Tou Muliʼi Ia Te Faʼifaʼitaki ʼo Totatou “ ʼAtua Fiafia” Ko Sehova
1 ʼE loto ia Sehova ke maʼuli fiafia te hahaʼi. ʼI tana Folafola, ʼe lahi te ʼu fakapapau ʼe talanoa ai ʼo ʼuhiga mo te ʼu tapuakina taulekaleka ʼe ina teuteuʼi maʼa te malamanei. (Isa. 65:21-25) ʼE tonu ke sio te hahaʼi ʼe tou fiafia ʼi te vaevae mo nātou “te logo lelei faka kolōlia ʼo te ʼAtua fiafia.” (1 Tim. 1:11, MN ) ʼE tonu ke hā mokā tou faka mafola ia te logo lelei ʼo te Puleʼaga, ia tatatou manako ʼaē ki te moʼoni pea mo totatou ʼofa fakamalotoloto ki te hahaʼi ʼaē ʼe tou palalau kiai.—Loma 1:14-16.
2 ʼE moʼoni, ʼi ʼihi temi ʼe lagi faigataʼa anai hatatou mata fiafia. Koteʼuhi ʼi ʼihi telituale, ʼe tokosiʼi te hahaʼi ʼaē ʼe nātou tali lelei ia te logo lelei ʼo te Puleʼaga. Peʼe lagi ʼi ʼihi ʼaho, ʼe tou tau mo ni ʼu fihifihia ʼo te maʼuli. Kae ke tou taupau maʼu ia totatou fiafia, tou manatuʼi ia te maʼuhiga ʼaē ki te hahaʼi ke nātou logo pea mo mahino ki te logo lelei ʼo te Puleʼaga ʼaē ʼe tou faka mafola. (Loma 10:13, 14, 17) Ka tou maʼu ia te taʼi manatu ʼaia, pea ʼe tou fiafia anai ʼo fakahā ki te hahaʼi ia te ʼu fakatuʼutuʼu manavaʼofa ʼa Sehova ʼo ʼuhiga mo te hāofaki.
3 Tou Talanoa Ki Te ʼu Fakapapau Taulekaleka ʼo ʼUhiga Mo Te Ka Haʼu: Tou toe tōkakaga foki ki te ʼu meʼa ʼaē ʼe tou talanoa kiai. Logola, ʼe tou kamata anai ia te fai palalau ʼo talanoa ki he fihifihia peʼe ko he meʼa ʼe tuʼania kiai ia te hahaʼi, kae ʼe mole tou fakatafito anai tata fai palalau ki he ʼu meʼa ʼe fakatupu lotomamahi. Ko totatou maʼua ke tou tala ia “te ʼu logo lelei ʼo ʼuhiga mo he meʼa ʼe lelei age.” (Isa. 52:7; Loma 10:15) Ko te logo lelei ʼe ko he logo ʼe fakatafito ki te ʼu fakapapau ʼa te ʼAtua ʼo ʼuhiga mo he ka haʼu ʼe lelei age. (2 Pet. 3:13) Kapau ʼe tou taupau maʼu ia te manatu ʼaia, pea ʼe tou fakaʼaogaʼi anai ia te ʼu fakapapau ʼaē ʼi te Tohi-Tapu moʼo “faitoʼo ia nātou ʼe lāvevea ʼonatou loto.” (Isa. 61:1, 2) ʼE tokoni anai ia te faʼahi ʼaia kiā tatou fuli, ke tou fiafia tuʼumaʼu pea mo loto falala ʼo ʼuhiga mo te ka haʼu.
4 Ko te hahaʼi ʼe nātou fakatokagaʼi anai totatou fiafia ʼi tatatou fai faka mafola. Koia, ʼofa pe mokā tou faka mafola ia te logo lelei ʼo te Puleʼaga ki te hahaʼi ʼo totatou telituale, ke tou fakahā tuʼumaʼu ia te kalitātē ʼo totatou “ ʼAtua fiafia,” ia Sehova.