‘Koteā ʼAē ʼe Feala Ke ʼAu Fai?’
1 ‘Koteā ʼaē ʼe feala ke ʼau fai?’ ʼE mahino ia, ko te fehuʼi ʼaia neʼe fakakaukauʼi e te kiʼi kūtuga ako Tohi-Tapu ʼaē neʼe fakatuʼutuʼu e Charles Taze Russell ʼi te ʼu taʼu 1870. ʼAki tanatou tuputupu ʼi te ʼatamai mālama ʼo ʼuhiga mo te finegalo ʼo te ʼAtua, ko te kau ʼuluaki ako ʼo te Tohi-Tapu ʼaia neʼe lagi nātou fia ʼiloʼi pe koteā ʼaē neʼe tonu ke nātou fai moʼo tokoni ki te hahaʼi ke nātou ʼiloʼi te ʼu fakatuʼutuʼu ʼa te ʼAtua. ʼE mahino ia neʼe ko he toe gāue lahi te faka mafola ʼo te ʼatamai mālama ʼo ʼuhiga mo te Tohi-Tapu ki te malamanei katoa.
2 Meʼa fakafiafia foki kia tatou, he neʼe nātou lavaʼi te toe gāue faigataʼa ʼaia. ʼO feafeaʼi? Ko nātou takitokotahi neʼe nātou fakahoko te gāue ʼaē neʼe lagi hage ʼe mole faʼa maʼuhiga, pea ʼi te temi nei kua ʼiloa te kau Fakamoʼoni ʼa Sehova ʼi te malamanei katoa—ko te kautahi moʼona toko ono miliona kau faka mafola ʼo te Puleʼaga, pea mo kokelekasio e toko 90 000 ʼi te ʼu fenua pea mo te ʼu motu e 234!—Isa. 60:22.
3 Koutou Lagolago Katoa Kiai: ʼE ko he meʼa maʼuhiga ʼaupito kia tatou, ke tou kau ki te gāue lahi ʼaē neʼe fakakikite e Sesu ʼe fakahoko anai ʼi te ʼu ʼaho fakamuli. (Mko. 13:10) ʼE mahino ia ko te fakahoko ʼo te gāue ʼaia ʼe mole gata pe ki te kau tagata ʼāfea, peʼe tuku te fai faka mafola ke fai pe e te kau pionie. ʼI tona fakahagatonu, ʼe ko he gāue maʼuhiga ʼaupito ʼe tonu ke fai e te kau Kilisitiano fuli ʼaē kua nātou foaki tonatou maʼuli kia Sehova. ʼE feala kia tatou fuli ke tou lagolago ki te ʼu gāue kehekehe ʼo te fai faka mafola. (1 Tim. 1:12) ʼO mulimuli pe ki te fealagia ʼaē ʼe tou fakaʼaogaʼi moʼo fai te gāue ʼaia, kae ʼe tou ʼiloʼi papau ʼe fua lelei anai kia tatou pea mo te hahaʼi.—1 Tim. 4:16.
4 Tahi ʼaē meʼa, ʼe feala kia tatou takitokotahi ke tou lagolago katoa ki totatou ʼu tēhina ʼi he ʼu ʼaluʼaga kehekehe. ʼE feala ke tou lagolago ki te ʼu fono ʼo te kokelekasio, ʼaki tatatou kau tuʼumaʼu kiai pea mo tou fai ai hatatou ʼu tali fakafiafia. (Pes. 122:1, 8, 9) ʼE toe feala foki ke tou lagolago ki te taupau ʼo te kokelekasio ke maʼa ʼi te faʼahi fakalaumālie. ʼE feala ke tou lagolago ki te gāue faka malamanei ʼaki totatou ʼu koloā, ʼo mulimuli pe ki te meʼa ʼaē ʼe tou maʼu. ʼE feala ke tou fakamaʼa te Fale ʼo te Puleʼaga. ʼE feala kia tatou fuli ke tou fakatuputupu te ʼofa pea mo te logo tahi ʼi te kokelekasio, kapau ʼe tou tokoni kia nātou ʼaē ʼe foʼofoʼou mai, mo te ʼu tūpulaga, pea mo nātou ʼaē kua matutuʼa.—Kol. 3:12, 14.
5 Koia ʼe feala hakotou fai te fehuʼi ʼaenī, ‘Koteā ʼaē ʼe feala ke ʼau fai?’ Logope la ʼe mole lagi lahi te ʼu gāue ʼaē ʼe koutou fai, kae ʼe koutou tokoni ki te mālohi, te fakaloto mālohi pea mo te haʼele lelei ʼo te kokelekasio. Koia, tou kau fuli ki te fakavikiviki ʼo te huafa ʼo Sehova!