Tou Tokaga ʼo Tali Lelei Ia Nātou ʼAē ʼe ’Ōmai Ki Te Memoliale
1 ʼI he ʼu taʼu kua hili, neʼe gata pe ki te 1 ʼi te toko 3 hahaʼi neʼe kau ki te Memoliale neʼe ko he kaugā faka mafola ʼo te logo lelei. ʼE toe feiā pe anai ʼi te taʼu ʼaenī. Ko ʼihi ʼe feala tanatou kau ki te toʼotoʼoga ʼaia he neʼe fakaafe mai nātou ʼe honatou kāiga peʼe ko he tahi ʼe nātou ʼiloʼi ʼe nofo ʼi he tahi faʼahi, ka ko ʼihi neʼe fakaafe mai e te kau fai faka mafola ʼo te kokelekasio. Ko ʼihi ʼe kau ki te toʼotoʼoga ʼaia, logope la kua nātou papitema, ka mole kei nātou gāue ʼi te minisitelio. ʼE tou tali fakamalotoloto ia nātou fuli ʼaē ʼe nātou fakahā tanatou fakaʼapaʼapa ki te fakatotonu ʼa Sesu: “Koutou haga fai te meʼa ʼaenī moʼo fakamanatu kia te ʼau.”—1 Ko. 11:24; Lom. 15:7.
2 Ko nātou ʼaē neʼe hinoʼi ki te fakatalitali ʼo te hahaʼi ʼe tonu ke nātou fakamālo kia nātou fuli ʼaē ʼe ʼōmai, tāfito ki te hahaʼi ʼaē ʼe hoki ʼōmai, ʼi tanatou aʼu mai ki te Fale ʼo te Puleʼaga. Kae, ko tatou fuli ʼe feala ke tou muliʼi te ʼofa tali kāiga ʼi te Memoliale. (Lom. 12:13) ʼO feafeaʼi koa?
3 ʼI te afiafi ʼaia ʼe maʼumaʼua anai he ʼu kaugā faka mafola ʼi tanatou fetuku mai te hahaʼi ʼaē ʼe fia logo. Ko ʼihi ʼe feala ke nātou ʼōmai fakatomuʼa pea ke nātou fakatalitali ia nātou ʼaē ʼe ʼōmai takitokotahi. ʼI te hū mai ʼa he tahi ki te fale, tou tali fakafiafia ia ia pea tou kamata fai palalau mo ia. Tou fehuʼi age ki ai peʼe ina ʼiloʼi he tahi ʼi te ʼu tēhina. Kapau koia ʼaia, tou tokaga ki ai ʼo aʼu ki te temi ʼe haʼu ai te tēhina pe ko te tuagaʼane ʼaē ʼe ina ʼiloʼi. (Vakaʼi ia Luka 10:35.) Kapau ʼe mole ina ʼiloʼi he tahi, he koʼe ʼe mole koutou fakaafe ia ia ke heka fakatahi mo koutou lolotoga te fono? Koutou fakamahino age ki ai peʼe feafeaʼi te fakaʼaogaʼi ʼo te vino pea mo te pane ʼi te toʼotoʼoga. E lagi ʼaoga ke tou tokoni ki ai ki te kumi ʼo te ʼu vaega faka Tohi-Tapu ʼaē ʼe lau mai e ia ʼaē ʼe fai akonaki.
4 ʼI te hili ʼo te Memoliale, koutou ʼui age ki ai ʼe koutou fiafia ʼi tana haʼu. E lagi ʼe ʼi ai hana ʼu fehuʼi ʼo ʼuhiga mo tatatou gāue ʼo feala ai hakotou tali age ki ai. Ko takotou faiga ʼe feala ke kamata ai hakotou fai palalau ki te Tohi-Tapu, peʼe ʼi te Fale ʼo te Puleʼaga peʼe ʼi te tahi faʼahi. Neʼe kamata e he ʼu tēhina neʼe nonofo tokaga he ʼu ako lelei ʼuhi ko tanatou fai te tonu ʼaoga ʼaenī. ʼI muʼa ʼo tana mavae ʼi te Fale ʼo te Puleʼaga, koutou fakahā ia ia ki niʼihi, pea mo fakaafe ia ia ke toe liliu mai.
5 ʼE tou fiafia ʼo tali ʼotatou ʼu tēhina pea mo tuagaʼane ʼofaina ʼe mole ʼōmai tuʼumaʼu ki te ʼu fono peʼe mole kei mālohi ʼi te minisitelio talu mai he kiʼi temi! ʼE mole tou fehuʼi age kia nātou pe koʼe neʼe mole nātou ʼōmai ki te ʼu fono, kae tou fakahā age totatou fiafia ʼi tanatou ʼōmai. E lagi ʼe ʼi ai he manatu ʼe nātou logo ki ai ʼi te akonaki ʼo te Memoliale ʼe uga ai anai nātou ke nātou toe fakasiosio tanatou ʼu felogoi mo Sehova. Ko te tali fakafiafia pea mo te faiga fakamalotoloto ʼaē ʼe tou fai kia nātou ʼe lagi lave anai ki tonatou loto. Tou fakahā age kia nātou ʼe tou fiafia mokā ʼe tou toe sio kia nātou.—Lom. 1:11, 12.
6 Ko he akonaki makehe ʼe fai anai ʼi te ʼu kokelekasio ʼi te ʼaho 10 ʼo ʼApelili ko tona kupu tāfito “Ko Te Lotu Moʼoni ʼe Ina Foaki ʼo Katoa Te ʼu Meʼa ʼAē ʼe ʼAoga Ki Te Tagata.” Koutou tokaga ʼo fakaafe ia nātou fuli ʼaē neʼe ʼōmai ki te Memoliale ki te akonaki ʼaia. ʼE tou fakaʼamu ko nātou fuli ʼaē ʼe ʼōmai ki te ʼu fono makehe ʼaia ʼe nātou leleiʼia anai pea ʼe nātou mamata anai ki he fiafia fakatautehina ʼi te hahaʼi ʼa Sehova.—Pes. 133:1.