ʼE Tou Lava Tokoni Feafeaʼi Kiā Nātou ʼAē ʼe Kau Ki Te ʼAho Fakamanatu?
1. Koteā te logo maʼuhiga ʼaē kā fagono anai kiai te hahaʼi ʼi te ʼaho 22 ʼo Malesio 2008?
1 ʼI te ʼaho 22 ʼo Malesio 2008, ʼe fagono anai e te ʼu lauʼi miliona hahaʼi ʼi te mālamanei kātoa ki he logo maʼuhiga. Ko nātou ʼaē kā kau anai ki te ʼAho Fakamanatu ʼe natou fakalogo anai ki te akonaki ʼo ʼuhiga mo te ʼofa lahi ʼo Sehova ʼi tana foaki te totogi moʼo haofaki ia te mālamanei. (Soa. 3:16) ʼE natou fakamahino anai ia te Puleʼaga pea mo tona fakaʼaogaʼi anai e Sehova moʼo fakahoko ia tona finegalo ʼi te kele kātoa. (Mat. 6:9, 10) ʼE natou sisio anai ki te ʼofa pea mo te logotahi ʼa te hahaʼi ʼa te ʼAtua pea mo te lelei ʼo te tali kāiga ʼaē kiā nātou.—Pes. 133:1.
2. ʼE tou lava tokoni feafeaʼi ki te kau ako Tohi-Tapu ʼaē ʼe ʼomai ki te ʼAho Fakamanatu?
2 Te Kau Ako Tohi-Tapu: Ko ʼihi ʼi te nofoʼaki lagi neʼe hoki kamata age pē tanatou ako ia te Tohi-Tapu mo tātou. Kotou fakahā ia nātou ʼaia ki te ʼu tehina mo tuagaʼane. Fakamahino age ia te ʼu fono ʼaē ʼe fai ʼi te vāhaʼa, pea fakamamata kiā nātou ia te Fale ʼo Te Puleʼaga. Lolotoga te faiakonaki, ʼe fakalotomālohiʼi anai e te tehina ia nātou ʼaia ke hoko atu tanatou tuputupu ʼi te faʼahi fakalaumālie. ʼE feala ke kotou fakaʼaogaʼi ia te ʼu palalau ʼaia moʼo fakalotomālohiʼi takotou kau ako.
3. Koteā ʼaē ʼe feala ke fai moʼo fakalotomālohiʼi te ʼu kaugā fagona ʼaē neʼe kau ki te ʼAho Fakamanatu kae ʼe mole kei natou lagolago ki te kōkelekāsio?
3 Te ʼu Kaugā Fagona ʼAē ʼe Mole Kei Natou Lagolago Ki Te Kōkelekāsio: ʼE kau anai ʼi te nofoʼaki he ʼu kaugā fagona ʼe mole kei natou lagolago ki te kōkelekāsio. Tou fakaʼalofa fakamālotoloto kiā nātou. ʼAua naʼa tou fia ʼiloʼi meʼa fuli ʼi tatatou ʼu fehuʼi peʼe tou fai he ʼu palalau ʼe feala ke natou ufiufi ai. Hili ʼaho e tahi peʼe lua ʼi te ʼosi ʼo te ʼAho Fakamanatu, ʼe tonu anai ke ʼaʼahi e te ʼu tagata ʼāfea ia nātou ʼaia, ʼo vikiʼi tanatou ʼu faiga ʼaē ke natou kau ki te ʼAho Fakamanatu, pea mo fakaafe nātou ki te fono kā hoa mai.
4. ʼE lava feafeaʼi kiā tātou takitokotahi hatatou tokoni ki te hahaʼi ʼaē neʼe ʼomai ʼo fakalogo?
4 Te Hahaʼi ʼAē Neʼe ʼOmai ʼo Fakalogo: Ko ʼihi ʼi te nofoʼaki ʼe lagi ko hotatou ʼu feʼilo peʼe ko ʼihi ʼo totatou fāmili neʼe tou fakaafe. Neʼe lagi maʼu e ʼihi tanatou pepa fakaafe ʼi te tufa makehe ʼaē neʼe fai. Kapau ʼe kotou sisio ki he hahaʼi ʼe mole kotou ʼiloʼi, kotou ʼolo ʼo fai palalau mo nātou pea mo tali kāiga lelei kiā nātou. ʼE Lagi neʼe mole heʼeki natou kau ki hatatou fono ʼi muʼa atu. ʼI takotou fai palalau ʼe lagi ʼe feala ke kotou kumi pe feafeaʼi hakotou fakafelōgoi mo nātou ki muli age. Kapau ʼe kotou ʼaʼahi peʼe kotou telefoni age hili he ʼu ʼaho ʼi te ʼosi ʼo te ʼAho Fakamanatu, pea ʼe feala ke kotou faiga ke tuputupu tanatou fia ʼiloʼi pea mo kotou fakaafe ke fai hanatou ako Tohi-Tapu.
5. Koteā ʼaē ʼe feala ke kotou ʼui moʼo kamata he ako Tohi-Tapu?
5 Ko te ʼu manatu ʼaē kā talanoa anai kiai ʼi te faiakonaki ʼo te ʼAho Fakamanatu, ʼe feala ke fakaʼaogaʼi moʼo fakahā ia te tohi Te Ako Mai Te Tohi-Tapu ʼi te fai ʼo he ʼaʼahi. Ohagē lā, ʼe lau anai ia te tehina faiakonaki ia Isaia 65:21-23. ʼI takotou fai te ʼaʼahi, ʼe feala ke kotou fakamanatuʼi age ia te akonaki pea mo kotou ʼui fēnei: “ ʼE au fia fakahā atu te tahi ʼu tapuakina mai te totogi ʼaia neʼe foaki e te ʼAtua.” Pea kotou vakaʼi ia te pāsina 4 ki te 5 ʼo te tohi Te Ako Mai Te Tohi-Tapu. Peʼe feala hakotou ʼui fēnei: “Tokolahi ʼe natou feʼekeʼaki pe ko ʼafea ʼaē kā hoko anai ia te lea fakapolofetā ʼo Isaia.” Pea kotou vakaʼi ia te palakalafe 1 ki te 3 ʼo te kāpite 9. Ko tona tahi faʼahiga fai, ko te talanoa ʼo ʼuhiga mo te ʼu palalau ʼaē neʼe fai e te tehina faiakonaki ʼi te ʼAho Fakamanatu, mo kotou fakahā age ia te tohi Te Ako Mai Te Tohi-Tapu, pea mo fakahā age pe feafeaʼi te fai ʼo he ako.
6. Ko te ʼu faigamālie fea ʼe tou maʼu ʼi tatatou fakalogo ki te fakatotonu ʼa Sesu ke fakamanatuʼi ia tona mate?
6 ʼOfa pē ke tou tokagaʼi takitokotahi ia te ʼu faigamālie ʼaē moʼo tokoni ki te kau ako Tohi-Tapu, ki te ʼu kaugā fagona ʼaē ʼe mole kei natou lagolago ki te kōkelekāsio, pea mo nātou ʼaē kā ʼomai ʼo fakalogo ki te akonaki. (Luka 22:19) ʼE tapuakina moʼoni anai e Sehova te tuputupu ʼo totatou gāue ʼi tatatou selevisi maʼa te Puleʼaga.