ʼE Koutou Loto Koa Ke Lahi Age Takotou ʼu Gāue?
1 Neʼe fakatatau e Sesu te Puleʼaga ki he ʼu koloā maʼuhiga. (Mat. 13:44-46) Ko te gāue ʼaē ko te faka mafola ʼo te logo ʼo te Puleʼaga ʼe ko he tahi koloā maʼuhiga ʼaia. ʼE tonu ke tou fakamuʼamuʼa te minisitelio ʼaia ʼi totatou maʼuli, tatau aipe peʼe tonu ke tou fai he ʼu sakilifisio ke tou kau lahi kiai. (Mat. 6:19-21) ʼE koutou loto koa ke lahi age takotou gāue ki te Puleʼaga?
2 Vakaʼi Te ʼu Meʼa Maʼuhiga ʼAenī: ʼE lahi te ʼu meʼa ʼe maʼuhiga ke tou fai ke tou kau lahi ai ki te minisitelio: (1) ke tou fakatotonu ke tou fakamuʼamuʼa te ʼu gāue ʼo te Puleʼaga ʼi totatou maʼuli (Mat. 6:33); (2) ke tou tui pea mo tou falala kia Sehova (2 Ko. 4:1, 7); (3) ke tou faikole fakamalotoloto pea mo faikole liuliuga ke tokoni mai te ʼAtua (Lu. 11:8-10); (4) ke tou maʼuliʼi pea mo gāue ʼo mulimuli ki tatatou ʼu faikole.—Skp 2:14, 17.
3 Te ʼu Faʼahiga Fai Ke Lahi Age Tatatou Minisitelio: Ko tatou fuli ʼe feala ke tou fakatuʼutuʼu hotatou temi ke tou kau tuʼumaʼu ki te minisitelio ʼi te māhina fuli. Kae neʼe koutou fakakaukauʼi koa ke koutou fakaʼaogaʼi te ʼu temi faigamālie fuli ke koutou fai fagonogono faigamālie, ke koutou faiga ke hikihiki age takotou ʼu palalau ʼi te fai faka mafola, ke hikihiki te lelei ʼo takotou fai te ʼu ʼaʼahi, pea mo koutou faiga ke koutou fai he ʼu ako Tohi-Tapu ʼe tuputupu? ʼE feala koa ke koutou pionie vaeluaʼi temi peʼe koutou pionie katoa, peʼe koutou gāue ʼi he koga meʼa ʼe ʼaoga lahi ai he ʼu fai faka mafola? Kapau ko koutou ko he tēhina kua papitema, pea ʼe feala koa ke koutou liliu ko he tagata faifekau faka minisitelio peʼe ko he tagata ʼāfea? (1 Tim. 3:1, 10) ʼE feala koa ke koutou fakalahi takotou minisitelio ʼo koutou kole ke koutou gāue ʼi te Petele, ke koutou kau ʼi te Ako ʼaē ʼe ina Teuteuʼi ki te Minisitelio, peʼe ki te ako faka misionea ʼi te Faleako ʼo Kalaate?—Lu. 10:2.
4 Ko te tēhina neʼe gāue temi katoa pea neʼe lahi tona temi ki te ʼu faigaoʼi, neʼe fakaloto mālohiʼi ke liliu ʼo pionie katoa. Neʼe kamata pionie vaeluaʼi temi pea neʼe ina fai te tahi ʼu fetogi ke liliu ʼo pionie katoa. Ki muli age, neʼe kau ki te Ako ʼe ina Teuteuʼi ki te Minisitelio, ʼaē neʼe ina teuteuʼi ai ia ia ki te gāue ʼaē ʼe ina fai ʼi te temi nei, ʼaē ko te taupau faka silikosikilipisio. ʼE fiafia lahi he neʼe ina tali te fakaloto mālohi ʼaē neʼe fai age kia ia, pea ʼe tui papau ʼe fiafia lahi age, heʼe ko te fua ʼaia ʼo tana fakatotonu ʼaē ke lahi age tana gāue ki te Puleʼaga.
5 ʼE tapuakina e Sehova te hahaʼi ʼaē ʼe fia gāue. (Isa. 6:8) Ke mole he meʼa ʼe ina tāʼofi koutou ke koutou fakalahi age takotou minisitelio pea ke koutou maʼu ai te toe fiafia lahi.