Tou Tokoni Ki Te Hahaʼi Ke Nātou Maʼu Te ʼu Tapuakina ʼo Te Totogi ʼAē Neʼe Foaki e Kilisito
ʼE Fai Anai Te ʼAho Fakamanatu ʼo Te Mate ʼo Kilisito ʼi Te ʼAho 12 ʼo ʼApelili
1. Ko te ʼaluʼaga fea ʼaē ʼe fakahā ai e te hahaʼi ʼo te ʼAtua tonatou loto fakafetaʼi ʼo ʼuhiga mo te totogi ʼaē neʼe foaki e Kilisito?
1 “Ke fai he fakafetaʼi ki te ʼAtua ki te meʼa ʼofa makehe ʼaē neʼe ina foaki noa mai.” (2 Ko. 9:15, MN ) ʼE fakahā lelei ʼi te ʼu palalau ʼaia te meʼa ʼaē ʼe tou logoʼi ʼi totatou loto ʼo ʼuhiga mo te agalelei pea mo te lotoʼofa ʼo te ʼAtua, ʼi tana fakaʼaogaʼi ia tona ʼAlo ko Sesu Kilisito moʼo hāofaki tana hahaʼi. ʼE tou fakahā tāfito anai totatou loto fakafetaʼi ʼaia ʼi te ʼaho 12 ʼo ʼApelili, ʼi te ʼAho Fakamanatu ʼo te mate ʼo Kilisito.
2. Ko ai te tahi ʼu hahaʼi ʼe nātou fakatahi mo te ʼu kaugana ʼa Sehova ki te toʼotoʼoga ʼo te ʼAho Fakamanatu, pea koteā ʼaē ʼe tonu ke nātou fai ke feala hanatou maʼu ia te ʼu lelei ʼo te sākilifisio?
2 ʼI te taʼu fuli, ko te toko lauʼi hogofulu miliona hahaʼi ʼe nātou fakatahi mo te ʼu kaugana ʼa Sehova ki te toʼotoʼoga ʼo te ʼAho Fakamanatu. ʼI tanatou fai ia te faʼahi ʼaia, ʼe nātou fakahā ai tonatou loto fakafetaʼi ki te sākilifisio ʼa Kilisito. Kae ke feala hanatou maʼu ia te ʼu tapuakina ʼo te sākilifisio ʼaia, ʼe maʼua ke nātou tui kiai. (Soa. 3:16, 36) E feafeaʼi hatatou tokoni kiā nātou ke nātou fakatuputupu ia te taʼi tui ʼaia? Lolotoga te māhina ʼo te ʼAho Fakamanatu, ʼe tou lava fakaloto mālohiʼi nātou ke fai hanatou ako Tohi-Tapu pea ke nātou ʼōmai ki tatatou ʼu fono ʼaē ʼe fai ʼi te vāhaʼa fuli. Koutou vakaʼi te ʼu tokoni ʼaē ka hoa mai.
3. E feafeaʼi hatatou kamata ia he ako Tohi-Tapu mokā tou fai he fakaafe ki te ʼAho Fakamanatu?
3 Te ʼu Ako Tohi-Tapu: Ka koutou fakaafe he ʼu hahaʼi ʼe fia logo, ke ʼōmai ki te ʼAho Fakamanatu, he koʼe ʼe mole koutou faiga ke koutou kamata he ʼu ako Tohi-Tapu ʼaki te tohi Te Ako Mai Te Tohi-Tapu? Koutou fakamahinohino age ia te toʼotoʼoga ʼo te ʼAho Fakamanatu, ʼo koutou fuli age ia te ʼu pasina 206 ki te 208, ʼi te kupu tāfito “Te Taumafa ʼo Te ʼAliki—Ko He Toʼotoʼoga ʼe Ina Fakavikiviki Te ʼAtua.” ʼE feala anai hakotou vakaʼi fakatahi ia te ʼu manatu ʼaia ʼi te ʼuluaki ʼaʼahi, peʼe ʼi te lua ʼaʼahi, ke hage ko he ako Tohi-Tapu ʼe koutou fai ʼi te gutu matapā. ʼI takotou ʼosi vakaʼi ia te ʼu manatu ʼaia, ʼe lagi tali anai e takotou ʼaʼahi ke koutou faifai palalau ki te kapite 5, ʼaē ko tona kupu tāfito ʼaenī: “Te Totogi—Ko Te Meʼa ʼOfa Lahi ʼo Te ʼAtua.” Kapau kua liliu ko he ako ʼe fai tuʼumaʼu, koutou toe kamata te ako mai te ʼu ʼuluaki kapite e fā ʼo te tohi.
4. Ko ai ia nātou ʼaē ʼe feala ke tou kamata hanatou ako Tohi-Tapu?
4 Ko ai te ʼu hahaʼi ʼaē ʼe feala ke tou kamata hanatou ako Tohi-Tapu feiā? Lagi ʼe tali anai e takotou ʼu kaugā gāue, mo takotou ʼu kaugā ako, peʼe ko takotou ʼu vaʼe fale. ʼE feala ki te ʼu tēhina ke nātou ʼahiʼahi fai ia te taʼi ako ʼaia mo te ʼu tagata ʼaē ʼe mole ʼi te moʼoni, kae ko tonatou ʼohoana ʼe ko he tuagaʼane. Pea koutou manatuʼi mo takotou ʼu famili ʼaē ʼe mole ʼi te moʼoni. Tahi ʼaē meʼa, ʼe tou faiga tāfito anai ke tou fakaafe ia nātou ʼaē ki muʼa atu, neʼe lagolago lelei ki te ʼu gāue ʼo te kokelekasio. (Luka 15:3-7) Tou ʼofa ʼo kumi ia nātou ʼaia ke feala hanatou maʼu ia te ʼu lelei ʼo te totogi ʼaē neʼe foaki e Kilisito.
5. E feafeaʼi hatatou uga te kau ako Tohi-Tapu pea mo ʼihi age hahaʼi, ke nātou kau ki te ʼu fono ʼaē ʼe fai ʼi te vāhaʼa fuli?
5 Te ʼu Fono ʼo Te Kokelekasio: Ko te ʼuluaki fono ʼaē ʼe kau kiai te tokolahi ʼo te kau ako Tohi-Tapu pea mo ʼihi hahaʼi, ʼe ko te ʼAho Fakamanatu. Kae koteā ʼaē ʼe feala ke tou fai moʼo uga ʼo nātou ke nātou ʼōmai ki te ʼu fono ʼaē? ʼI Te Minisitelio ʼo Te Puleʼaga ʼo te māhina ʼo ʼApelili 2005, ʼi te pasina 8, neʼe tuʼu ai te ʼu tokoni ʼaenī: “Koutou fakahā age te kupu tāfito ʼo te akonaki ki te kaugamālie. Koutou fakahā age te alatike ʼaē ka tou vakaʼi anai ʼi te Ako ʼo Te Tule Leʼo pea mo te Ako Tohi ʼo te kokelekasio. Koutou fakamahinohino age te Ako ʼo Te Minisitelio Faka Teokalatike pea mo te Fono Gāue. Kapau ʼe ʼi ai hakotou kiʼi akonaki ʼi te ako, pea ʼe lagi feala ke koutou teuteuʼi liuliuga mo takotou ʼu kau ako. Koutou fakahā age te ʼu manatu maʼuhiga neʼe talanoa kiai ʼi te ʼu fono. Koutou fakaʼaogaʼi te ʼu pāki ʼo tatatou ʼu tohi moʼo tokoni kiā nātou ke nātou mahino lelei ki te fakaʼaluʼalu ʼo tatatou ʼu fono. ʼI takotou ʼuluaki fai te ako, koutou fakaafe nātou ke nātou kau ki te ʼu fono.”
6. Koteā te ʼu ʼaluʼaga e lua ʼaē ʼe tou lava tokoni ai ki te hahaʼi fakamalotoloto ke nātou maʼu te ʼu lelei ʼo te totogi ʼaē neʼe foaki e Kilisito?
6 ʼI te agamāhani, ko te hahaʼi fakamalotoloto ʼaē ʼe fai tuʼumaʼu tanatou ako Tohi-Tapu pea mo kau tuʼumaʼu ki te ʼu fono, ʼe nātou tuputupu vave ʼi te faʼahi fakalaumālie. Koia, tou fakaloto mālohiʼi ia te ʼu hahaʼi ʼaia ke nātou maʼu te ʼu tapuakina ʼo te ʼu fakatuʼutuʼu fakalaumālie ʼaia pea mo te ʼu lelei ʼo te meʼa ʼofa lahi mai te ʼAtua, ʼaē ko te totogi ʼaē neʼe foaki e Kilisito.