“Koutou Fai Te Mea Aeni”—ʼE Fai Te ʼAho Fakamanatu ʼi Te ʼAho 5 ʼo ʼApelili
1. He koʼē ʼe maʼuhiga ia te toʼotoʼoga ʼo te ʼAho Fakamanatu?
1 “Koutou fai te mea aeni o fakamanatu kia te au.” (Luka 22:19) ʼAki te ʼu palalau ʼaenī, neʼe fakatotonu e Sesu ki ʼana tisipulo ke natou fakamanatu tana mate fakasākilifisio. ʼO ʼuhiga mo te totogi ʼaē neʼe ina foaki, ʼe mole ai he ʼaho ʼe maʼuhiga age ki te kau Kilisitiano ʼi te ʼAho Fakamanatu ʼaē ʼe fai ʼi te taʼu fuli. ʼI te ovi mai ʼo te toʼotoʼoga ʼaia ʼi te ʼaho 5 ʼo ʼApelili, ʼe tou fakahā feafeaʼi ia totatou loto fakafetaʼi kiā Sehova?—Kol. 3:15.
2. ʼI totatou lau pea mo metitāsio, ʼe tou fakahā feafeaʼi ia totatou loto fakafetaʼi ki te ʼAho Fakamanatu?
2 Kotou Teuteu: ʼI te agamāhani, ʼe tou nofo teuteu ki te ʼu meʼa ʼaē ʼe tou fakamaʼuhigaʼi. ʼE tou teuteuʼi totatou loto ki te ʼAho Fakamanatu, ʼi tatatou lau pea mo metitāsio fakafāmili ia te ʼu faʼahi ʼaē neʼe hoko ʼi te ʼu ʼaho fakaʼosi ʼo te maʼuli ʼo Sesu ʼi te kele. (Eseta. 7:10) ʼE maʼu ʼi te kaletalio pea mo te kiʼi kaupepa Tou Vakaʼi Ia Te Tohi-Tapu ʼi Te ʼAho Fuli, ia he lisi fakakoga ʼo te ʼu vaega. Kae, ʼe maʼu ia te lisi kātoa ʼi te ʼu pāsina 23-24 ʼo Te Tule Leʼo (Fakafalani) ʼaho 1 ʼo Fepualio 2011, ʼe ʼalutahi mo te ʼu kāpite ʼo te tohi Te tagata ʼaē ʼe lahi tokotahi ʼo te ʼu temi fuli.
3. ʼE tou fakahā feafeaʼi ia totatou loto fakafetaʼi ki te ʼAho Fakamanatu, ʼi te minisitelio?
3 Kotou Fai Fakamafola: ʼE toe feala foki ke tou fakahā totatou loto fakafetaʼi ʼi tatatou lagolago kātoa ki te minisitelio. (Luka 6:45) ʼI te mālamanei kātoa, ʼe kamata anai ia te tufa ʼo te ʼu fakaafe ki te ʼAho Fakamanatu ʼi te Moeaki ʼaho 17 ʼo Malesio. ʼE feala koa ke kotou fakatuʼutuʼu ke lahi age tokotou temi fai fakamafola, ʼo kotou toʼo te pioniē vaeluaʼi temi? ʼE feala koa ke kotou fai palalau fakafāmili kiai ʼi takotou Tauhi Fakafāmili?
4. Koteā ia te ʼu fua lelei ʼe tou maʼu ʼi tatatou kau ki te ʼAho Fakamanatu?
4 ʼE tou maʼu ia te ʼu fua lelei ʼi tatatou kau ki te ʼAho Fakamanatu ʼi te taʼu fuli! ʼE toe lahi age totatou fiafia mo totatou ʼofa ʼaē ki te ʼAtua, koteʼuhi heʼe tou fakahā ia te loto foaki ʼa Sehova ʼi tana momoli ifo tona ʼAlo ʼulutokotahi ko he totogi. (Soa. 3:16; 1 Soa. 4:9, 10) Ko te faʼahi ʼaia, ʼe ina fakamaʼua mai kiā tātou ke mole tou māʼuʼuli pē maʼa tātou totonu. (2 Ko. 5:14, 15) ʼE ina toe fakalotomālohiʼi tātou ke tou fakavikiviki kiā Sehova iā muʼa ʼo te kaugamālie. (Pes. 102:19-21) ʼE mahino papau ia, ʼe loto fakafetaʼi ia te ʼu kaugana ʼa Sehova. Koia lā ʼaē, ʼe natou fakaʼamu fakafiafia ai ke natou kau ki te ʼAho Fakamanatu ʼi te ʼaho 5 ʼo ʼApelili ‘moʼo kalagaʼi te mate ʼo te ʼAliki.’—1 Ko. 11:26.