ʼE Kotou Toʼo Anai Koa Te Faigamalie?
Tou Fakaha Totatou Lotofakafetaʼi ʼi Te ʼAho Fakamanatu ʼo Te Mate ʼa Sesu
1. Kotea te faigamalie ʼe tou maʼu ʼi te ʼAho Fakamanatu?
1 ʼE tou maʼu ʼi te ʼAho Fakamanatu ʼo te mate ʼa Sesu ʼi te ʼaho 14 ʼo Apelili, ia te faigamalie ʼae ke tou fakaha totatou lotofakafetaʼi ki te manavaʼofa ʼo Sehova. ʼI te fakamatala ʼae ʼe tuʼu ia Luka 17:11-18, ʼe tou iloʼi ai te manatu ʼa Sehova pea mo Sesu ʼo ʼuhiga mo te lotofakafetaʼi. ʼI te ʼu tagata kilia ʼe tokohogofulu ʼae neʼe fakamalolō, neʼe ko te tokotahi pe ʼae neʼe ina fakaha tona lotofakafetaʼi. ʼI te malama foʼou, ʼe fakamalolō fuli anai tatou mai te ʼu mahaki ʼuhi ko te sakilifisio faitotogi ʼa Kilisito. ʼE tou maʼuʼuli anai ʼo heʼe gata. ʼE mahino ia, ʼi te ʼaho fuli, ʼe tou fakaha ai anai totatou lotofakafetaʼi kia Sehova ʼuhi ko te ʼu tapuakina ʼaia. Kaʼe ʼe tou lava fakaha feafeaʼi totatou lotofakafetaʼi ʼi te ʼu vahaʼa ʼaeni ka hoko mai?
2. Kotea ʼae ʼe tokoni mai anai ke tou lotofakafetaʼi ki te sakilifisio faitotogi ʼa Kilisito?
2 Ke Tou Lotofakafetaʼi: ʼE tupu totatou lotofakafetaʼi ki he tahi moka tou fakakaukauʼi te meʼa ʼae neʼe ina fai maʼa tatou. Neʼe fakatuʼutuʼu te polokalama lautohi ʼo te ʼu koga Tohi-Tapu ki te ʼAho Fakamanatu moʼo tokoni mai ke tou lotofakafetaʼi ʼo ʼuhiga mo te sakilifisio faitotogi ʼa Kilisito. ʼE feala ke tou maʼu ia te polokalama ʼaia ʼi te kiʼi kaupepa Tou Vakaʼi Te Tohi-Tapu ʼi Te ʼAho Fuli. ʼE feala ke tou toe maʼu ʼi tatatou tuʼasila ʼi te Neti www.jw.org/wls. ʼE lagi lelei ke tou lau ia te ʼu koga Tohi-Tapu ʼaia mo totatou famili. Kapau ʼe tou fai te faʼahi ʼaia, ʼe tuputupu anai totatou lotofakafetaʼi ʼo ʼuhiga mo te sakilifisio faitotogi ʼa Kilisito. Pea ʼe uga anai tatou ke tou faʼifaʼitakiʼi ia naua.—2 Ko. 5:14, 15; 1 Soa. 4:11.
3. ʼE tou lava fakaha feafeaʼi totatou lotofakafetaʼi lolotoga te temi ʼo te ʼAho Fakamanatu?
3 Tou Fakaha He Lotofakafetaʼi: ʼE ha totatou lotofakafetaʼi ʼi ʼatatou gaue. (Kol. 3:15) Neʼe faigaʼi e te tagata kilia ke ina maʼu ia Sesu pea mo fakamalō age ki ai. ʼE mahino ia neʼe lagi ina fakamatala ki te hahaʼi, ʼaki he lotofiafia, te milakulo ʼae neʼe hoko ki ai. (Luka 6:45) Kapau ʼe tou lotofakafetaʼi ʼo ʼuhiga mo te sakilifisio faitotogi ʼa Kilisito, pea ʼe tou lagolago malohi anai ki te tufa ʼo te pepa fakaafe ki te ʼAho Fakamanatu. ʼE tou toe fakaha totatou lotofakafetaʼi ʼaki tatatou toʼo te selevisi pionie vaelua ʼi temi peʼe tou lagolago malohi ki te faifakamafola lolotoga te temi ʼo te ʼAho Fakamanatu. ʼI te afiafi ʼo te ʼAho Fakamanatu, ʼe tou fakatalitali lelei anai ia natou ʼae neʼe fakaafe pea mo toʼo he temi ke tou tali ki ʼanatou fehuʼi.
4. Kotea ʼae ʼe feala ke tou fai ke ʼaua naʼa tou fakahemala ʼi te ʼAho Fakamanatu?
4 ʼE mole tou iloʼi pe toe fai anai he tahi age ʼAho Fakamanatu. (1 Ko. 11:26) Kaʼe ʼe tou iloʼi ʼe ko te faigamalie pe ʼaia ke tou fakaha ai totatou lotofakafetaʼi. Koia, ʼe kotou toʼo anai koa ia te faigamalie ʼaia? ʼOfa pe, ʼaki ʼatatou palalau pea mo tatatou metitasio, ke tou fakafiafiaʼi ia Sehova, ia ia ʼae neʼe ina fakatuʼutuʼu te sakilifisio faitotogi ʼa Kilisito.—Pes. 19:15.