ʼE Tou Faka Mafola Te Logo Lelei
1 Ko te ʼave ʼo “he ʼu logo lelei ʼo he ʼu meʼa lelei,” ʼe ko he pilivilesio taulekaleka kia tatou! (Loma 10:15, MN) ʼE tou ʼave he logo faka mokomoko ki te hahaʼi ʼaē ʼe tau mo he ʼu fihifihia pea mo lotomamahi. Kae ʼe feafeaʼi anai hatatou tokoni kia nātou ke nātou mahino ko te meʼa ʼaē ʼe tou foaki age, ʼe ko “te ʼu logo lelei ʼo he meʼa ʼe lelei age”? (Isa. 52:7)
2 Tou Teuteuʼi He Logo Fakaloto Mālohi: ʼE lelei anai tatatou ʼu fai palalau ʼi te minisitelio mo kapau ʼe tou talanoa tāfito ki he ʼu meʼa lelei pea mo ʼaoga ki te maʼuli. Koia, ka tou teuteuʼi tatatou ʼu ʼuluaki palalau peʼe ko te ʼu tufa ʼaē ka tou fai, ʼe ʼaoga ke tou faka maʼuhigaʼi te ʼu faʼahi ʼaē ʼe lelei ʼi te logo ʼaia. ʼE tou maʼu anai he ʼu fua fakaloto mālohi mo kapau ʼe tou palalau ki tatatou ʼamanaki ʼaē ʼe fakatafito ki te Tohi-Tapu ʼaki he loto fiafia mo he loto māfana.—Taag. 25:11.
3 Logope la ʼe malave kia tatou mokā fakahā mai e te hahaʼi tonatou ʼu fihifihia ʼi te kua ʼāsili kovi ʼo te malamanei, kae ʼe tonu ke tou fakamahino age kia nātou ko te puleʼaki pe e tahi ki te ʼu fihifihia ʼa te tagata, ʼe ko te Puleʼaga ʼo te ʼAtua. Māʼia mokā tou palalau ki te kua ōvi mai ʼo te “ ʼaho lagavaka” ʼa Sehova, ʼe tou fia fakahā age ʼi tona ʼuhiga moʼoni ʼe ko “he logo lelei ki te kau agavaivai.” (Isa. 61:1, 2) E tou lava tokoni kia nātou ke nātou mahino, ko te ʼu meʼa fuli ʼaē ka fai e Sehova ʼe iku anai ki te fiafia lahi pea mo he ka haʼu ʼe lelei age.
4 Tou Fakahā Te Moʼoni ʼAki He Fiafia Moʼoni: ʼE fia logo tāfito te hahaʼi mokā nātou fakatokagaʼi ʼe tou mata fiafia peʼe tou palalau fakafiafia age. Pea ʼe nātou tokagaʼi anai “te fiafia ʼaē ʼe tou maʼu ʼi te ʼamanaki ʼaia,” mo kapau ʼe ʼiloga ia tatou te falala moʼoni ki te ka haʼu. (Loma 12:12, MN) ʼE tali gafua anai e te hahaʼi ia te logo lelei. Ei, ʼe ko he tupuʼaga lelei ʼaia ke tou mata fiafia ai, pea mo loto fiafia ʼi te ʼu agaaga fuli ʼo totatou minisitelio.
5 ʼI totatou ʼuhiga minisi ʼo te logo lelei, ʼe mole gata ʼaki pe tatatou tala te logo lelei ʼaia. Ko tatatou fai faka mafola ʼe ina foaki ki te hahaʼi te ʼamanaki ʼaē ki he maʼuli ʼe lelei age ʼi te temi nei pea mo te ka haʼu. (1 Tim. 4:8) Ka tou fakaōvi ki he tahi, pea ʼe tonu ke ʼiloga tatatou ʼamanaki fakaloto fiafia ʼi tatatou ʼu palalau, pea ʼe tokoni anai te faʼahi ʼaia ki te hahaʼi ke nātou tali te logo lelei. Kapau ʼe tou tokaga lelei ki te ʼu meʼa ʼaē ʼe tou tala pea mo tona faʼahiga tala, pea ʼe tou uga anai te hahaʼi fakamalotoloto ke nātou tali te logo lelei ʼaē ʼe tou tala!