Koutou Taupau Maʼu Te Fakahā ʼo Takotou Falala Ke ʼAua Naʼa Koutou Higa
1 Ko te ako ʼo Te Tule Leʼo ʼe ko te faʼahi tāfito ʼaia ʼe foaki mai ai e te ʼAtua “te meʼa kai ʼi te temi totonu” ki tana hahaʼi ia ʼaho nei. (Mat. 24:45) ʼE tou kau ki te fono maʼuhiga ʼaia mo tatatou ʼu fakatuʼutuʼu e lua—ke tou tuputupu fakalaumālie pea ke tou fakahā tatatou falala ki niʼihi.—Hep. 10:23-25.
2 Ke Tou Maʼu Hona Fua Lelei: Neʼe fakahā ʼe lahi te ʼu kokelekasio neʼe tokosiʼi ia nātou ʼaē ʼi te fono neʼe teuteuʼi fakatomuʼa tanatou ako. ʼE teitei tatau pe mo te lahi ʼo nātou ʼaē ʼe tali ʼi te fono. Ko te meʼa kai fakalaumālie mālohi ʼaē ʼe haʼu mai te Ako ʼo Te Tule Leʼo ʼe mole feala he mahino katoa kiai lolotoga te fono. ʼE ʼaoga ke koutou fakatuʼutuʼu he temi ke koutou teuteuʼi fakatomuʼa ai te alatike ʼaia.
3 Mokā koutou teuteuʼi te alatike, e lagi ʼe feala ke kamata ʼaki takotou lau pea ke koutou fakakaukauʼi te ʼu fehuʼi ʼi te fakaʼosi ʼo te alatike. Ko te ʼu faʼahi ʼaia ʼe feala ke tokoni kia koutou ke koutou mahino ki te ʼu puani tāfito ʼo te alatike.
4 Lolotoga te ako ʼo Te Tule Leʼo ʼe tonu ke koutou fakalogo lelei ki te meʼa ʼe talanoa kiai. Koutou tokagaʼi te ʼu ʼuluaki palalau ʼa ia ʼaē ʼe ina taki te ako; ko te ʼu manatu ʼaia ʼe fakatafito kiai te ako. ʼE feala ke ina lagaʼi he ʼu fehuʼi e tolu peʼe fā ʼe tali kiai te alatike, peʼe feala ke ina toe vakaʼi he ʼu manatu tāfito ʼo te ako ʼo te vāhaʼa kua hili mo kapau ko te alatike ʼo te vāhaʼa ʼaenī ʼe ʼalutahi mo te alatike ʼaia. Kapau ʼe ʼaoga ke fakatonutonu tatatou mahino ki he lea faka polofeta peʼe ko he fakatuʼutuʼu faka Tohi-Tapu, ʼe ina fakatokagaʼi anai tatou ki te faʼahi ʼaia. ʼIo, ko te ʼu fakamatala ʼaē ʼe fai e ia ʼaē ʼe ina taki te ako ʼe tonu ke nounou, koteʼuhi ko te fakatuʼutuʼu ʼo te ako ko te faka fealagia ki te kokelekasio ke ina fakahā tana falala. Koutou fakalogo fakalelei ki te ʼu tali ʼa ʼihi ʼo ʼuhiga mo te meʼa neʼe nātou akoʼi; ko te faʼahi ʼaia ʼe feala ke tokoni kia koutou ʼo ʼuhiga mo te fakaloto mālohiʼi ʼo takotou tui.
5 Fakahā Takotou Falala: ʼE koutou fai tuʼumaʼu koa he ʼu tali ʼi te ako? Ko te ʼu tali nounou, mo totonu ʼe lelei age ia. (Vakaʼi ia Luka 21:1-4.) Ko he tali ʼe haʼu mai te loto ʼe leleiʼia e te kaugamālie. ʼI te fai māhani ko te ʼuluaki tali ki he fehuʼi ʼe tonu ke fakanounou pea mo fakahagatonu. Ko te faʼahi ʼaenī ʼe faka fealagia ki niʼihi ke nātou lau he vaega faka Tohi-Tapu peʼe ko te talanoa ki he manatu ʼo te palakalafe. ʼAki te faʼahi ʼaia tokolahi ʼe feala ke nātou fakahā tanatou falala ki te hahaʼi. Ko te ʼu tali ʼe tonu ke ʼaoga pea mo fakaloto mālohi.
6 Kapau ʼe koutou foʼofoʼou mai ki te ako peʼe koutou umiuminoa ʼi te fai ʼo hakotou tali, e lagi ʼe koutou fia ʼalu kia ia ʼaē ʼe ina taki te ako ke tokoni atu kia koutou. Koutou kole age ke ina tokagaʼi te hiki ʼo tokotou nima mokā fai te fehuʼi ʼo he palakalafe. E lagi ʼe feala pe hakotou lau he vaega faka Tohi-Tapu pea mo fakamahino fakanounou tona ʼuhiga. E lagi lelei ke koutou tohi he ʼu manatu ʼi takotou Tule Leʼo moʼo tokoni kia koutou ke koutou manatuʼi te meʼa ʼe koutou fia talanoa ki ai mokā fai hakotou tali. Kapau ko koutou ko he tūpulaga, koutou manatuʼi ko ʼakotou ʼu manatu ʼe tali fakalelei pea mo leleiʼia.—Mat. 21:16.
7 ʼE maʼuhiga ke tou fakahā tatatou tui, pea ko te ako ʼo Te Tule Leʼo ʼe ina tuku mai he faigamālie moʼo fai ʼo te faʼahi ʼaia. Kapau ʼe koutou lotolotolua ʼi te fai ʼo hakotou tali, koutou fai te meʼa ʼe koutou fealagia moʼo tauʼi ʼo te faigataʼa ʼaia, pea ke koutou fai hakotou tali pe e tahi. ʼE koutou kau anai ki te fono, pea ʼe lave lelei anai kia koutou. Koia he koʼe koa ʼe mole koutou fai hakotou fakatuʼutuʼu ke fai hakotou tali e tahi ʼi te ako ʼo Te Tule Leʼo ka hoko mai?—Taag. 15:23.