Te Tali Ki ʼAkotou ʼu Fehuʼi

◼ Koteā te ʼu meʼa ʼaē ʼe tonu ke tokaga kiai mokā gāue fakatahi he tēhina mo he tuagaʼane ʼi te fai faka mafola?

ʼE feala ke tou ʼamanaki ʼe mulimuli totatou ʼu tēhina mo tuagaʼane ki te ʼu lekula māʼoluga ʼo te aga ʼaē ʼe tonu ke fai. Kae ʼe tou maʼuʼuli ʼi he mālama heʼemaʼa pea mo fakalialia, ʼe mole lahi tana fakaʼapaʼapa ki te ʼu aga ʼaē ʼe tonu ke fai. Tatau aipe peʼe lelei tatatou ʼu manatu, kae ʼe tonu ke tou tokakaga tuʼumaʼu ke ʼaua naʼa valokiʼi tatou, peʼe tou kau ki he meʼa ʼe heʼemaʼa. ʼE kau ki te faʼahi ʼaia tatatou tokaga ʼi tatatou gāue fai faka mafola.

ʼI te gāue fai faka mafola ʼe tou fetaulaki mo he ʼu tagata peʼe ko he ʼu fafine, ʼe hage ʼe nātou fia ʼiloʼi te moʼoni. Kapau ʼe tou fai tokotahi te ʼapi pea kapau ʼe mole he tahi age ʼi te ʼapi, ʼi te agamāhani ʼe lelei age te fakahā kia ia te logo lelei ʼi te muʼa matapā kae mole tou hū ki tona ʼapi. Kapau ʼe ina fia ʼiloʼi te moʼoni, ʼe feala ke fai he ʼu fakatuʼutuʼu ke koutou toe liliu ki ai mokā koutou fakatahi anai mo he kaugā fai faka mafola, peʼe mokā ʼe ʼi ai anai he tahi kehe ʼi te ʼapi. Kapau ʼe mole feala te faʼahi ʼaia, pea ʼe ko he aga fakapotopoto anai te foaki te ʼaʼahi ki he tēhina mo kapau ko he tagata, peʼe ki he tuagaʼane mo kapau ko he fafine. ʼE tou toe fai anai te faʼahi ʼaia mo kapau ʼe ko he ako Tohi-Tapu.​—Mat. 10:16.

ʼE tonu ke tou tokakaga mokā tou filifili he tahi ke tou kaugā gāue mo ia ʼi te fai faka mafola. Logope la ʼe feala ʼi ʼihi temi ke gāue fakatahi he tēhina mo he tuagaʼane, ʼe lelei te fai ʼo te faʼahi ʼaia ʼo fakatahi mo he kūtuga. ʼI te agamāhani, māʼiape la ʼi te fai faka mafola, ʼe mole ko he aga fakapotopoto te nofo tokotahi ʼa he tēhina mo he tuagaʼane mo kapau ʼe mole ko tona ʼohoana. Koia ko te tēhina ʼaē ʼe tokaga ki te kūtuga gāue, ʼe tonu ke ina vakaʼi fakalelei pe ko ai te ʼu kaugā fai faka mafola ʼaē ka ina hinoʼi ke gāue fakatahi, ʼo toe feiā pe mo te kau tūpulaga.

Kapau ʼe tou tokakaga lelei ki te ʼu meʼa ʼaē ʼe tou fai, pea ʼe mole tou “liliu [anai] ko he maka fakatupu tūkia” kia tatou totonu pea mo ʼihi age.​—2 Ko. 6:⁠3.