“Koutou Fai Te Mea Aeni Mo Oku Fakamanatu”
ʼE Fakamanatu Anai Ia Te Mate ʼo Kilisito ʼi Te ʼAho 2 ʼo ʼApelili
1. He koʼē ko te ʼaho 2 ʼo ʼApelili ʼo te taʼu 2007, ʼe ko he ʼaho maʼuhiga?
1 ʼI te ʼaho 2 ʼo ʼApelili 2007, ʼe fakatahitahi anai ia te toko lauʼi miliona hahaʼi ʼi te mālamanei kātoa moʼo fakamanatu ia te mate faka sākilifisio ʼo Sesu. Neʼe mate ia Sesu ʼuhi he neʼe lagolago ki te pule faʼitaliha ʼo tana Tamai ʼaē ʼe ʼi selō, ʼo ina fakamoʼoni ai neʼe gutuloi ia te Tēvolo, ʼi tana ʼui ʼaē ko te tagata ʼe tauhi ki te ʼAtua ʼuhi pē ko te ʼu lelei ʼaē ʼe ina lava maʼu maʼa ia ia. (Sopo 2:1-5) Ko te Taumafa ʼa te ʼAliki, ʼe ina toe fakamanatuʼi mai, ko Sesu ʼi tana mate ʼi tona ʼuhiga tagata haohaoa, neʼe ina foaki ‘tona maʼuli moʼo totogi ʼo te tokolahi.’ (Mat. 20:28) Koia neʼe fakatotonu fēnei e Sesu ki ʼana tisipulo: “Koutou fai te mea aeni mo oku fakamanatu.” (Luka 22:19) Ko tokotou loto fakafetaʼi ki te meʼa ʼofa maʼuhiga ʼaia ʼo te ʼAtua, ʼe ina uga koa koutou ke kotou nonofo teuteu moʼo fakamanatuʼi ia te toe ʼofa makehe ʼaia?—Soa. 3:16.
2. ʼE tou lava teuteuʼi feafeaʼi totatou loto ki te ʼAho Fakamanatu?
2 Tou Teuteuʼi Totatou Loto: ʼE tou lava teuteuʼi totatou loto ki te ʼAho Fakamanatu ʼaia, mo kapau ʼe tou vakavakaʼi te ʼu meʼa ʼaē neʼe hoko ʼi te ʼu ʼaho takitahi ʼo te ʼu ʼaho fakaʼosi ʼo te maʼuli ʼo Sesu ʼi te kele. (Esita. 7:10) Moʼo tokoni kiā tātou ʼi te faʼahi ʼaia, ʼe ʼi ai te polokalama makehe ʼo te lau ʼo te Tohi-Tapu ʼi te kiʼi kaupepa Tou Vakaʼi Ia Te Tohi-Tapu—2007 pea mo te Kaletalio 2007. Ko te polokalama lautohi ʼaia ʼe mulimuli fakalelei ki te ʼu ʼaho ʼaē neʼe hoko ai te ʼu ʼaluʼaga ʼe pipiki ki te mate ʼo Sesu, ʼo mulimuli ki te kaletalio ʼaē ʼe tou fakaʼaogaʼi ʼi te temi nei. Ko te ʼu ʼaho ʼaē ʼe toʼo mai te ʼu fakamatala ʼi te Tohi-Tapu, ʼe fakatafito ki te kaletalio faka Sutea, ʼaē ʼe ina lau te ʼu ʼaho ʼe kamata mai he pō ʼo aʼu ki he tahi pō. Ko te faʼahiga lau ʼaia ʼo te ʼu ʼaho, neʼe mulimuli kiai ia te polokalama lautohi ʼo te ʼAho Fakamanatu. Ko te lautohi ʼaia, pea mo te metitāsioʼi ʼi te faikole ia te loloto ʼo te ʼofa ʼo Sesu, ʼe tokoni mai anai ke tou maʼu ia te ʼu lelei kātoa ʼo te toʼotoʼoga ʼo te ʼAho Fakamanatu.
3. ʼE tou lava tokoni feafeaʼi ki te hahaʼi ʼaē ʼe fia logo ki te moʼoni pea mo nātou ʼaē ʼe mole kei kau ki te ʼu gāue ʼo te kōkelekāsio ke natou ʼomai ki te ʼAho Fakamanatu?
3 Tou Fakaafe Te Hahaʼi Ki Te ʼAho ʼAia: Ko te pepa ʼaē neʼe tufa tahi mo Te Minisitelio ʼo Te Puleʼaga ʼo Fepualio, neʼe fakahā ai ia te fai faka mafola makehe ʼaē moʼo fakaafe ia te hahaʼi ki te toʼotoʼoga maʼuhiga ʼaia. Kua kotou fai koa he fakatuʼutuʼu ke lahi hakotou kau ki te tufa ʼaia? Kua kotou fai koa he lisi ʼo te hahaʼi ʼaē ʼe kotou ʼiloʼi pea mo kotou fia fakaafe, pea kua kotou kamata fakaafe koa ia nātou fuli ʼaia? Kotou fakatuʼutuʼu ke kotou ʼomai fakatomuʼa ʼi te afiafi ʼo te ʼAho Fakamanatu, moʼo fakatalitali ia nātou ʼaē neʼe kotou fakaafe pea mo te hahaʼi ʼaē ʼe fia logo. ʼE lagi kotou heheka fakatahi anai mo nātou, ʼo vakaʼi peʼe ʼi ai hanatou Tohi-Tapu pea mo hanatou kātiko. Kotou faka felāveʼi ia nātou mo te ʼu tehina mo tuagaʼane ʼo te kōkelekāsio. ʼI te hili ʼo te fono, kotou faifai palalau mo nātou moʼo tali age ki tanatou ʼu fehuʼi. Kotou fakaafe nātou ki te akonaki makehe ʼaē kā fai anai ʼi te ʼaho 15 ʼo ʼApelili. ʼE vakaʼi tāfito anai e te kau tagata ʼāfea ke fakaafe ia te ʼu tehina mo tuagaʼane ʼaē ʼe mole kei natou kau ki te ʼu gāue ʼo te kōkelekāsio ke natou ʼomai ki te ʼAho Fakamanatu pea mo te akonaki makehe.
4. ʼE tou lava tokoni feafeaʼi ki te hahaʼi ke natou haga tuputupu ʼi te faʼahi fakalaumālie ʼi te hili ʼo te ʼAho Fakamanatu?
4 Tou Tokoni Ke Tuputupu Ia Te Hahaʼi ʼAē ʼe Fia Logo Pea Mo Foʼofoʼou Mai, Pea Mo Nātou ʼAē ʼe Mole Kei Kau Ki Te ʼu Gāue ʼo Te Kōkelekāsio: Ko te tehina faiakonaki ʼo te ʼAho Fakamanatu, ʼe ina fakamahinohino fakanounou anai tatatou fakatuʼutuʼu ʼo ʼuhiga mo he ako Tohi-Tapu, pea mo ina fakaloto mālohiʼi anai te hahaʼi ʼaē ʼe fia logo pea mo foʼofoʼou ke natou haga ako ke natou ʼiloʼi ia Sehova. ʼE kotou lava fakaʼaogaʼi ia te ʼu palalau ʼa te tehina faiakonaki moʼo fai he tahi age ʼu tokoni fakalaumālie ki takotou kau fakaafe. Kapau ʼe mole heʼeki natou ako ia te Tohi-Tapu, kotou foimo ʼolo ʼo ʼaʼahi nātou ʼi te hili pē ʼo te ʼAho Fakamanatu, pea mo fakahā age peʼe feafeaʼi te fai ʼo he ako Tohi-Tapu. Ke feala hanatou tuputupu ʼi te faʼahi fakalaumālie, ʼe tonu anai ke natou ʼomai ki te ʼu fono ʼo te kōkelekāsio. (Hep. 10:24, 25) Pea ki te faʼahi ʼaia, ʼe tou fakaloto mālohiʼi anai ia nātou ke natou kamata ʼomai tuʼumaʼu kiai. ʼE ʼaʼahi anai e te kau tagata ʼāfea ia te kau Kilisitiano ʼaē neʼe ʼomai ki te ʼAho Fakamanatu kae ʼe mole kei kau ki te ʼu gāue ʼo te kōkelekāsio, pea mo tokoni kiā nātou ke natou fakakaukauʼi te ʼu manatu ʼaē neʼe fakahā ʼi te akonaki. ʼE lagi toe fakaloto mālohiʼi ai anai nātou ke natou toe fia kau ki te ʼu gāue ʼo te kōkelekāsio.
5. ʼE malave feafeaʼi kiā tātou te ʼAho Fakamanatu?
5 Ko te ʼAho Fakamanatu ʼe ko he faigamālie ʼaia ke tou metitāsioʼi fakalelei te meʼa ʼaē neʼe fai e Sehova pea mo Sesu maʼa tātou. Ko te taʼi metitāsio ʼaia ʼe ina fakaloloto totatou ʼofa ʼaē kiā nāua pea ʼe malave ki tatatou aga. (2 Ko. 5:14, 15; 1 Soa. 4:11) ʼI te temi ʼaenī, tou teuteuʼi atu ia tātou pea mo te hahaʼi ʼaē ʼe fia ako ki te ʼaho maʼuhiga ʼaia, ʼaē kā tou ‘kalagaʼi ai te mate ʼo te ʼAliki.’—1 Ko. 11:26.