ʼE Feala Koa Ke Lahi Age Takotou Gāue?
1. Koteā ʼaē kua ʼaoga tāfito ke fai ʼi te minisitelio, pea koteā tona tupuʼaga?
1 ʼI tana sio ki te fia logo ʼa te hahaʼi tokolahi ki te logo lelei ʼo te Puleʼaga, neʼe fakatotonu e Sesu ki tana ʼu tisipulo ke natou “faikole ki te ʼAliki ʼo te taʼukai ke ina fekauʼi mai he kau gāue ki tana taʼukai.” (Mat. 9:37, 38) Mai tona ʼaluʼaga ʼaē ʼe tou nonofo nei ʼi te ʼu hola fakaʼosi ʼo te temi taʼukai, kua maʼuhiga age tatatou gāue ʼi te temi nei ʼi te ʼu temi ki muʼa atu. Ko tona fakaʼuhiga ʼaē ʼe tonu ke tou vakavakaʼi, ʼi te faikole, peʼe feafeaʼi hatatou kau lahi age ki te gāue.—Soa. 14:13, 14.
2. Koteā te tali neʼe fai e ʼihi ki te kole ʼaē ke lahi age ia he kau gāue ki te minisitelio?
2 Ko He Gāue ʼe Lahi Age: ʼAki te takitaki pea mo te tokoni ʼa Sehova, neʼe feala ai ki te tokolahi ke natou pioniē. (Pes. 26:2, 3; Filp. 4:6) Neʼe faiga tāfito e ʼihi ke natou pioniē vaeluaʼi temi ʼi te taʼu, lolotoga he māhina kātoa peʼe laka atu. Neʼe natou maʼu ai he faigamālie ke lahi age tanatou kau ki minisitelio. ʼUhi ko te fiafia ʼaē neʼe natou maʼu ʼi tanatou pioniē vaeluaʼi temi, tokolahi iā nātou ʼaia neʼe natou fakakaukauʼi ke natou pioniē kātoa.—Gāue 20:35.
3. Kapau ʼi te temi muʼa neʼe kotou pioniē, koteā ʼaē ʼe lagi kotou fia vakavakaʼi ʼi te temi nei?
3 ʼE Feala Koa Ke Kotou Pioniē?: Kapau ʼi te temi muʼa neʼe kotou pioniē, ʼe mahino ia ʼe kotou manatuʼi ia te ʼu lakaga fakafiafia ʼo te temi ʼaia. Neʼe kua kotou fakakaukauʼi koa ʼi te faikole ke kotou toe toʼo takotou selevisi? Ko te ʼu ʼaluʼaga ʼaē neʼe tupu ai takotou tuku takotou pioniē, kua lagi fetogi, ʼo mole kei tāʼofi ai koutou. Kua lagi hoko mai ia te temi ʼaē ke kotou toe toʼo ai ia takotou selevisi pioniē.—1 Soa. 5:14, 15.
4. Ko te faigamālie fea e tahi pē ʼaē ʼe foaki mai kiā tātou fuli?
4 ʼE kei hoholo nei te fai ʼo te gāue ʼo te taʼukai pea kua vave ʼosi. (Soa. 4:35, 36) ʼOfa pē ke tou vakavakaʼi e tātou fuli ia totatou ʼaluʼaga ʼi te temi nei, peʼe feala ke tou fetogi tatatou ʼu gāue ʼaē ʼe tou fai ʼi te ʼaho fuli, ke feala ai hatatou kau lahi age ki te minisitelio. Pea kapau ʼe mole feala ke lahi age tatatou gāue, ʼe feala koa ke tou kumi ke lelei age tatatou fai fakamafola? (Mko. 12:41-44) ʼE ko he toe pilivilēsio lahi ʼe foaki kiā nātou fuli ʼaē ʼe fakafealagia e tonatou ʼu ʼaluʼaga ʼi te temi nei, ke fakaʼaogaʼi nātou e Sehova ki te gāue ʼaenī e tahi!—Pes. 110:3.