ʼE Ko He Meʼa Lelei Hatatou Kau Tuʼumaʼu Kiai!
1 Lolotoga taʼu e hogofulu ʼi te Potu Hahake ʼo te Eulopa, neʼe tapuʼi ki te tokolahi ʼo totatou ʼu tēhina tanatou fakatahi. Koutou fakakaukauʼi age muʼa tanatou fiafia ʼi te temi ʼaē neʼe toʼo ai te tapu ʼaia pea neʼe feala ke nātou fakatahitahi faʼifaʼitaliha.
2 ʼI tana ʼaʼahi te kokelekasio e tahi ʼi te ʼu kokelekasio ʼaia, neʼe tohi fēnei e te tagata taupau feʼaluʼaki: “ ʼI te Feliatolu afiafi, ʼi te kamata pe ʼo taku ʼaʼahi, neʼe mole kei haʼele te masini fakamāfana. ʼI tuʼa, neʼe momoko ʼaupito pea ʼi loto, neʼe aʼu te momoko ki te 5. Ko te ʼu tēhina neʼe nātou kofuʼi tanatou ʼu māfana, mo ʼai tonatou ʼu pulupulu, mo tanatou ʼu taga nima, mo tanatou ʼu puloga, pea mo tanatou ʼu sūlie ki te momoko. Neʼe mole he tahi neʼe feala ke ina sivi te lau ʼo te Tohi-Tapu, he neʼe mole feala ke nātou fuli te ʼu pasina. ʼI taku faiakonaki mo toku foʼi kote, neʼe ʼau mokosia ʼaupito, pea ʼi te ʼu temi fuli ʼaē neʼe ʼau palalau ai, neʼe haʼu mai toku gutu te kohu ʼuhi ko te momoko. Kae neʼe ko he meʼa fakaofoofo kia ʼau ʼi taku mole logo ki he tahi ʼe meo. Neʼe ʼui e te ʼu tēhina fuli neʼe nātou fiafia pea neʼe nātou leleiʼia tanatou kau ki te ʼu fono!” Neʼe mole manatu tuʼa tahi e te ʼu tēhina ʼaia ke mole nātou ʼōmai ki te fono ʼaia!
3 ʼE Tou Manatu Feiā Koa? ʼE maʼuhiga koa kia tatou te fealagia ʼaē ke tou kau faʼifaʼitaliha ki tatatou ʼu fono ʼi te vāhaʼa fuli? Peʼe mole tou leleiʼia koa tatou te ʼu fono ʼi te kei faigamālie ʼo te temi? Ko te kau tuʼumaʼu ki te ʼu fono ʼe lagi ko he meʼa faigataʼa, pea ʼe lagi ʼi ai he ʼu temi ʼe mole feala moʼoni ke tou kau kiai. Kae ʼaua naʼa galo kia tatou, ʼe kau mo tatou te ʼu tēhina mo tuagaʼane, logope la tanatou kua matutuʼa, mo mahamahaki, peʼe māʼimoa, peʼe nātou maʼumaʼua ʼaupito ʼi tanatou gāue, pea mo te tahi ʼu maʼua mamafa, kae ʼe nātou mahino ki te maʼuhiga ʼo te ʼu fono pea ʼe nātou kau tuʼumaʼu kiai. ʼE ko he ʼu faʼifaʼitaki lelei ke tou mulimuli ki ai!—Vakaʼi ia Luka 2:37.
4 Tou faiga ke liliu ko hatatou agamāhani te lagolago ki te tauhi moʼoni ʼo tou kau ki te ʼu fono faka Kilisitiano fuli, mai te fono ʼo te ako tohi ʼaē ʼe mole faʼa hahaʼi, ʼo aʼu ki te fakatahi lahi. He koʼe ʼe tonu ke maʼuhiga kia tatou tatatou kau ki te ʼu fono ʼaia? Koteʼuhi ʼe ko te fakatotonu ʼa te ʼAtua ke tou fakatahitahi. Kae ʼe ʼi ai te tahi ʼu tupuʼaga maʼuhiga. ʼE ʼaoga kia tatou fuli ke tou maʼu te ʼu fua lelei ʼo te ako fakaʼatua pea mo te tokoni ʼo te laumālie maʼoniʼoni, pea ʼe tou maʼu te ʼu meʼa ʼaia ʼi te ʼu fono. (Mateo 18:20) ʼE tou tuputupu ki muʼa ʼi tatatou fefakaloto mālohiʼaki, ʼi tatatou tauhi fakatahi mo totatou ʼu tēhina.—Hep. 10:24, 25.
5 ʼI te temi ʼaē neʼe fetogi ai ia Sesu, neʼe ʼui fēnei e Petelo, “Faiako, ʼe matalelei ke tou ʼi henī.” (Luka 9:33) ʼE tonu ke feiā tatatou manatu ʼo ʼuhiga mo tatatou ʼu fono faka Kilisitiano fuli. Koia, ʼe ko he meʼa lelei ke tou kau tuʼumaʼu kiai!