Tou Tokakaga Ki Te Manavaʼofa ʼAē ʼe Mole Totonu
1 ʼE ʼiloa te kau Fakamoʼoni ʼa Sehova ʼuhi ko tonatou manavaʼofa pea mo tonatou agaʼofa. ʼE hā tuʼumaʼu te faʼahi ʼaia mokā ʼe tou faʼifaʼitaki ki te Samalita agalelei ʼaē neʼe palalau kiai Sesu ʼi tana lea fakatātā. (Luka 10:29-37) Kae, ko ʼihi ʼaē ʼe mole tau mo nātou he tokoni fakasino e lagi ʼe nātou faiga ke nātou maʼu he ʼu lelei ʼo totatou manavaʼofa. Koia ko totatou ʼofa ʼaē ki ʼihi ʼe tonu ke fakafuafua ʼaki te “ ʼatamai mālama totonu pea mo te fakapotopoto katoa.”—Filp. 1:9.
2 ʼI Te Kokelekasio: Ohage la, ko he tahi ʼe ʼui maʼana ʼe mole hana gāue peʼe ina fakahā mai niʼihi ʼu tupuʼaga ʼo tana kole tokoni. ʼI te temi ʼaia ko nātou ʼaia ʼe mole nātou kumi hanatou gāue kae ʼe nātou loto pe ke foaki age te ʼu meʼa ʼe ʼaoga ki tonatou maʼuli fakasino e niʼihi. Neʼe fakatotonuʼi age e te ʼapositolo ko Paulo ki te kau ʼapositolo takitokotahi: “Ka mole fia gāue he tahi, ke mole kai.”—2 Tes. 3:10.
3 “Ko te ʼu temi pea mo te ʼu meʼa fakafokifā” ʼe hoko kia tatou fuli, koia kapau ʼe mole tou maʼu te ʼu meʼa fakasino, “tatatou pane ki te ʼaho ʼaenī,” ʼe mole tonu anai ke lahi tatatou tuʼania, koteʼuhi ʼe tokaga ia Sehova kia nātou ʼaē ʼe ʼoʼofa kia te ia pea mo nātou fai tona finegalo. (Tnk. 9:11; Mat. 6:11, 31, 32) Ko he tahi ʼe ʼaoga kia ia he tokoni ʼe feala ke ʼalu ʼo palalau mo he tahi ʼi te ʼu tagata ʼāfea. E lagi ʼe ʼiloʼi e te ʼu tagata ʼāfea he ʼu fakatuʼutuʼu faka puleʼaga ʼo ʼuhiga mo te foaki tokoni ki te hahaʼi pea e lagi feala ke nātou tokoni ki ai ʼo ʼuhiga mo te fai ʼo te ʼu pepa peʼe ko te fakamahino ʼo te ʼu fakatuʼutuʼu. Kapau ʼe hoko he faʼahi, ʼe feala ke fakasiosio e te ʼu tagata ʼāfea te ʼu ʼaluʼaga ʼo nātou ʼaē ʼe kole tokoni pea mo fakatuʼutuʼu pe koteā te meʼa ʼe tonu ke fai.—Vakaʼi ia 1 Timoteo 5:3-16.
4 Ko Te Hahaʼi Feʼaluʼaki Aga Kākā: ʼE hoholo atu te maʼu e te Sosiete te ʼu fakamatala ʼe fakahā ai ko ʼihi ʼi te ʼu kokelekasio neʼe kaihaʼa tanatou falā pea mo tonatou ʼu koloā e te ʼu hahaʼi feʼaluʼaki aga kākā. Ko te meʼa ʼe mole fakapuna’maʼuli kia tatou, koteʼuhi ʼe talanoa te Tohi-Tapu ki te “kau tagata agakovi pea mo te ʼu tagata aga kākā ʼe nātou laka tuʼumaʼu pe anai ʼo ʼāsili age ki te kovi, ʼo kākāʼi, pea ʼe kākāʼi ia nātou.” (2 Tim. 3:13) Ko te ʼu tagata aga kākā ʼaia ʼe nātou tautau fakahāhā ʼe nātou māsisiva pea ʼe ʼaoga ke nātou maʼu he falā moʼo totogi ʼo tanatou meʼa kai pea mo tanatou liliu ki tonatou ʼapi. Tatau aipe peʼe nātou fakamalotoloto, kae tokolahi ʼi te ʼu hahaʼi aga kākā ʼe ʼui maʼa nātou ko nātou ko te kau Fakamoʼoni ʼa Sehova kae ko tanatou loi.
5 Kapau ko he tahi ʼe kole tokoni, ʼe lelei anai ke fakahā te faʼahi ʼaia ki he tagata ʼāfea ʼo te kokelekasio, ke feala ai hana fakasiosio lelei pe ko ia ʼaia ko hotatou tēhina. ʼE feala pe ke telefoni ki he tagata ʼāfea ʼo tana kokelekasio ke feala hatatou ʼiloʼi peʼe moʼoni te meʼa ʼaē ʼe ina fakahā mai. Ko te ʼu tēhina mo te ʼu tuagaʼane ʼaē ʼe fokifā pe kua tō ki te faigataʼaʼia ʼaia ʼe mahino anai kia nātou ko te ʼu taʼi kumi ʼaia ʼe fakatuʼutuʼu moʼo hāofaki ʼo nātou ʼaē ʼe kau kiai. Tahi ʼaē meʼa, ʼe sivi fakalelei anai te ʼu palalau ʼa te ʼu hahaʼi aga kākā. ʼE mole ʼaoga ia ke lahi fau tatatou nofo tokaga kia nātou ʼaē ʼe kole tokoni, kae ʼe tonu ke tou tokakaga ki te kau agakovi aga kākā.
6 Neʼe fakatokagaʼi e te Hau poto ko Salomone: “ ʼAua naʼa ke fakafisi te lelei kia nātou ʼaē ʼe tonu ke foaki ki ai, mo kapau e fealagia e tou nima ke ina fai.” (Taag. 3:27) ʼAki tatatou fakasiosio poto, ʼe feala ke hoko atu tatatou agaʼofa ʼo tou tokakaga ki te manavaʼofa ʼaē ʼe mole totonu.