Tou Uga Te Tuputupu ʼAki Te ʼu ʼAʼahi ʼe ʼAoga
1 Moʼo tokoni kia nātou fuli ʼaē neʼe fia logo, ʼe maʼuhiga ke hoko atu tatatou foaki kia nātou te ʼu meʼa kai fakalaumālie ʼaki tatatou fai tuʼumaʼu te ʼu ʼaʼahi. Ko tatatou ʼu ʼaʼahi ʼe tokoni anai kia nātou ke nātou tuputupu mamalie ʼi te faʼahi fakalaumālie. (1 Ko. 3:6-9) Kae, ke lelei ʼatatou ʼu ʼaʼahi, ʼe ʼaoga ke tou teuteu ʼi muʼa ʼo tatatou ʼolo, ʼo tou manatuʼi ia ia ʼaē ka tou ʼaʼahi.
2 Tou ʼAʼahi Ia Nātou ʼAē Neʼe Tou Tuku Kiai He Kiʼi Pepa Lotu: ʼE lagi neʼe tou tuku te kiʼi pepa lotu Une vie paisible dans un monde nouveau (Ko he maʼuli fīmālie ʼi he mālama foʼou) ʼi tatatou ʼuluaki fai palalau.
ʼI te ʼosi fakamanatu ʼo te faʼahi neʼe tou talanoa kiai, ʼe feala ke tou fehuʼi age:
◼ “Ko te puleʼaga fea koa ʼaē ʼe feala ke ina ʼaumai te ʼu fetogi ʼaia? [Tuku ke fai mai hana tali.] ʼE mole fai he talanoa heʼe mo koutou foki ʼe koutou fia maʼuʼuli ʼi he ʼu ʼaluʼaga lelei ohage ko tona tuʼu ʼi te paki ʼaenī. ʼE feafeaʼi koa tatatou leleiʼia te ʼu taʼi ʼaluʼaga ʼaia?” ʼOsi ʼaia ʼe lagi lelei ke tou fakahā age te manatu ʼi te kupu “Ces bienfaits sont à votre portée.” (ʼE feala ke koutou maʼu te ʼu tapuakina ʼaia.) ʼOsi ʼaia pea tou fakatokagaʼi ia ia ki te tohi Mauli O Heegata ʼi te kapite 15, “Faahiga mea e tonu ke fai ke kita liliu kohe tagata faka logo ote puleaga ote Atua.” ʼE feala ke tou fai palalau ki te ʼu ʼuluaki palakalafe e lua pea ke tou fehuʼi ake: “E feafeaʼi koa te ʼekenaki ʼo tatou e te ʼu meʼa ʼe tou ako ʼo ʼuhiga mo te ʼAtua?” ʼE feala ke fai he fakatuʼutuʼu moʼo tali ki te fehuʼi pea mo fai palalau ki te kapite ʼi he ʼaʼahi ka hoa mai.
3 Mokā tou ʼaʼahi ia nātou ʼaē neʼe tou tuku kiai te kaupepa “ ʼE tokaga moʼoni koa te ʼAtua kia tatou?,” ʼe feala ke tou ʼui age:
◼ “ ʼI taku haʼu talu mai, neʼe tā palalau ki te ʼu faigataʼaʼia ʼe tau mo te malamanei pea koteā te fakapapau neʼe fai e te ʼAtua ʼo ʼuhiga mo te faʼahi ʼaia. Kae, he koʼe koa la, ʼe loaloaga te fakagafua e te ʼAtua te mamahi? Ko te tali ʼaoga ki te fehuʼi ʼaia ʼe tuʼu ʼi te faʼahi 6 ʼo te kaupepa ʼaē neʼe tā vakaʼi.” Fehuʼi age ki ai peʼe feala tana toʼo ʼo tana kaupepa. ʼI te ʼosi vakaʼi ʼo he ʼu palakalafe, ʼe feala ke tou fehuʼi age: “Koteā koa te meʼa ke tou fai ke tou maʼu ai te ʼu tapuakina ʼe fakapapau mai e te ʼAtua?” Ko te alatike ʼi te faʼahi 11, “Ko te Tafito ʼo Te Mālama Foʼou Kua Fai Nei,” ʼi te ʼu pasina 28 ki te 31, ʼe feala ke fai palalau kiai ʼi te ʼaʼahi ka hoa mai.
4 Tou ʼAʼahi Ia Nātou ʼAē Neʼe Tou Tuku Ki Ai He ʼu Nusipepa: Kapau neʼe tou tāʼofi he alatike makehe ʼe fia logo anai kiai ia ia ʼaē ʼe fai palalau mo tatou, ʼe feala ke tou talanoa ki he ʼu puani ʼo te alatike mokā ʼe tou toe liliu, ʼo fakatafito tatatou ʼu fakamatala ki he vaega faka Tohi-Tapu pea mo te alatike ʼaē ʼe tou palalau ki ai. ʼOsi ʼaia pea tou fakamahino age te ʼu tapuakina ʼo te ʼu nusipepa. Tahi ʼaē meʼa, ʼe feala ke tou fakatokagaʼi ia ia ki te nusipepa ka hoa mai mo kapau ʼe ʼi ai he alatike ʼe ʼalutahi mo te fai palalau. Pea, ʼe feala ke tou fakatokagaʼi ia ia ki te tohi Mauli O Heegata ʼe talanoa ki te manatu ʼaia pea ke tou fai he ʼu fakatuʼutuʼu moʼo hoko atu ʼo te fai palalau ʼi tatatou ʼaʼahi ki muli mai.
5 Ko tatatou fia tokoni ki te hahaʼi ʼaē ʼe felāveʼi mo tatou ʼaki tatatou fai te ʼu ʼaʼahi ʼaoga ʼe fakahā ai anai totatou ʼofa ki te hahaʼi pea mo Sehova. (Soane 13:34, 35) ʼE feala ke hoko atu tatatou ʼekenaki te tuputupu ʼi te faʼahi fakalaumālie ʼo nātou fuli ʼi totatou telituale ʼaki tatatou fai tuʼumaʼu he ʼu ʼaʼahi ʼe ʼaoga.