Ke Koutou Fakalahi Tokotou Koloā ʼi Te Gāue Ki Te Puleʼaga
1 Neʼe fakatatau e Sesu te ʼamanaki ki te Puleʼaga ki he koloā maʼuhiga ʼaupito. (Mat. 13:44-46) ʼE tou hage koa la ko te ʼu tagata ʼaē ʼi te lea fakatā ʼa Sesu ʼaē neʼe nātou fakatau ʼonatou ʼu koloā fuli moʼo totogi ʼo he koloā ʼe maʼuhiga age ia? Kapau ko ia ʼaia, pea ʼe tou fakamuʼamuʼa anai te Puleʼaga ʼo te ʼAtua, tatau aipe peʼe faigataʼa kia tatou pea mo kapau ʼe fakamaʼua ki ai he maʼuli faka sakilifisio.—Mat. 6:19-22.
2 ʼUhi ko tatatou gāue ki te Puleʼaga ʼe ko he koloā, ʼe tonu ke tou fia fakalahi tatatou gāue. Koteā ʼaē ʼe hā ʼi totatou maʼuli? ʼE tou fakalahi koa tatatou gāue ʼaē ki te Puleʼaga? ʼE feala tatatou fai te faʼahi ʼaia ʼaki tatatou kau ki te ʼu faʼahi kehekehe ʼo te minisitelio, ʼo kau ai te fai faka mafola ʼi te ʼu ʼapi, pea mo te ʼu ʼaʼahi, pea mo te ʼu ako faka Tohi-Tapu, pea mo te fagonogono faigamālie.
3 ‘E Feafeaʼi Koa Haku Fakalahi Taku Kau Ki Te Gāue?’ ʼAki te kamata ʼo te taʼu gāue foʼou, ʼe lelei tatatou toe vakaʼi takitokotahi tatatou gāue ke tou ʼiloʼi ai te meʼa ʼaē ʼe tonu ke tou fai moʼo fakatuputupu ʼo te temi ʼaē ʼe tou kau ai ki te gāue ʼi te minisitelio pea mo tou fai te fehuʼi ʼaenī: ‘ ʼE feala koa ke ʼau fai he fakatuʼutuʼu ke feala ai haku tautau toʼo te gāue pionie vaeluaʼi temi peʼe ke ʼau pionie hoholo? ʼAki he ʼu fetogi, ʼe feala koa ke ʼau pionie katoa?’ Ko te kau pionie foʼou ʼaē ʼe kamata ʼi te ʼaho 1 ʼo Sepetepeli ʼe nātou faiga ke nātou kau ki te Ako ʼo te kau Pionie ʼi te taʼu ka haʼu.
4 Ko ʼihi kau fai faka mafola neʼe nātou fakatuʼutuʼu takitokotahi ke nātou kau ki te fagonogono faigamālie. Ko te gāue ʼaia ʼe tautau maʼu ai tona ʼu fua lelei. Ko ʼihi e lagi ʼe nātou fakatokagaʼi ʼe ʼaoga ke nātou fai he ʼu ʼaʼahi fakapotopoto peʼe ke nātou kamata he ʼu ako faka Tohi-Tapu foʼou.
5 Kapau ʼe tou fakatokagaʼi ko totatou minisitelio ʼe faka tuʼakoi pe, koteā koa te meʼa ʼe feala ke tou fai moʼo fakalahi ʼo te potu ʼaia? Ko nātou ʼaē neʼe feala tanatou maʼu he fua lelei ʼaupito, ʼe nātou ʼui mai ke tou fakatuʼutuʼu ke tou fakamuʼamuʼa te meʼa ʼe ʼaoga ki te Puleʼaga logope la he faʼahiga meʼa ʼe feala ke hoko. (Mat. 6:33) ʼE ʼaoga te tui pea mo te falala katoa kia Sehova. (2 Ko. 4:7) Tou kumi tana tokoni ʼaki hatatou faikole hoholo ʼo fai fakamalotoloto. (Luka 11:8, 9) ʼE feala ke tou falala ʼe tapuakina anai e Sehova ʼatatou ʼu faiga fakamalotoloto moʼo fakatuputupu tatatou kau ʼaē ki tana gāue.—1 Soane 5:14.
6 Koutou palalau ki niʼihi tēhina pea mo tuagaʼane neʼe feala tanatou fakalahi ʼo tonatou minisitelio. Koutou fehuʼi age kia nātou pe neʼe feafeaʼi tanatou tauʼi te ʼu faigataʼaʼia ʼo mole nātou lotovaivai ai. Ko tanatou fakamatala ʼo ʼuhiga mo tanatou gāue e lagi ko te meʼa pe ʼaia ʼe ʼaoga ke koutou ʼiloʼi ai, ko te fakalahi ʼo tokotou minisitelio ʼe mole ko he meʼa ʼe mole feala tona fai.
7 Mokā koutou lau te ʼu alatike ʼo Te Tule Leʼo peʼe ko Te Minisitelio ʼo Te Puleʼaga ʼaē ʼe ʼaoga ki te gāue fai faka mafola, koutou fakakaukauʼi ʼi te faikole peʼe feafeaʼi takotou maʼuliʼi te ʼu tokoni ʼaia ʼi tokotou minisitelio. Koutou toe fai pe te meʼa ʼaia mokā koutou kau ki te ʼu fono ʼo te kokelekasio peʼe ko te ʼu fakatahi. Ko te ʼu tokoni ʼaē ʼe foaki mai e te alatike ʼaenī ʼe fakatafito ki te akonaki ʼo te polokalama ʼo te fakatahi fakakolo ʼo te taʼu kua hili. Ko te alatike ʼaenī ʼe ko te ʼuluaki ʼo te ʼu alatike neʼe fakatuʼutuʼu moʼo tokoni kia tatou ke tou maʼuliʼi te ʼu palalau fakaloto mālohi neʼe foaki mai e te polokalama ʼo te fakatahi ʼaia.
8 Neʼe faka maʼuhigaʼi ʼaupito e Sesu tona minisitelio, ʼo ina fakamuʼamuʼa. Neʼe ina ʼui fēnei: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai ʼau.” (Soane 4:34) ʼE tou maʼu koa te manatu ʼaia? Kapau ʼe tou fai te faʼahi ʼaia, ʼe tou maʼu moʼoni anai te ʼu faʼahiga fai moʼo fakalahi ʼo tatatou gāue pea mo tou vaevae mo niʼihi te ʼu “meʼa lelei” ʼe haʼu mai totatou koloā.—Mat. 12:35; Luka 6:45.