Neʼe Mole Fakatatāʼofi Tanatou Fai Faka Mafola
1 Ko totatou higoa, ʼaē ko te kau Fakamoʼoni ʼa Sehova, ʼe ina fakahā ia tatou pea mo ina fakamahino te gāue ʼaē ʼe tou fai. ʼE tou fagonogono te ʼu kalitate ʼo totatou ʼAtua, ko Sehova. (Is. 43:10, 12) ʼE tonu ke tou kau takitokotahi ki te fakahā ʼo te moʼoni ʼi tatatou liliu ʼaē ʼo kau ki te kokelekasio. Ko te fagonogono ʼe ʼuluaki fai ʼaki te fai faka mafola ki te hahaʼi, ʼo kau ai te fai faka mafola ʼi te ʼu ʼapi, te fagonogono ʼi te ala, te fai ʼo te ʼu ʼaʼahi, pea mo te fai ʼo te ʼu ako faka Tohi-Tapu. ʼE fakaloto mālohiʼi ia tatou fuli ke tou kau katoa kiai.—1 Ko. 15:58.
2 Kae, ko ʼihi ʼi te kokelekasio ʼe mole lahi te fealagia ʼe nātou maʼu moʼo fai ʼo te faʼahi ʼaia. E lagi ko te mahaki peʼe ko te māʼimoa ʼe tupu ai tanatou nonofo ʼi tonatou ʼu ʼapi. Ko te ʼu fakafeagai ʼa te famili e lagi tupu ai te ʼu faigataʼaʼia. ʼE feala pe ke tāʼofi he tūpulaga e he tahi ʼi tana ʼu mātuʼa ʼe mole ʼi te moʼoni. Ko nātou ʼaē ʼe nonofo ʼi te ʼu koga meʼa mamaʼo ʼe mole honatou meʼa feʼaluʼaki ʼe feala ke faigataʼa kia nātou. Ko te umiuminoa ʼe lotolotolua ai ʼihi ʼi te fai faka mafola. Ko he kau faka mafola ʼe tau mo te ʼu ʼaluʼaga ʼaia peʼe ko niʼihi age ʼu ʼaluʼaga, ʼe ʼui maʼa nātou ʼe mole feala ke nātou fai te gāue faka Kilisitiano ʼaia koteʼuhi ko te meʼa ʼaē ʼe feala ke nātou fai ʼe veliveli age ia ʼi te meʼa ʼaē ʼe fai e ʼihi pea ʼe siʼisiʼi age ia ʼi te meʼa ʼaē ʼe nātou loto ke nātou fai. ʼE mole ʼaoga ke nātou meʼa noaʼi ʼanatou ʼu faiga. (Kal. 6:4) ʼE feala hanatou lotomālohi ʼi tanatou ʼiloʼi ʼaē ʼe fiafia ia Sehova ʼi tanatou foaki age tanatou meʼa ʼaē ʼe lelei age, tatau aipe he faʼahiga ʼaluʼaga ʼe tau mo nātou.—Luka 21:1-4.
3 Ke Tou Maʼu He Faʼahi Ke Tou Kau Kiai: Neʼe fai te ʼu fakamatala ʼe lauʼi afe ʼo fakahā ai te ʼu hahaʼi neʼe tau mo te ʼu ʼaluʼaga faigataʼa pea neʼe mole nātou faka fealagia ki te ʼu fihifihia ʼaia ke mole nātou kau ki te fai faka mafola. Ko nātou ʼaē ʼe nonofo ʼi tonatou ʼu ʼapi neʼe nātou fakaʼaogaʼi te telefoni moʼo fakahoko ʼo te fagonogono. Ko nātou fuli ʼaē ʼe ʼōmai ʼo fakasiosio ia nātou ʼaia ʼi tonatou ʼu ʼapi ʼe nātou fagonogono ki ai. Māʼiape la mo he fafine ʼe tau mo he fakafeagai ʼi tona loto fale, ʼo mole feala ai tana kau ki te fai faka mafola ʼi te ʼu ʼapi, ʼe feala ke ina fakaʼaogaʼi te ʼu temi ʼe faigamālie ai moʼo palalau mo tona ʼu vāhaʼa fale peʼe ko niʼihi ʼe felāveʼi mo ia ʼi tana ʼu gāue māhani.
4 E lagi ko he tūpulaga neʼe tapuʼi age e he tahi ʼi tana ʼu mātuʼa ʼe mole ʼi te moʼoni, ke ʼaua naʼa kau ki te fai faka mafola. ʼO mole ina ʼui ko te faʼahi ʼaia ʼe faigataʼa, ʼe feala ke ina fakatuʼutuʼu ko tona ʼu kaugā ako pea mo tana kau faiako ko tona “telituale” ʼaia pea ʼe feala ke ina fai he fagonogono lelei ʼo lagi feala ai ke ina fai he ʼu ako faka Tohi-Tapu. Tokolahi ʼe nonofo ʼi te ʼu koga meʼa mamaʼo neʼe feala tanatou kau ki te fai faka mafola ʼaki tanatou fai te ʼu tohi. Ko nātou ʼaē ʼe uga e te faiva faka Kilisitiano ʼe nātou maʼu tuʼumaʼu anai he faigamālie ke ʼaua naʼa nātou liliu “ ʼo fakaʼaoga noa peʼe noa ʼo ʼuhiga mo te mālama totonu ʼo totatou ʼAliki ko Sesu Kilisito.”—2 Pe. 1:8.
5 ʼO ʼuhiga mo tatatou kau ki te gāue fai faka mafola, neʼe tuku mai e Sehova te fakatotonu kia tatou fuli, ko tona faka ʼuhiga, ke tou gāue ‘mo totatou nefesi katoa.’ (Kol. 3:23) Logope la ko te temi ʼaē ʼe tou fakaʼaogaʼi pea mo te meʼa ʼaē ʼe tou fakahoko ʼe kehekehe anai, ka ko te meʼa ʼaē ʼe ina uga tāfito ia tatou ʼe tatau pe ia—ko te ʼofa fakamalotoloto ʼaē ʼe haʼu mai te “loto katoa.” (1 Fkma. 28:9; 1 Ko. 16:14) Kapau ʼe tou foaki tatatou meʼa ʼaē ʼe lelei age, ʼe mole feala anai ke tou ʼui ʼe mole ia tatou te tui peʼe mole hotatou ʼuhiga ʼi te kokelekasio koteʼuhi ʼe siʼisiʼi te meʼa ʼaē ʼe tou fai. Ohage ko Paulo, ʼe feala ke tou tala moʼoni neʼe ‘mole tou fakatatāʼofi ʼi te fakahā ʼo te ʼu meʼa fuli ʼaē ʼe ʼaoga, pe ko he akoʼi ʼo te hahaʼi.’—Gāue 20:20.