Ko He ʼu Puleʼaki Moʼo Fakalahi Tokotou Minisitelio
1 Kua hili kiai taʼu e 40, neʼe tā ʼi Te Tule Leʼo Fakapilitānia ʼo te ʼaho 15 ʼo Sanualio 1955 te alatike ko tona kupu tāfito ʼaenī: “ ʼE Koutou Faiga Moʼoni Koa?” Ko te alatike ʼofa ʼaia neʼe ina fakahā ai peʼe lava feafeaʼi ki te hahaʼi ʼa Sehova ke nātou fakalahi tanatou ʼu faiga ʼi tanatou minisitelio, ke tuputupu tanatou gāue ki te Puleʼaga. ʼE toe ʼaoga te tokoni lelei ʼaia kia tatou ia ʼaho nei, ʼi tatatou faiga ʼaē ke tuputupu tuʼumaʼu tatatou gāue.
2 Ko te ʼu gāue fuli ʼaē ʼe tou fakahoko, ʼe tonu ke takitaki e te fakatotonu maʼuhiga ʼaenī: “E ke ofa anai ki te Aliki [Sehova, MN ] tou Atua mo tou loto katoa, mo tou laumalie katoa, mo tau fakakaukau katoa pea mo tou malohi katoa.” (Mko. 12:30) ʼE tou fakahā tatatou ʼofa katoa ʼaē kia Sehova ʼo tou fakaʼaogaʼi te ʼu faigamālie fuli ke tou fakahaʼele ki muʼa tana gāue ʼo ʼuhiga mo te Puleʼaga. Koutou vakaʼi te ʼu puleʼaki ʼaē ʼe hoa mai, ke feala hakotou fakalahi tokotou minisitelio.
3 Koutou Fakahoko Tokotou Maʼua: Ko te ʼu tēhina ʼaē kua papitema, ʼe feala ke nātou faiga ke nātou liliu ko he ʼu tagata faifekau faka minisitelio pea ki muli age, ko he ʼu tagata ʼāfea. Ko te ʼu alatike ʼaenī “ ʼE Koutou Holi Koa Ki He ʼu Pilivilesio?” pea “Kua Koutou Tokalelei Koa Ke Koutou Gāue ʼi Te Kokelekasio?” ʼaē neʼe tā ʼi Te Tule Leʼo Fakafalani ʼo te ʼaho 1 ʼo Sepetepeli 1990, neʼe ko he ʼu fakaloto mālohi ki te ʼu tēhina ke nātou fakahoko he ʼu maʼua ʼi te kokelekasio. Koutou fakalavelave ki te kau tagata ʼāfea ʼo tokotou kokelekasio ke nātou fakahā atu peʼe lava feafeaʼi hakotou tuputupu ke koutou maʼu te ʼu pilivilesio ʼaia.
4 Ko te ʼu tagata ʼāfea selipatea pea mo te kau faifekau faka minisitelio selipatea, ʼe fakaafe nātou ke nātou fakakaukauʼi lelei peʼe feala hanatou kau ʼi te Ako ʼaē ʼe ina Teuteuʼi ki te Minisitelio. ʼE feala hakotou maʼu he ʼu fakamatala ʼo ʼuhiga mo te ako ʼaia mo kapau ʼe koutou vakaʼi te ʼu alatike ʼaē ʼe fakahā ʼi te kupu “Ako ʼaē ʼe ina Teuteuʼi Ki te Minisitelio” ʼi te ʼu tohi Index des publications de la Société Watch Tower ʼo te taʼu 1986 ki te 1995, pea mo te taʼu 1996. ʼE koutou sio koa ki ‘te matapā lahi ki te gāue’ ʼaē ʼe avahi mai kia koutou? (1 Ko. 16:9a) ʼE tokolahi te ʼu tēhina neʼe nātou fakaʼaogaʼi te faigamālie ʼaia, neʼe mole nātou ʼiloʼi pe la te ʼu pilivilesio ʼaē ka nātou maʼu ai. ʼI te temi nei, kua nātou gāue ʼi te Petele peʼe nātou pionie makehe, peʼe nātou misionea, peʼe tagata taupau feʼoloʼaki.
5 Koutou Holi Ki Te Gāue Temi Katoa: Ko te kau tūpulaga ʼaē neʼe hoki maʼu pepa, pea mo te ʼu fafine ʼaē ʼe mole hanatou gāue fakamālama, pea mo nātou ʼaē kua letelete, ʼe tonu ke nātou fakakaukauʼi lelei peʼe feala ke nātou pionie. Koutou toe vakaʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūlio 1998, pea koutou fai palalau mo he ʼu pionie neʼe hage ko koutou ʼi muʼa atu. Lagi ʼe koutou fia fakalahi anai tokotou minisitelio ke koutou pionie ohage ko nātou. (1 Ko. 11:1) ʼE feala koa hakotou fakalahi takotou gāue kia hola e 70 ʼi te māhina, ʼo koutou kau ki te selevisi pionie temi katoa?
6 Ko te toko 17 000 tupu tēhina mo tuagaʼane ʼe nātou gāue ʼi te ʼu filiale ʼa te sosiete pea mo te ʼu Petele ʼi te malamanei katoa. ʼI te tohi Notre ministère ʼi te pasina 116 ʼe fakahā ai pe koteā te meʼa ʼaē ʼe tonu ke kita fai ke kita kau ki te gāue ʼaia. He koʼe koa ʼe mole koutou lau pea mo koutou vakaʼi peʼe feala hakotou tuputupu ke koutou maʼu te pilivilesio ʼaia?
7 Koutou ʼOlo ʼo Gāue ʼi Te ʼu Telituale ʼAē ʼe ʼAoga Ke ʼi Ai He Kau Fai Faka Mafola: ʼE koutou nonofo koa ʼi he koga meʼa ʼe lahi ai te fai ʼo te telituale pea ʼe tokolahi te ʼu tēhina mo tuagaʼane moʼo fakahoko te gāue? Kua koutou manatu koa, ʼe feala ke koutou fakalahi tokotou minisitelio ʼo koutou ʼolo ki he potu ʼe tokosiʼi ai te kau fai faka mafola? ʼE lagi feala hakotou ʼolo ʼo nofo ʼi he telituale ʼo te vao ʼaē ʼe ʼaoga ke ʼi ai he kau fai faka mafola. (Mat. 9:37, 38) Ko te faʼahi ʼaia ʼe mole tonu ke fai fakavilivili, kae tonu ke koutou fakakaukauʼi fakalelei ʼi te faikole. (Luka 14:28-30) Koutou fai palalau mo te ʼu tagata ʼāfea pea mo te tagata taupau faka silikosipisio ʼo ʼuhiga mo te faʼahi ʼaia. ʼE nātou vakaʼi anai mo koutou peʼe fakapotopoto takotou ʼolo nei peʼe lagi tonu muʼa ke koutou talitali. Kapau ʼe koutou fia faitohi ki te Sosiete ke fai atu he tokoni ʼo ʼuhiga mo te potu ʼaē ʼe feala ke koutou ʼolo kiai, ʼe tonu ke koutou momoli tahi mo he tohi neʼe sinie e te Komite Gāue ʼo takotou kokelekasio.
8 Koutou Hikihiki Te Lelei ʼo Takotou Gāue: ʼE hā mai, ʼe feala kia tatou fuli ke tou fakalahi totatou minisitelio mo kapau ʼe tou hikihiki te lelei ʼo tatatou gāue. ʼE koutou kau koa ki te ʼu agaaga kehekehe ʼo te gāue faka mafola, ohage ko te fai faka mafola ʼi te ʼu ʼapi, mo te fagonogono faigamālie, mo te fai ʼo te ʼu ʼaʼahi pea mo te ʼu ako Tohi-Tapu? Kapau ʼe ʼi ai hakotou ako Tohi-Tapu, ʼe koutou tuputupu koa ʼi te faiakonaki? ʼE lelei hakotou toe vakaʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūnio 1996, ke koutou maʼu ai he ʼu tokoni ʼe feala ke ina uga ia nātou ʼaē ʼe koutou ako, ke nātou foaki tonatou maʼuli kia Sehova pea mo nātou papitema.
9 Ko te tahi ʼu puleʼaki ke tou fakalahi pea mo hikihiki te lelei ʼo totatou minisitelio, ʼe fakahā ʼi te kapite 9 ʼo te tohi Organisés pour bien remplir notre ministère. ʼE mahino ia, ko tatou fuli ʼe tou fakaʼamu ke tou fai ia meʼa fuli maʼa te gāue ʼa te ʼAtua. Koia, ʼe mole lelei koa la ke tou vakaʼi fakalelei pe koteā tatatou ʼu fakatuʼutuʼu ʼi te faʼahi fakalaumālie? Tou mulimuli ki te tokoni ʼaē ʼe tuku mai ia 1 Timoteo 4:15: “Mauliʼi ia mea alâ, pea ke nofoaki te u mea aia, ke ha lelei ki te hahai fuape tau lakalaka ki mua.”