Tou Fakatuputupu Te Fia Logo ʼi Te ʼu ʼAʼahi
1 Ko te minisitelio ʼe fakatatau ki te gāue kele, pea ko te ʼu ʼaʼahi ʼe fakatatau ki te tuputupu pea mo te fakavai. (Mat. 13:23; Luka 10:2; 2 Ko. 9:10) ʼUhi ko tatou ko “te kau kaugā gāue ʼa te ʼAtua,” ʼe tou maʼu ia te maʼua ʼaē ko te tokoni ki te ʼu fua ʼaē neʼe hoki to ke tuputupu ʼo aʼu ki tona temi matuʼa pea mo maʼu ai hona ʼu fua. (1 Ko. 3:6, 9) E feafeaʼi hatatou fai fakalelei te faʼahi ʼaia?
2 Ke tou fakavilivili ʼo ʼaʼahi ia nātou fuli ʼaē neʼe nātou fakahā mai tanatou fia logo. Ke tou toe vakaʼi te ʼu nota ʼaē neʼe tou tohi, pea ke tou fakatuʼutuʼu pe ko ai ʼaē ka tou ʼaʼahi pea koteā te meʼa ka tou talanoa kiai. ʼI te agamāhani ko tatatou felogoi ʼe mulimuli anai ki te ʼuluaki fai palalau. Ke tou fakahā te ʼu alatike ʼaē ʼe ʼaoga ki te hahaʼi, ʼo tou manatuʼi niʼihi ʼu manatu faka Tohi-Tapu ʼe feala ke fai ʼaki ai te fai palalau. ʼE lelei ke tou fakaʼaogaʼi tuʼumaʼu te Tohi-Tapu, heʼe ina maʼu te mālohi moʼo uga ʼo te loto.—Hep. 4:12.
3 Kapau neʼe koutou tuku te kaupepa lahi ʼaenī “ ʼE tokaga moʼoni koa te ʼAtua kia tatou?,” ʼe feala hakotou kamata fēnei:
◼ “Tokolahi te hahaʼi ʼe nātou tui fakamalotoloto ʼe pulihi anai e te ʼAtua ia te kele, ka ko ʼihi ʼe nātou tuʼaniaʼi naʼa fakahoko te faʼahi ʼaia e te tagata. Koteā koa takotou manatu? [Koutou tuku he kiʼi temi ke ina fai atu hana tali.] ʼE ʼui mai e te Tohi-Tapu ʼe mole pulihi e te ʼAtua ia te kele, kae ʼe ina pulihi ai anai te heʼe faitotonu, ʼo ina fakaliliu anai ko he koga meʼa ʼe ʼi ai te tokalelei pea mo te fīmālie.” Koutou fakatokagaʼi ia ia ki te pasina 22, pea koutou lau ia Tāʼaga Lea 2:21, 22, ʼaē ʼe tuʼu ʼi ai. Kapau ʼe hā lelei mai tana fia logo, koutou fakamahino age peʼe feafeaʼi te fai ʼo te ako faka Tohi-Tapu peʼe koutou tuku age te ʼu nusipepa ʼaē neʼe hoki tou maʼu, pea ke koutou fai he fakatuʼutuʼu ke koutou toe liliu ki ai ʼo hoko atu te fai palalau ki te fakapapau ʼa te ʼAtua ʼo ʼuhiga mo te mālama foʼou.
4 Kapau neʼe koutou tuku ia te kaupepa lahi ʼaenī ko te “Puleaga,” ʼe feala hakotou fakaʼaogaʼi:
◼ Te ʼu manatu ʼaē ʼo te ʼu pasina 174 ki te 176 ʼo te tohi Comment raisonner. Peʼe koutou lagaʼi te fehuʼi ʼaenī: “ ʼE koutou ʼiloʼi koa ʼe foaki mai e te Tohi-Tapu te ʼu ʼamanaki e lua? Ko te tahi ʼi te ʼu ʼamanaki ʼaia ko te maʼuli heʼegata ʼi te kele. Ko te kaupepa lahi ʼaenī ʼe ina fakamahino mai peʼe feafeaʼi anai te fakahoko ʼo te ʼamanaki ʼaia.” ʼOsi ʼaia pea koutou fakahā age te pasina 15 ʼo te kaupepa, pea koutou lau te ʼu vaega e tolu ʼe tuʼu ʼi ai.
5 Mokā koutou tufa ia te kaupepa lahi ʼaē “Fiafia Kite Mauli Heegata Ite Kele” ki he tahi ʼe fia logo ki te ʼu meʼa faka lotu, e lagi ʼe koutou leleiʼia anai takotou ʼui age fēnei:
◼ “E lagi neʼe tuʼa lahi takotou lau liuliuga te Tāmai e ʼi selo. Koteā koa te meʼa ʼe koutou manatu kiai ʼi takotou kole ʼaē ke haʼele mai te Puleʼaga ʼo te ʼAtua?” ʼI te ʼosi ʼo tana tali, koutou fakaʼaogaʼi te ʼu paki 41 ki te 49, ʼosi ʼaia pea koutou lau ia Taniela 7:14. E lagi ʼe feala ke koutou hoko atu te fai palalau ʼo koutou fakamahino ki ai ko te haʼele mai ʼo te Puleʼaga ʼo te ʼAtua ko tona faka ʼuhiga ko tana fakagata anai te agakovi pea mo te mamahi. Koutou fakahā ki ai kapau ʼe tou faitotonu ia mata ʼo te ʼAtua, ʼe feala ke tou maʼuli heʼegata ʼi te Palatiso ʼi te kele ʼaenī.
6 Ke tou manatuʼi ʼe feala hatatou toe ʼaʼahi he tahi neʼe fakalogo lelei mai, tatau aipe peʼe neʼe ina toʼo he kaupepa peʼe kailoa. Tou fakatuʼutuʼu he temi ʼi te vāhaʼa fuli moʼo fai ʼo te ʼu ʼaʼahi. ʼE tapuakina anai e Sehova tatatou faiga ʼaē ke tou uga te fia logo ʼa te hahaʼi ʼaē neʼe fagono mai. ʼOfa pe ke maʼu he fua ʼi te faʼahi ʼaia moʼo fakavikiviki kia te ia.—Soane 15:8.