Ko Te Laumālie ʼo Sehova ʼe Lagolago Kia Tatou
1 ʼI totatou ʼuhiga kau Fakamoʼoni ʼa Sehova, ʼe ʼi ai te gāue lahi ʼe tonu ke tou fai. Neʼe ʼui fēnei e Sesu: “ ʼE tonu muʼa ke ʼuluaki faka mafola te logo lelei ʼi te ʼu puleʼaga fuli.” (Maleko 13:10) ʼI te manatu fakatagata, e lagi mata faigataʼa te fai ʼo te faʼahi ʼaia, kae ʼe tou lava fakahoko te meʼa ʼaia. ʼE lagolago kia tatou te mālohi ʼaē ʼe lahi tokotahi ʼi te ʼatulaulau—te laumālie ʼo te ʼAtua.—Mateo 19:26.
2 Ko Tona Fakamoʼoni ʼi Te ʼUluaki Sēkulō: Ko Sesu neʼe ina faka ʼuhiga kia ia totonu te lea faka polofeta ʼo Isaia, ʼi tana ʼui fēnei: “Ko te laumālie ʼo Sehova ʼe ia te ʼau, . . . ke ʼau fakahā te logo lelei.” (Luka 4:17, 18) ʼI muʼa ʼo tana hake ki selo, neʼe ina fakahā ki tana kau ʼapositolo ko te laumālie maʼoniʼoni ʼe toe lagolago anai kia nātou ke nātou faka mafola “ ʼo aʼu ki te potu taupotu ʼo te kele.” Ki muli age, ko te laumālie maʼoniʼoni neʼe ina takitaki ia Filipo ke fai faka mafola ki te tagata Etiopea neʼe maʼu tuʼulaga, pea ko te laumālie neʼe ina fekauʼi ia Petelo ke ʼalu ki te tagata solia Loma, pea neʼe ina takitaki ia Paulo mo Palenapasi ke nā ʼolo ʼo faka mafola ki te ʼu puleʼaga Senitile. Neʼe mole he tahi neʼe manatu, ʼe tali anai te moʼoni e te ʼu hahaʼi ʼaia ʼaē neʼe kehekehe tonatou ʼu ʼaluʼaga. Kae neʼe nātou fai te faʼahi ʼaia.—Gāue 1:8; 8:29-38; 10:19, 20, 44-48; 13:2-4, 46-48.
3 Ko Tona Fakamoʼoni Ia ʼAho Nei: ʼI te tohi ʼo te Fakahā, ʼe fakahā lelei ai ko te laumālie maʼoniʼoni ʼe lagolago ki te gāue fai faka mafola ʼaē ʼe fakahoko ia ʼaho nei. ʼE tou lau fēnei: “Ko te laumālie pea mo te fafine ʼohoana ʼe nā haga ʼui: ‘Haʼu!’ . . . Ko ʼaē ʼe loto kiai, ke ina toʼo noa te vai ʼo te maʼuli.” (Fkhā. 22:17) Ko te laumālie maʼoniʼoni neʼe ina uga te kalasi ʼo te ʼohoana ʼo Kilisito pea mo tona ʼu kaugā gāue ʼaē ko te “tahi ʼu ōvi,” ke nātou faka mafola te logo lelei ki te ʼu hahaʼi fuli pe. (Soane 10:16) ʼE tonu ke tou lotomālohi ʼi tatatou fai faka mafola, pea ke ʼaua naʼa tou fakameʼameʼa ʼi te palalau ki te ʼu faʼahiga hahaʼi fuli pe, pea mo tou falala tuʼumaʼu ʼe tokoni mai anai kia tatou te laumālie ʼo te ʼAtua. ʼI te Annuaire 1998, ʼe maʼu ai te ʼu fakamoʼoni, ko te laumālie ʼo te ʼAtua ʼe kei hoko atu tana lagolago ki tana hahaʼi kaugana. Koutou vakaʼi muʼa tona ʼu fua! ʼI te ʼu taʼu ʼaenī e lua kua hili, neʼe fakafuafua ko hahaʼi e toko 1 000 tupu neʼe papitema ʼi te ʼaho fuli.
4 Koutou falala ʼe hoko atu anai te lagolago ʼa te laumālie ʼo te ʼAtua kia tatou ʼi tatatou faka mafola te logo ʼo te Puleʼaga, ʼo mulimuli pe ki te meʼa ʼaē ʼe finegalo kiai ia Sehova. ʼI tatatou ʼiloʼi ia te faʼahi ʼaia, ʼe tonu ke tou haga faiga mālohi ki te gāue maʼuhiga ʼo te Puleʼaga.—1 Tim. 4:10.