Tou Fakatalitali Fakafiafia Natou!
1. Ko te temi fea ʼae ʼe feala ke tou tuku ai he faʼifaʼitaki lelei, pea kotea tona tupuʼaga?
1 Ko te ʼaho ʼo te Fakamanatu ʼe ko he fealagia ʼaia ke tou foaki ai he fakamoʼoni ʼe lelei. ʼI te taʼu ʼaeni, ʼe tou fakaʼamu ʼe kau anai ki ai ia he toko lau ʼi hogofulu miliona ʼi te malamanei katoa pea mo natou logo ki te ʼu tupuʼaga lalahi ʼe lua ʼo te ʼofa ʼae ʼe tou maʼu ʼi te totogi. (Soa. 3:16; 15:13) ʼE natou ako ai ʼe feala anai ke natou maʼu he ʼu tapuakina ʼaki ia te meʼa ʼofa ʼo Sehova. (Esa. 65:21-23) Kaʼe ʼe mole gata ʼaki pe ki te tehina faiakonaki ʼe ina foaki anai ia he fakamoʼoni ʼi te ʼaho ʼaia. ʼI te fakatahi ʼaia, ʼe feala anai ke tou tuku he faʼifaʼitaki lelei ʼaki tatatou fakatalitali fakafiafia ia natou ʼae neʼe fakaafe mai.—Loma 15:7.
2. ʼE tou lava fakatalitali fakafiafia feafeaʼi ia te kau fakaafe?
2 ʼI muʼa ʼo takotou kumi hokotou hekaʼaga pea mo kotou heheka, kotou faigaʼi ke kotou faipalalau mo he tahi neʼe fakaafe. ʼE lagi tuʼania ia te kau fakaafe pea mo mata foʼou kia natou ia te fakatahi ʼaia. Kapau ʼe tou mata malimali pea mo fakamalō age kia natou, ʼe lagi natou fiafia anai. Kapau ʼe kotou maʼu he tahi neʼe haʼu mo hana pepa fakaafe, kotou fakalavelave age pe ko tana hoki haʼu ʼae ki ʼatatou fono pe ʼe ina iloʼi he tahi ʼi te kokelekasio. ʼE lagi ke kole age anai ke alu atu ke kolua heheka fakatahi pea mo muliʼi fakatahi ia te akonaki ʼaki tau Tohi-Tapu pea mo hiva fakatahi mo koe ia te katiko. Kapau ʼe lolotoga fakaʼaogaʼi ia te Fale fono e he tahi age kokelekasio, ʼe lagi lelei ke ke tokaga ki ai. ʼI te hili ʼo te akonaki, ʼe feala ke ke tali ki ʼana fehuʼi. Kapau ʼe tonu ke mavae fakavilivili ia te kokelekasio ke feala ke tuku ia te Fale fono ki he tahi age kokelekasio, ʼe feala ke ke ui age fenei: “ ʼE au fia iloʼi pe peʼe kotea tau manatu ʼo ʼuhiga mo te fono? ʼE feala koa ke ta toe faipalalau?” Fai he fakatuʼutuʼu ke ke toe liliu ʼo ʼaʼahi. ʼE faiga tafitō anai e te kau tagata ʼafeā ke natou fakalotomalohiʼi ia natou ʼae kua toto ʼi te ʼu fono.
3. He ko ʼe ʼe maʼuhiga ke tou fakatalitali fakafiafia ia natou ʼae neʼe fakaafe mai ki te ʼAho Fakamanatu?
3 Tokolahi te kau fakaafe, ko tanatou lagi hoki sisio ʼae ki te fiafia, mo te tokalelei pea mo te logotahi ʼo te hahaʼi ʼa Sehova. (Pes. 29:11; Esa. 11:6-9; 65:13, 14) Kotea anai te faʼahiga manatu ka taupau anai e te kau fakaafe? ʼE fakalogo pe anai ki tatatou faʼahiga talitali natou.