Fakatalitali ʼAtatou Fakaafe

ʼI te ʼaho 23 ʼo Malesio, ko te teitei toko 12 miliona tupu kau fakaafe ʼe natou kau anai ki te ʼAho Fakamanatu. Ko he toʼotoʼoga maʼuhiga anai ka natou maʼu moka talanoa te tehina faiakonaki ki te meʼa ʼofa ʼo Sehova ko te sakilifisio ʼo Sesu pea mo ʼihi tapuakina ka maʼu anai e te tagata. (Esa 11:6-9; 35:5, 6; 65:21-23; Soa 3:16) Kaʼe, ʼe mole ko te tehina faiakonaki pe anai ka ina tuku he faʼifaʼitaki lelei ʼi te toʼotoʼoga makehe ʼaia. ʼE ko tatou fuli ʼae ka tou fakatalitali ʼaki he fiafia ʼatatou fakaafe. (Lo 15:7) Tou vakaʼi ʼihi manatu.

• ʼE mole ke alu anai ʼo heka ki tou hekaʼaga pea mo fakatalitali ki te kamata ʼo te fono. Kaʼe, ke ke fakatalitali te kau fakaafe pea mo natou ʼae mole kei fakatahi mo te kokelekasio ʼaki hau fakamalō mo malimali kia natou

• ʼE mahino ia, ʼe ke tokaga tafitō anai kia natou neʼe ke fakaafe, kaʼe ke ke toe tokaga kia natou ʼae neʼe ʼomai ʼuhi ko tanatou maʼu te pepa fakaafe. Fakaafe ia natou ʼae kei foʼofoʼou mai ke natou heheka fakatahi mo koe mo muliʼi fakatahi ia te akonaki ʼaki tau Tohi-Tapu pea mo hiva fakatahi mo koe ia te katiko

• Hili te akonaki, ʼe feala ke ke tali ki ʼanatou fehuʼi. Kapau ʼe tonu ke mavae fakavilivili ia te kokelekasio ke feala ke tuku ia te Fale Fono ki he tahi age kokelekasio, fakatuʼutuʼu ke ke alu ʼo ʼaʼahi ʼi te ʼu ʼaho pe ʼae ʼe hoa mai. Kapau ʼe mole ke maʼu tona numelo telefoni, ʼe feala ke ke ui fenei age: “ ʼE au fia iloʼi pe ʼe kotea tau manatu ʼo ʼuhiga mo te fono? ʼE feala koa ke ta toe faipalalau?”