Fai He ʼu Fakatuʼutuʼu Ki Te Temi ʼo Te ʼAho Fakamanatu

ʼI te taʼu fuli, ʼe fiafia te kau Fakamoʼoni ʼa Sehova ʼi te fakamanatu te mate ʼo Kilisito. ʼI te ʼu vahaʼa ʼi muʼa ʼo te ʼAho Fakamanatu pea mo te ʼu vahaʼa ʼae ʼe hoa ki ai, ʼe tou fia toʼo ia te ʼu faigamalie fuli ke tou fai he fakavikiviki mo he fakamalo kia Sehova ʼo ʼuhiga mo te meʼa ʼofa ʼae ko te totogi. (Efe 1:3, 7) Ohage la, ʼe feala ke tou fakaafe he tahi ʼu hahaʼi ki te ʼAho Fakamanatu. ʼE feala anai ki ʼihi ke natou fai ni fakatuʼutuʼu ke natou pionie vaeluaʼi temi ʼi te ʼu mahina ʼo Malesio mo Apelili, ʼo natou fai ni hola ʼe 30 peʼe 50. ʼE kotou fia fakalahi koa takotou gaue faifakamafola ʼi te ʼu mahina ʼaia? Kotea ʼe tonu ke kotou fai ke kotou lava fakahoko te faʼahi ʼaia?

ʼI te agamahani, ʼe lava lelei he gaue mo kapau neʼe lelei tona fakatuʼutuʼu. (Taa 21:5) Koia ko te temi ʼaeni ʼe tonu ai ke tou fai he ʼu fakatuʼutuʼu. Kotou fakakaukauʼi pe kotea te ʼu fakatuʼutuʼu ʼe kotou fia fakahoko ʼi te ʼu mahina ʼaia. Pea mo kotou kole kia Sehova ke ina tapuakiʼi ʼakotou faiga.—1So 5:14, 15.

ʼE kotou fia fakalahi koa takotou gaue faifakamafola ʼi te temi ʼo te ʼAho Fakamanatu?