Tou Fakahā Totatou Loto Fakafetaʼi ʼe Fai Te ʼAho Fakamanatu ʼi Te ʼAho 17 ʼo ʼApelili
1. Ohagē ko te tagata fai pesalemo, ʼe tonu ke feafeaʼi totatou loto, tāfito ʼi te temi ʼo te ʼAho Fakamanatu?
1 Ko te tagata fai pesalemo neʼe loto fakafetaʼi ʼuhi ko te loto manavaʼofa lahi ʼaē neʼe fakahā age e Sehova kiā ia pea mo tana fakaʼāteaina ia ia, ʼo ina fehuʼi fēnei ai: “Koteā anai he meʼa ke au liufaki kiā Sehova ki te ʼu lelei fuli ʼaē neʼe ina foaki mai kiā te au?” (Pes. 116:12) Iā ʼaho nei, kua lahi age te ʼu tupuʼaga ke loto fakafetaʼi ai te ʼu kaugana ʼa te ʼAtua. Hili ni ʼu sēkulō ʼi te kua ʼosi tohi ʼo te ʼu folafola ʼaia, neʼe foaki e Sehova tona meʼa ʼofa ʼaē ʼe lahi tokotahi ki te mālamanei, ia te totogi. ʼI tatatou teuteu ʼaē ke tou fakamanatu ia te mate ʼa Kilisito ʼi te ʼaho 17 ʼo ʼApelili, ʼe tou maʼu he tupuʼaga lelei ke tou fakahā ai totatou loto fakafetaʼi.—Kol. 3:15.
2. Koteā lā ʼihi tupuʼaga ke tou loto fakafetaʼi ai ʼo ʼuhiga mo te totogi?
2 Te ʼu Lelei ʼAē ʼe Tou Maʼu Mai Te Totogi: ʼAki te totogi, kua feala ke tou maʼu “te fakamolemole ʼo ʼatatou agahala.” (Kol. 1:13, 14) Kua feala ai ke tou tauhi kiā Sehova ʼaki he leʼo ʼo loto ʼe maʼa. (Hep. 9:13, 14) Kua feala ke tou palalau faʼifaʼitaliha mo Sehova ʼi tatatou fakaovi kiā te ia ʼi te faikole. (Hep. 4:14-16) Ko nātou ʼaē ʼe tui ki te totogi ʼe natou maʼu te ʼamanaki lahi ʼaē ke natou māʼuʼuli ʼo heʼegata!—Soa. 3:16.
3. ʼE tou lava fakahā feafeaʼi totatou loto fakafetaʼi kiā Sehova ʼo ʼuhiga mo te totogi?
3 Tou Fakahā Totatou Loto Fakafetaʼi: ʼE feala ke tou fakahā totatou loto fakafetaʼi ʼaki tatatou lau ʼi te ʼaho fuli ia te koga Tohi-Tapu ki te ʼAho Fakamanatu pea mo tou metitāsioʼi. ʼI Te Tule Leʼo (Fakafalani) ʼo te ʼaho 1 ʼo Fepualio 2011, ʼe maʼu ai te ʼalatike ko tona kupu tāfito “Kua Kotou Teuteu Koa Ki Te ʼAho Maʼuhiga ʼAupitō ʼo Te Taʼu?” ʼaē neʼe tohi ʼaki te fakatuʼutuʼu ʼaē ke tokoni mai ke tou fakahā totatou loto fakafetaʼi. ʼE feala ke tou toe faikole fakamālotoloto kiā Sehova moʼo fakahā te maʼuhiga ʼaupitō ʼaē ʼo te totogi kiā tātou. (1 Tes. 5:17, 18) Ko tatatou fakalogo ki te fakatotonu ʼa Sesu ʼo tou kau ki te ʼAho Fakamanatu, ʼe hā ai ia totatou loto fakafetaʼi. (1 Ko. 11:24, 25) Tahi ʼaē meʼa, ʼe feala ke tou faʼifaʼitakiʼi ia te ʼofa lahi ʼo Sehova pea mo tou fakaafe te hahaʼi tokolahi ke natou kau fakatahi mo tātou ki te ʼaho ʼaia.—Isa. 55:1-3.
4. Koteā ʼaē kā tou lotomālohi anai ʼo fai?
4 Ko te ʼu kaugana loto fakafetaʼi ʼa Sehova ʼe mole natou fakaʼuhiga anai ia te ʼAho Fakamanatu ohagē pē ko he tahi age fono. ʼE ko te fono ʼaia ʼaē ʼe maʼuhiga ʼaupitō ʼi te taʼu! ʼI te fakaovi mai ʼo te ʼAho Fakamanatu, ʼofa pē ke tou lotomālohi ohagē ko te tagata fai pesalemo ʼaē neʼe ina tohi fēnei: “Fakafetaʼi kiā Sehova, Ê toku nefesi, pea ʼaua naʼa galo kiā koe tana ʼu gāue fuli.”—Pes. 103:2.