ʼE Ko He Fagonogono Mālohi Anai Kā Hoko
1. ʼO hilifaki ki te akonaki, koteā te tahi faʼahi ʼaē ʼe feala ke ōfo ai ia te hahaʼi foʼou ʼaē kā ʼomai ki te ʼAho Fakamanatu? Kotou fakamahino.
1 ʼE hoko anai ʼāfea ia te fagonogono ʼaia? ʼI te pō ʼo te ʼAho Fakamanatu. Neʼe tou faʼa fai ai ke tou fakaafe ia te hahaʼi ke natou fakatahi mo tātou ʼi te ʼaho ʼaia. ʼE lagi mole ōfo anai ia te hahaʼi foʼou ʼuhi pē ko te akonaki ʼaē kā natou logo kiai. Hili te fono ʼo te ʼAho Fakamanatu, neʼe vikiʼi tāfito e te fafine te ʼu meʼa ʼaē neʼe sio kiai, ʼaē ko te aga fakakaumeʼa ʼa te hahaʼi pea mo te matalelei pea mo te maʼa ʼo te fale ʼaē neʼe laga pea mo taupau lelei e te hahaʼi gāue. Koia, ʼe ko tātou fuli ʼaē ʼe tou kau fakatahi ki te fagonogono ʼaē kā hoko anai ʼi te toʼotoʼoga maʼuhiga ʼaupitō ʼaia ʼo te taʼu, kae mole gata pē ki te tehina faiakonaki.—Efe. 4:16.
2. ʼE lava feafeaʼi kiā tātou fuli ke tou fai he fagonogono ki te hahaʼi ʼaē kā ʼomai ki te ʼAho Fakamanatu?
2 Tou Fakatalitali Lelei Te Hahaʼi: ʼE tou fai anai he fagonogono mokā tou malimali pea mo fai ʼalofa ki te hahaʼi ʼaē ʼe ʼomai. (Soa. 13:35) Tatau aipē peʼe mole feala hakotou fai palalau mo te hahaʼi fuli, kae ʼe feala pē ke kotou ʼalofa fakalelei ki he tahi ʼe ovi atu pea mo kumi ke kotou feʼiloʼiʼaki mo ia. (Hep. 13:1, 2) Kotou tokagaʼi ia te hahaʼi ʼaē ʼe hagē ʼe mole natou ʼiloʼi he tahi ʼi te nofoʼaki. Lagi neʼe foaki age hanatou pepa fai fakaafe lolotoga tona tufa. ʼE feala ke kotou fehuʼi age fēnei: “ ʼE ko tau hoki kau ʼaenī ki tamatou fono?” Kotou kole age peʼe feala ke kotou heheka fakatahi, pea kotou fakahā age ʼe kotou lotolelei ke kotou tali ki he ʼu fehuʼi ʼe lagi ina fia fai atu. Kapau ʼe tonu ke foimo mavae takotou kōkelekāsio ke feala ai ki he tahi kōkelekāsio ke ina fakaʼaogaʼi ia te fale, ʼe feala ke kotou ʼui fēnei age: “ ʼE au fia ʼiloʼi pe koteā tau manatu ʼo ʼuhiga mo te fono ʼaenī. ʼE feala lā hatā toe felāveʼi?”
3. ʼE tou lava fakatalitali feafeaʼi ia nātou ʼaē ʼe mole kei fakatahi mo te kōkelekāsio?
3 Tou Fakatalitali Ia Nātou ʼAē ʼe Mole Kei Fakatahi Mo Te Kōkelekāsio: ʼE mahino ia, ʼe kau anai ki te ʼAho Fakamanatu he kau fai fakamafola ʼe mole kei fakatahi mo te kōkelekāsio, ʼe ʼomai pē ʼi te taʼu fuli ki te ʼAho Fakamanatu. Kotou fai he fakatalitali lelei kiā nātou, pea mo kotou fakahā age tokotou fiafia lahi ʼi takotou sio kiā nātou. (Loma 15:7) ʼE feala ki te kau tagata ʼāfea ke natou ʼaʼahi ia nātou ʼi te hili pē ʼo te ʼaho ʼaia, moʼo fakalotomālohiʼi ia nātou ke natou toe fakatahi mo te kōkelekāsio. ʼE matou hūfaki ke tokolahi te hahaʼi ʼaē kā kau ki te ʼaho ʼaia ke natou fia fakakolōliaʼi ia te ʼAtua, mole gata pē ʼuhi ko te akonaki ʼaē kā natou logo kiai, kae ʼuhi foki ko tanatou sisio ʼaē ‘ki te fua ʼo tatatou ʼu gāue lelei ʼaē ʼe natou mamata tonu kiai.’—1 Pet. 2:12.