Tou Fakaōvi Ki Te Hahaʼi ʼAki He Manatu ʼe Lelei
1 Ko he faʼahiga manatu ʼe lelei ʼe tokoni lahi mai ke fakafiafia totatou minisitelio pea mo fua lelei. Ka tou faka mafola te logo lelei, ʼi te ʼu ʼapi, ʼi te ala peʼe ʼi he tahi age faʼahi, ʼe tonu ke tou fai ʼaki te ʼamanaki ʼaē ʼe fua lelei anai. ʼE tonu ke tou ʼolo ki te hahaʼi fuli, ke tou manatu ʼe ko he ʼu ōvi ʼi tonatou loto peʼe nātou fakalogo anai ki te logo ʼo te Puleʼaga. ʼI te temi ʼaē neʼe fekauʼi ai e Sesu tana ʼu tisipulo, neʼe ina fai age te tokoni ʼaenī: “ ʼI he loto fale pe ʼe koutou hū kiai, koutou ʼui age: ‘Ke haʼu te tokalelei ki te ʼapi ʼaenī.’ ” (Luka 10:5, 6, MN ) Neʼe mole tonu ke nātou manatu fakatomuʼa peʼe nātou maʼu anai ʼi te ʼapi “he kaumeʼa ʼo te tokalelei” peʼe kailoa. Neʼe tonu ke nātou maʼu he manatu ʼe lelei! ʼE tou lava maʼu feafeaʼi te faʼahiga manatu lelei ʼaia ʼi totatou minisitelio?
2 Tou Tui Papau Ki Te ʼu Meʼa ʼAē ʼe Tou Palalau Kiai: ʼE mole tou faka mafola pe he lotu, kae ko te moʼoni ʼaē ʼe ina taki ki te maʼuli! ʼE tou ʼiloʼi peʼe koteā ʼaē ka hoko anai ʼi te ka haʼu. ʼE tou ʼiloʼi te ʼu tupuʼaga ʼo te ʼu fihifihia ʼa te tagata pea mo te meʼa ʼaē ʼe tonu ke fai e te hahaʼi loto fakamalotoloto ke nātou ʼiloʼi ai te puleʼaki. Ko tatatou tui ʼaia ʼe tokoni mai anai ke tou palalau ohage ko te kau ʼapositolo, ʼaē māʼiape la mo tanatou ʼu fili neʼe nātou fakamoʼoni ki tanatou lototoʼa. Koutou tokagaʼi te ʼui fēnei ia Gaue 4:13 (MN ): “ ʼI tanatou tokagaʼi te palalau fakahagatonu ʼa Petelo mo Soane . . . neʼe nātou kamata ʼiloʼi ai ia nāua ʼaē neʼe fakatahi mo Sesu.”
3 Ko tatatou faʼahiga palalau ʼe maʼuhiga ke malave ki te loto ʼo te hahaʼi. Kapau ʼe mole lelei tatatou faʼahiga palalau, pea ʼe mole nātou tali lelei anai tatou, pea ʼe mole malave anai ki tonatou loto peʼe ina uga nātou ke nātou fakalogo. ʼE lahi age anai te ʼu fua lelei ʼe tou maʼu mo kapau ʼe tou fai he ʼu palalau ʼe lelei, ohage la mokā tou ʼui fēnei: “ ʼE ʼau ʼiloʼi papau ʼe koutou mahino ki te maʼuhiga ʼo te ako ʼo ʼuhiga mo te Tohi-Tapu.” Peʼe koutou ʼui fēnei: “ ʼE ʼau fia tuku atu te tohi ʼaenī. ʼE ko he tohi lelei ʼaia moʼo ako te Tohi-Tapu pea ʼe maʼuhiga anai kia koe pea mo tou kiʼi famili.”
4 Tou Palalau Tāfito Ki He ʼu Manatu ʼe Lelei: ʼI te agamāhani, ʼi te fai faka mafola, ʼe tou talanoa ʼo ʼuhiga mo te ʼu fihifihia ʼo te malamanei. Kae ʼe lelei age ke tou foimo fakahā age te puleʼaki ʼa te ʼAtua ki te ʼu fihifihia pea mo te ʼu tapuakina ʼaē ka nātou fetogi anai te ʼu faigataʼaʼia ʼaē ʼe tou sio kiai ia ʼaho nei. ʼE tonu ke tou fai he ʼu palalau ʼe lelei moʼo tokoni kia ia ʼo te ʼapi ke mahino ko te logo ʼaē ʼe tou tala, ʼe ko he logo lelei moʼoni.
5 Kapau ʼe tou tala te logo lelei ki te hahaʼi ʼaki he manatu ʼe lelei, pea ʼe lahi anai tatatou fiafia ʼi te minisitelio. ʼE tou mahino anai ʼe feala ki te hahaʼi fuli ke nātou liliu ko he kau ako ʼo te Tohi-Tapu, pea ʼe ʼaoga kia nātou te moʼoni. ʼE mole tou lotovaivai anai mo kapau ʼe mole fia logo te hahaʼi peʼe nātou palalau kovi mai. ʼE ko he tapuakina te maʼu ʼo te ʼatamai mālama totonu ʼo te moʼoni ʼaē ʼe feala ke ina faka ʼāteaina te hahaʼi. ʼE mahino ia ʼe tou fia palalau ki te faʼahi ʼaia ʼaki he manatu ʼe lelei.