Ke Tou Maʼu He Aga Fakapotopoto
1 ʼI meʼa fakafiafia leva hatatou lau te tuputupu taulekaleka ʼo te gāue ʼi te ʼu koga meʼa kehekehe ʼo te ʼu ʼatu fenua! Koia ʼe tou fakatokagaʼi ʼi ʼihi ʼu kolo ʼe tautau felāveʼi te kau fai faka mafola ʼo te Puleʼaga mo te hahaʼi ʼe mole fia logo, peʼe ko te fakafeagai tāfito ki tatatou gāue fai faka mafola. E feafeaʼi hatatou maʼu he aga fakapotopoto mo kapau ʼe aga feiā te hahaʼi ʼi totatou telituale? E feafeaʼi hatatou tekeʼi te ʼu manatu ʼaia ʼe mole lelei ʼaē ʼe feala ke ina toʼo ai totatou fiafia peʼe ina fakavaivai tatatou faiva ki te gāue ʼaē ko te fai ʼo te ʼu tisipulo?
2 Ko he aga fakapotopoto ʼe tokoni anai kia tatou ke tou maʼu he manatu ʼe mata feʼauga. ʼO feiā mo te ʼu temi faigataʼa, ʼe mole tonu ke tou faka fealagia ki he ʼu manatu ʼe mole lelei ke nātou taki ia tatou. Neʼe tuku mai e Sesu te faʼifaʼitaki lelei kia tatou. Neʼe tokosiʼi ia nātou ʼaē neʼe nātou tali tana akonaki. Tokolahi neʼe nātou higa ʼi tana fai akonaki. Neʼe felāveʼi ia mo he ʼu faʼahiga meʼa neʼe ko he ʼahiʼahi ʼo tana faʼa kātaki. Ko te kau takitaki lotu neʼe nātou fatufatuʼi tana ʼu gāue pea neʼe nātou fakatuʼutuʼu ke nātou matehi ia ia. Neʼe ʼanuhi ia ia, mo vāʼi, mo haha, pea ki muli leva neʼe matehi ia ia. Kae, neʼe ina maʼu aipe te fiafia ʼi te fakahoko ʼo te gāue ʼaē neʼe ina fai. Koteā tona tupuʼaga? Neʼe mahino kia ia te maʼuhiga ʼo te fai ʼo te finegalo ʼo te ʼAtua, pea neʼe mole fakafisi ia ʼi he temi ki ai.—Soane 4:34; 13:17; Hep. 12:2.
3 Ke Ia Tatou He Manatu Lelei ʼo ʼUhiga Mo Totatou Minisitelio: Moʼo fai ʼo te faʼahi ʼaia, ʼe ʼaoga ke tou taupau he ʼu faʼahiga manatu. Tou manatuʼi ko te logo ʼaē ʼe tou faka mafola ʼe lahi te hahaʼi ʼe mole nātou ʼiloʼi peʼe nātou fakafeagai kiai. (Mat. 13:14, 15) Logope la te fakatotonuʼi age ʼaē ki te kau ʼapositolo ke fakagata tanatou fai faka mafola ʼaki te huafa ʼo Sesu, neʼe nātou nonofo agatonu aipe ki tanatou gāue fai faka mafola, pea ko te taʼukai neʼe hoholo atu tona tānaki. (Gāue 5:28, 29; 6:7) ʼI ʼihi telituale ʼe tou ʼiloʼi fakatomuʼa, ko he tokosiʼi pe ʼe fia logo anai. (Mat. 7:14) Kae, ʼe feala ke tou fiafia mokā ʼe fia logo he tokotahi ʼi totatou telituale ki te logo. Tahi ʼaē meʼa, ke tou manatuʼi, tatau aipe mo nātou ʼaē ʼe fakafeagai ʼe tonu ke fakahā kia nātou te logo. (Esk. 33:8) Ko ʼihi neʼe fakafeagai ʼi te temi muʼa pea kua fetogi tanatou aga ʼo nātou liliu ko te hahaʼi atolasio kia Sehova. Mokā ʼe tou maʼu he manatu fakapotopoto, ko totatou minisitelio ʼe ina foaki mai he fiafia tatau aipe peʼe tokosiʼi ia nātou ʼaē ʼe fakalogo. Ko tatatou fisifisi ʼi te ʼu matapā ʼo fakahā te logo ʼo te Puleʼaga ʼo te ʼAtua ʼe ko he fakamoʼoni ia.—Esk. 2:4, 5.
4 ʼE ʼi ai te tupuʼaga ʼo tatatou aga fakapotopoto. Ko te tuputupu ʼo te gāue faka malamanei pea mo te ʼiloga lelei ʼaē ʼo te kua ōvi mai ʼo te toe mamahi lahi ʼe tonu ke nā uga ia tatou fuli ke tou fai ia meʼa fuli ke tou maʼuliʼi te aga faka lotu ʼi tatatou gāue. (2 Pe. 3:11, 14) Ko tatatou gāue faiva ʼi ʼAukusito ʼe ko he faʼahi lelei ʼaia moʼo fakahā ʼaki ai tatatou fakafetaʼi ki te ʼu meʼa ʼaē neʼe tou ako. ʼE tou loto foki anai ke fakaʼaogaʼi fakapotopoto e ʼotatou ʼu kaugā fagona foʼou te meʼa ʼaē neʼe nātou akoʼi. Kapau ʼe ʼi ai niʼihi ʼi ʼatatou ʼu ako Tohi-Tapu kua nātou tuputupu pea kua feala hanatou liliu ko ni ʼu kaugā faka mafola mole heʼeki papitema, ko te māhina ko ʼAukusito e lagi ko he temi lelei ke nātou kamata ai te faʼahi ʼaia.
5 Peʼe ko tatou ko he kaugā faka mafola peʼe ko he ʼu pionie, ʼe tokoniʼi fuli tatou mokā ʼe tou manatuʼi ʼe mole kole mai e Sehova kia tatou he meʼa ʼe mamafa tona fai. (1 Soane 5:3) Neʼe ina fakapapau mai ʼe ina tokoniʼi anai tatou. (Hep. 13:5b, 6) Logope la te mole tokaga ʼa te hahaʼi, peʼe ko tanatou fakafeagai, ʼe tonu aipe ke tou maʼu he manatu fakapotopoto pea ke tou fai faka mafola koteʼuhi ko te finegalo ʼo te ʼAtua ke tou fai feiā.—1 Tim. 2:3, 4.