Tou Liliu ʼo ʼAʼahi Te Hahaʼi ʼAē Neʼe Nātou Toʼo Te ʼu Kaupepa Lalahi
1 Neʼe vikiʼi e te ʼapositolo ko Paulo ia te kau Kilisitiano ʼo Filipe koteʼuhi neʼe nātou ‘toe manatuʼi ia ia.’ (Filp. 4:10) Kapau ʼe tou muliʼi tanatou faʼifaʼitaki ʼi tatatou minisitelio, ʼe tou ‘toe manatuʼi’ anai ia nātou ʼaē neʼe tou fagonogono ki ai pea ʼe tou foimo liliu ʼo ʼaʼahi ia nātou.
2 Kapau neʼe koutou tuku te kaupepa lahi ʼaenī “Kote puleaga ae ka ina fakatuu anai te Palatiso,” ʼe feala ke koutou ʼui age he manatu fēnei:
◼ “Neʼe ʼau manatuʼi tatā felogoi ʼi te tahi ʼaho, pea ʼe ʼau fia fakahā atu te ʼu vaega faka Tohi-Tapu e lua neʼe ʼau manatuʼi. E lagi ʼe kei ke manatuʼi neʼe tā palalau ʼo ʼuhiga mo te ʼAtua ka pule ki te kele. ʼI te Tohi-Tapu, neʼe fakapapau e Sehova ʼAtua ʼe hoko anai te meʼa ʼaia. [Lau ia Taniela 2:44.] ʼE koutou faka tui koa ʼe hoko moʼoni anai te faʼahi ʼaia? [Koutou faka fealagia ke fai mai hana tali.] Koutou fakalogo muʼa ki te talanoa ʼa Sehova ʼo ʼuhiga mo tana fealagia ʼaē ke ina fakahoko tana ʼu fakapapau. [Koutou lau age ia Isaia 55:11.] ʼE mole fakaloto mālohiʼi koa tatou e te vaega ʼaenī ke tou tuku tatatou falala ki te Puleʼaga ʼo te ʼAtua? Kae ko te temi fea ʼaē ka fakahoko ai anai e te ʼAtua tana ʼu fakapapau?” Koutou ʼui age ki ai ʼe koutou fakahā age anai te tali ʼo te fehuʼi ʼaia ʼi he tahi ʼaʼahi.
3 ʼE feala ke kamata fēnei takotou palalau mokā ʼe koutou liliu ʼo ʼaʼahi he tahi neʼe ina toʼo te kaupepa lahi ʼaenī “Mokā Mate He Tahi ʼe Tou ʼOfa Mamahi Ai”:
◼ “Neʼe ʼau faiga mālohi ke ʼau toe liliu mai, ʼuhi ko tātā fai palalau ʼaē ʼo ʼuhiga mo te mate ʼo he tahi ʼe tou ʼofa mamahi ai.” Koutou fakahā age te paki ʼo te pasina 30 ʼo koutou ʼui age ki ai: “Kei ke manatuʼi te paki fakafiafia ʼo te hahaʼi ʼaē neʼe fakatuʼuake ke nātou toe maʼuli fakatahi mo te hahaʼi ʼaē ʼe nātou ʼofa mamahi ai? Neʼe ʼau fehuʼi atu peʼe hoko anai ʼifea te fakatuʼuake ʼaia, ʼi te lagi peʼe ʼi te kele. E lagi neʼe ke maʼu te tali ʼa te Tohi-Tapu ʼi te pasina 26 ʼo te kaupepa lahi ʼaenī.” Koutou fai palalau ki he ʼu puani tāfito ʼi te palakalafe tolu ki te palakalafe nima, pea koutou lau ia Soane 5:21, 28, 29. Kapau e fealagia te temi, koutou lau he vaega ʼi te ʼu vaega faka Tohi-Tapu ʼaē ʼe tuʼu ʼi te pasina.
4 Neʼe kua koutou kamata koa he ako ʼi te kaupepa ʼaenī “ ʼE tokaga moʼoni koa te ʼAtua kia tatou?” ʼI takotou ʼaʼahi, ʼe feala ke koutou fai te meʼa ʼaenī:
◼ Koutou fakaʼaogaʼi te pasina 12, pea koutou fakahā age te fehuʼi: “He koʼe neʼe fakagafua e te ʼAtua te mamahi?” Koutou toe vakaʼi te ʼu palakalafe 1 ki te 14 ʼo feiā aipe mo te paki ʼo te pasina 13 ʼo te kaupepa. Koutou lau age te ʼu vaega faka Tohi-Tapu ʼaē ʼe tuʼu ʼi te ʼu palakalafe. Koutou fakamahino ki ai ʼe gata pe ki te Tohi-Tapu ʼe ina tuku mai he fakamatala ʼo ʼuhiga mo te fehuʼi ʼaia. Koutou fai he ʼu fakatuʼutuʼu moʼo fai ʼo he tahi age ʼaʼahi. ʼI te ʼosi ʼo te tolu ʼaʼahi, kapau ʼe koutou sio ʼe hoholo atu te ako faka Tohi-Tapu, ʼe feala ke koutou kamata tohi te ako foʼou ʼaia ʼi te pepa tānaki.
5 ʼE feala ke fakanounou takotou fai palalau ʼi te kaupepa ʼaenī “Fiafia Kite Mauli Heegata Ite Kele”:
◼ “ ʼI tātā ʼuluaki fai palalau, neʼe feala pe ke ʼau fakahā atu te huafa ʼo te ʼAtua ʼi te Tohi-Tapu. Ko te ʼiloʼi pea mo te fakaʼaogaʼi ʼo te huafa ʼo Sehova ʼe ko he faʼahi maʼuhiga ia ʼo tatatou tauhi.” Koutou fakahā age te paki 50, pea koutou lau age ia Soane 17:3. Koutou fakamahino age ʼe tou fakatuʼutuʼu te polokalama ako Tohi-Tapu ʼe fakahā ai peʼe feafeaʼi te tāpuhā fakalelei ʼo te huafa ʼo te ʼAtua pea ʼe lava feafeaʼi anai hatatou fiafia ʼi te ʼu tapuakina ʼi te palatiso ʼi te kele.
6 Koia, ke koutou toe manatuʼi ia nātou ʼaē neʼe felāveʼi mo koutou. Ke koutou kātaki ʼo ʼaʼahi ia nātou, pea ke koutou teuteuʼi he manatu ʼe ʼaoga ke koutou fakahā kia nātou. ʼE feala ke koutou liliu ko he tahi “ ʼe ʼi ai moʼoni tona ʼu fua” ʼi te gāue ʼaē ko te fai ʼo te ʼu tisipulo foʼou.—Mat. 13:23.