutuʼu ke tou kamata he ʼu ako Tohi-Tapu. ʼE tou fakatuʼutuʼu ke tou tokoni ki te hahaʼi fakamalotoloto ke nātou liliu ko ni ʼu kaugana ʼa Sehova ʼe nātou momoli tonatou maʼuli kiā te ia pea mo nātou papitema. ʼOfa pe ke ina tapuakina tatatou ʼu faiga moʼo fai ia te fakatuʼutuʼu ʼaia ʼi tatatou minisitelio.—2 Tim. 4:5.