Tou Tokaga Fakamalotoloto Kia Nātou Fuli ʼAē ʼe Nātou Fia Logo
1 Ko te kalagaʼi ʼo te Puleʼaga ʼi te malamanei katoa kua ōvi mai anai tona fakagata, pea ko nātou fuli “ ʼaē ʼe mole nātou ʼiloʼi te ʼAtua” ʼe fakaʼauha anai ia nātou. (2 Tes. 1:7-9) Koia, ko te tokaga fakamalotoloto ki te maʼuli ʼo te hahaʼi ʼe ina uga ai te hahaʼi ʼa Sehova ke nātou fakaaʼu te logo ʼo te Puleʼaga ki he tokolahi.—Sof. 2:3.
2 ʼI te ʼu māhina fuli, ʼe fakaʼaogaʼi te ʼu hola ʼe lauʼi miliona moʼo kumi ʼo nātou ʼaē ʼe nātou fia logo ki te “logo lelei ʼo he meʼa ʼe lelei age.” (Is. 52:7) ʼI tanatou tali te ʼu tohi ʼaē ʼe tou tufa, tokolahi neʼe nātou toʼo te ʼu nusipepa ʼo Te Tule Leʼo pea mo te Réveillez-vous! peʼe ko te kaupepa Koteā ʼAē ʼe Fakamaʼua Mai e Te ʼAtua Kia Tatou? Ko te tokaga fakamalotoloto ki te hahaʼi ʼaia ʼe tonu ke ina uga tatou ke tou taupau te fia logo ʼa te hahaʼi ʼaē neʼe tou maʼu.—Taag. 3:27.
3 Tou Tohi He ʼu Nota ʼe Lelei: ʼE lahi te ʼu meʼa ʼaē ka koutou fakahoko anai mo kapau ʼe koutou tohi he ʼu nota ʼe katoa pea mo lelei, ʼo ʼuhiga mo te fia logo ʼaē neʼe fakahā pea mo te ʼu tohi ʼaē neʼe koutou tuku. Ohage la, ko te tohi ʼo te higoa pea mo te tuʼasila ʼo ia ʼaē neʼe fai palalau mo koutou, te ʼaho pea mo te hola ʼaē neʼe koutou fisi ai te matapā, te tohi ʼaē neʼe koutou tuku, pea mo te meʼa ʼaē neʼe koutou palalau kiai, ʼe tokoni atu anai kia koutou ke toe ʼāsili lelei age takotou teuteuʼi takotou ʼaʼahi. Pea tahi ʼaē, kapau ʼe koutou tohi te ʼu palalau ʼaē neʼe fai e ia ʼaē neʼe koutou palalau mo ia ʼi takotou ʼuluaki fai palalau, ʼe lagi feala anai ke koutou fakaʼaogaʼi fakalelei te ʼu manatu ʼaia moʼo fakamanatuʼi te ʼuluaki fai palalau ʼi takotou fai te ʼaʼahi.
4 Koutou Foimo Liliu ʼo Fai Te ʼAʼahi: Ko te toko fia ia nātou ʼaē neʼe nātou toʼo te ʼu tohi ʼi te māhina kua hili neʼe koutou faiga ke koutou toe ʼaʼahi? Kua ʼosi koa he ʼu vāhaʼa kae mole heʼeki koutou palalau mo ia? Ko he tokaga fakamalotoloto ki tanatou fīmālie heʼegata ʼe tonu ke ina uga tatou ke tou liliu fakavilivili, ʼe lelei ke hili pe kiai he ʼu kiʼi ʼaho, he kei tou manatuʼi lelei anai te fai palalau. ʼI tatatou liliu fakavilivili ʼaē moʼo taupau tanatou fia logo ki te moʼoni, ʼe feala ke koutou tāʼofi te ʼu faiga ʼa Satana, ʼi muʼa ʼo tana “haʼu . . . ʼo toʼo te folafola ʼaē neʼe tūtū ia nātou.”—Mko. 4:15.
5 ʼE Maʼuhiga Te Teuteu: Ko te fua lelei ʼo te fai ʼo takotou ʼu ʼaʼahi ʼe pipiki kiai takotou faʼahiga teuteu. Koutou teuteuʼi takotou ʼu ʼuluaki palalau ʼi muʼa ʼo takotou fai te ʼaʼahi. Ko te pasina fakamuli ʼo Te Minisitelio ʼo Te Puleʼaga ʼo ʼApelili 1997, ʼe ina foaki he ʼu faʼahiga faʼifaʼitaki ʼe feala ke fakaʼaogaʼi ke fua lelei mokā tou tufa te ʼu nusipepa pea mo te kaupepa lahi Fakamaʼua. Ko te tahi meʼa ʼe ko te maʼu ʼo he ʼu manatu ke koutou vaevae mokā koutou toe liliu ki ai. Koteā ʼaē ʼe feala ke koutou ʼui age moʼo taupau tana fia logo? ʼE lava feafeaʼi ke kamata he ako Tohi-Tapu?
6 Mokā hoko atu takotou fai palalau ki te meʼa ʼaē ʼe tonu ke fai moʼo fakamaʼa te kele, pea mo fakaliliu ko he nofoʼaga ʼe lelei ki te maʼuli, ʼe feala ke koutou ʼui fēnei:
◼ “ ʼI taku haʼu talu mai ai, neʼe ke manatu tahi mo ʼau ki te ʼaoga ʼaē ke fai he ʼu puleʼaki mālohi ʼi muʼa ʼo te feala ʼaē ke liliu te kele ko he palatiso tokalelei. ʼE ke manatu koa ʼe maʼu e te tagata te ʼu meʼa ʼaē ʼe ʼaoga moʼo fakahoko te faʼahi ʼaia? [Koutou tuku ke fai mai hana tali.] Kae ke ke fakatokagaʼi pe koʼe ʼe tonu anai ke kau te ʼAtua ki te ʼu meʼa ʼaē ʼe fai e te tagata.” Koutou lau ia Pesalemo 37:38. Koutou fakahā te ako 5 ʼo te kaupepa lahi Fakamaʼua, pea koutou fakaʼaogaʼi te palakalafe 4 mo te 5, moʼo fakahā peʼe fakahoko feafeaʼi anai e te ʼAtua te lea faka polofeta ʼaia. ʼO koutou hoko atu ʼaki te fakahā age ʼo he ako Tohi-Tapu ʼaki te kaupepa lahi.
7 Kapau neʼe koutou fai palalau ki te Puleʼaga ʼo te ʼAtua pea neʼe koutou tuku te kaupepa lahi “Fakamaʼua” ʼi te ʼuluaki fai palalau, ʼe feala ke koutou ʼui fēnei mokā koutou toe liliu:
◼ “ ʼI tatā palalau fakamuli, neʼe ʼau fakahā atu ko te Puleʼaga ʼo te ʼAtua ʼe ko he puleʼaga moʼoni, ka ina puleʼi anai te kele katoa. ʼE fakahā mai e te Tohi-Tapu ʼe pule ai anai ia Kilisito Sesu. ʼE feala koa ke ke fakakaukau ki te ʼu lelei ʼaē ka tou maʼu ʼaki te taʼi puleʼaga ʼaia pea mo te takitaki ʼaia?” Koutou tuku ke ina fai mai he tali. Koutou avahi te kaupepa lahi Fakamaʼua ʼi te ako 6. Koutou fakaʼaogaʼi te ʼu puani ʼo te ʼu palakalafe 6 mo te 7, pea mo te paki ʼo te pasina 13, ʼo koutou fakahā te meʼa ʼaē ka fai anai e te Puleʼaga ʼo te ʼAtua maʼa te malamanei ʼi te temi ka haʼu. Koutou lau ia Taniela 2:44 pea mo koutou fakahā te ako Tohi-Tapu.
8 Kapau neʼe koutou maʼu he tahi neʼe ina ʼui atu ʼe ko te ʼu lotu ʼo te malamanei ʼaē neʼe nātou fakatupu te ʼu fihifihia ki te hahaʼi, ʼe feala ke koutou fai age te fehuʼi ʼaenī ʼi takotou toe liliu:
◼ “Neʼe mole heʼeki ke fai koa la te fehuʼi ʼaē peʼe lava feafeaʼi hatatou ʼiloʼi te lotu ʼaē ʼe leleiʼia e te ʼAtua? [Koutou tuku ke ina fai mai hana tali.] Ko te kaupepa ʼaenī Koteā ʼAē ʼe Fakamaʼua Mai e te ʼAtua Kia Tatou? ʼe ina foaki mai te ʼu fakaʼiloga ke ʼiloʼi ai te lotu moʼoni.” Koutou fuli ki te ako 13, pea mo faka maʼuhigaʼi te ʼu puani ʼaē e nima ʼe fakaʼiloga kehe ʼi te ʼu palakalafe 3 ki te 7. ʼE feala ke hoko atu takotou palalau ʼo fēnei: “Pea tahi ʼaē meʼa, ʼi tau maʼu te lotu moʼoni, ʼe tonu ke ke ʼiloʼi te meʼa ʼaē ʼe fakamaʼua mai e te ʼAtua kia tatou takitokotahi.” Koutou lau ia Soane 4:23, 24. Koutou fakahā age ʼe koutou fiafia ʼi te hoko atu ʼo takotou fai palalau. Koutou fuli ki te kapite 1 ʼo te kaupepa lahi, pea koutou fakahā peʼe feafeaʼi te fai ʼo tatatou ako.
9 Mokā koutou toe liliu ʼo hoko atu he fai palalau ʼo ʼuhiga mo te fiafia faka famili, ʼe feala ke koutou ʼui te meʼa ʼaē ʼe hoa mai:
◼ “ ʼI tatā ʼuluaki felāveʼi, neʼe ʼau fakahā atu te kalavi ʼo te fiafia faka famili, ʼaē ko te maʼuliʼi ʼo te tokoni ʼaē ʼe tou maʼu ʼi te Folafola ʼa te ʼAtua, te Tohi-Tapu. Mokā ʼe tou tokaga ki te ʼu meʼa ʼaē ʼe ʼaoga ki he famili ʼi totatou temi, ʼe ke manatu koa ʼe mole kei he ʼaoga ʼo te Tohi-Tapu, peʼe ʼalutahi ia mo totatou temi? Koutou tuku ke ina fai mai he tali. Koutou fakahā te tohi Te ʼAtamai Mālama. Koutou fuli ki te kapite 2, pea koutou lau te talanoa ʼaē ʼe tuʼu ʼi te palakalafe 13. Koutou fakaʼaogaʼi te ʼu manatu ʼo te palakalafe 3, pea mo koutou fakaafe ke fai he ako faka famili ʼo te Tohi-Tapu.
10 ʼI tatatou tohi lelei te ʼu nota, ʼo tou faka maʼuhigaʼi te teuteu, pea mo tou foimo liliu ʼo hoko atu te taupau ʼo te fia logo ʼa te hahaʼi ki te moʼoni, ʼe tou fakahā ai te faʼahiga ʼofa ki totatou ʼu kāiga, ʼaē ʼe ina taki anai nātou ki te ala ʼo te maʼuli.—Mat. 22:39; Kal. 6:10.