Tou Fakahā Tatatou Loto Fakafetaʼi Ki Te Meʼa ʼOfa Lahi ʼAē Mai Te ʼAtua
1. He koʼē ʼe tou loto fakafetaʼi tāfito kiā Sehova?
1 ʼI te ʼatu ‘ ʼu meʼa ʼofa’ ʼaē mai ia Sehova, ko te meʼa ʼofa ʼaē ʼe lelei ʼe ko te totogi ʼaē neʼe foaki e tona ʼAlo ʼofaina. (Sake 1:17) ʼE tou maʼu ai te ʼatu ʼu lelei, ʼo kau kiai te fakamolemole ʼo tatatou ʼu agahala. (Efe. 1:7) Koia ʼaē ʼe tou loto fakafetaʼi tuʼumaʼu aipē ki te loto fakamolemole ʼaia. Lolotoga ia te temi ʼaē kā fai ai ia te ʼAho Fakamanatu ʼo te mate ʼo Sesu, ʼe tou toʼo tāfito anai he temi ke tou metitāsio ai ki te meʼa ʼofa maʼuhiga ʼaia.
2. ʼE kotou lava fakatuputupu feafeaʼi te loto fakafetaʼi ʼo tokotou fāmili pea mo koutou totonu ki te totogi?
2 Tou Fakatuputupu Tatatou Loto Fakafetaʼi: Moʼo fakatuputupu te loto fakafetaʼi ʼo tokotou fāmili, ʼi te ʼu vāhaʼa ʼi muʼa ʼo te ʼAho Fakamanatu, ʼi te ʼaho 30 ʼo Malesio, he koʼē ʼe mole kotou fakaʼaogaʼi ia he temi ʼi takotou Tauhi Fakafāmili ʼi te afiafi ke kotou vakaʼi ai he ʼu manatu ʼo ʼuhiga mo te sākilifisio faitotogi ʼa Sesu? Kotou toe vakaʼi fakafāmili ʼi te ʼaho fuli ia te lautohi makehe ʼo te Tohi-Tapu ki te ʼAho Fakamanatu. Kotou fakakaukauʼi takitokotahi ia te ʼu lelei ʼaē ʼe kotou maʼu ʼaki te totogi ʼaia pea mo tona malave ʼaē ki takotou manatu ʼo ʼuhiga mo Sehova, mo koutou totonu, mo te hahaʼi, pea mo te kā haʼu.
3. ʼE tou lava fakahā feafeaʼi tatatou loto fakafetaʼi?
3 Tou Fakahā Tatatou Loto Fakafetaʼi: Ko te maʼu ʼo he loto fakafetaʼi ki te totogi ʼe ina uga tātou ke tou palalau ki te hahaʼi ʼo ʼuhiga mo Sehova pea mo tona ʼofa lahi ʼi tana fekauʼi ifo ia tona ʼAlo. (Pes. 145:2-7) Lolotoga te ʼu māhina ʼo Malesio, mo ʼApelili, pea mo Maio, ʼe fakahā e ʼihi fāmili tanatou loto fakafetaʼi ʼaki tanatou fakatuʼutuʼu ʼaē ke toʼo e he tahi ʼi te fāmili te selevisi pioniē vaeluaʼi temi. Kapau ʼe mole lava fai ia te faʼahi ʼaia, ʼe feala koa ke kotou ‘totogi maʼa koutou te temi’ ke lahi age takotou kau ki te minisitelio? (Efe. 5:16) Ko te loto fakafetaʼi ʼe ina toe uga tātou ke tou tokoni ki niʼihi ke natou kau mo tātou ki te ʼAho Fakamanatu. (Fakh. 22:17) Kotou kamata fai he lisi ʼo te ʼu ʼaʼahi, mo te ʼu ako Tohi-Tapu, mo te ʼu kāiga, mo te ʼu kaugā gāue, pea mo te ʼu vāhaʼa fale ʼaē kā kotou fakaafe, pea kotou faiga ke kotou kau mālohi ki te tufa makehe ʼo te fakaafe ki te ʼAho Fakamanatu.
4. ʼE lava feafeaʼi hatatou fakaʼaogaʼi fakapotopoto ia te temi ʼaē kā fai ai te ʼAho Fakamanatu?
4 Ko te temi ʼo te ʼAho Fakamanatu ʼe ina foaki mai he tahi ʼu fealagia ke tou fakahā ai kiā Sehova tatatou loto fakafetaʼi lahi ʼaē ki te meʼa ʼofa ʼaē neʼe ina foaki maʼa te mālamanei. ʼOfa pē ke tou fakaʼaogaʼi te temi ʼaia moʼo fakatuputupu pea mo fakahā tatatou loto fakafetaʼi ki te totogi pea mo “te koloa lahi ʼo Kilisito.”—Efe. 3:8.