Ko Te Kau Ki Te ʼu Fono—Ko He Maʼua Maʼuhiga
1 E feafeaʼi koa takotou faiga fakamalotoloto ke koutou kau ki te ʼu fono? Ko te faʼahi ʼaia ʼe ko he fehuʼi maʼuhiga, kaeā koa la? ʼE mole fai he mahalohalo ia e tokolahi ia tatou ʼe tou leleiʼia te ʼu fono. Kae, ʼe hā mai ʼi te ʼu tānaki, ʼe lahi te ʼu kokelekasio kua siʼisiʼi tanatou kau ki te ʼu fono. Koteā ʼapē tona tupuʼaga? Ko ʼihi ia tatou ʼe nātou faka fealagia koa ki he gāue fakamālama ʼe mole ʼaoga, te gaʼegaʼe, te gāue ʼi te loto fale, te mahaki fakasino, peʼe ko te tuʼu kovi ʼo te lagi ke mole nātou fai tonatou maʼua ʼaē ko te kau tuʼumaʼu ki te ʼu fono? (Teu. 31:12) ʼUhi ko te faʼahi ʼaia ko te maʼua mai te Tohi-Tapu, ʼe tonu ke tou vakavakaʼi takitokotahi te fehuʼi ʼaenī ʼi te faikole, ʼE feafeaʼi koa haku kau fakamalotoloto ki te ʼu fono?
2 Ko ʼihi ʼi ʼotatou ʼu tēhina ʼe haʼele ʼi te ʼu hola ʼi te ʼu ala ʼe efu pea mo fakalaka ʼi te ʼu liuʼa ʼe fonu ai te kolokotile ke feala ai hanatou kau ki te ʼu fono. ʼI takotou kokelekasio, ʼe feala ke ʼi ai ni hahaʼi agatonu ʼe “mole toe hala” māʼiape la te ʼu mahaki faigataʼa, te vaivai fakasino, te gāue kinakina ʼi te faʼahi ʼaē ʼe nātou gāue ai, peʼe ko te ʼu faigataʼaʼia ʼi te faleako. (Luka 2:37) He koʼe koa ʼe nātou faiga ke nātou kau ki te fono? Koteʼuhi ʼe nātou ʼiloʼi ʼe mole feala hanatou tauʼi te ʼu faigataʼaʼia ʼo te mālama ʼaenī ʼaki tonatou mālohi. ʼE tonu ke nātou falala ki te mālohi ʼaē ʼe tuku mai e te ʼAtua.—2 Ko. 12:9, 10.
3 Ia ʼaho nei ʼe tou muliʼi te faʼifaʼitaki neʼe tuku mai e te ʼu ʼuluaki Kilisitiano, ʼaē neʼe nātou faikole tuʼumaʼu, mo vaevae ʼanatou ʼu faʼifaʼitaki, pea mo nātou ako te Folafola ʼa te ʼAtua. (Gāue 4:23-30; 11:4-18; Kol. 4:16) ʼE tou maʼu te akonaki ʼo te ʼu lea faka polofeta pea mo te ʼu akonaki tāfito ʼo te Tohi-Tapu, ʼo te aga faka lotu pea mo te ʼu aga faka Kilisitiano, ʼo feiā aipe mo te fakatokaga ʼi te temi totonu ke tou fakatuputupu totatou maʼuli ʼi te temi nei ʼo tou maʼuliʼi fakalelei te ʼu fakatuʼutuʼu ʼa te Tohi-Tapu. (1 Tim. 4:8) Tahi ʼaē meʼa, ʼe fakamanatuʼi mai tatatou ʼamanaki ʼaē ʼe ʼi ai anai he gataʼaga ʼo te ʼu faigataʼaʼia pea mo te ʼu mamahi. ʼE maʼuhiga tatatou taupau maʼu te ʼamanaki ʼaia.—Hep. 6:19.
4 E feafeaʼi koa te faiga fakamalotoloto ʼo tokotou famili ke nātou kau ki te ʼu fono? ʼE ko he koga tāfito koa ʼaia ʼo takotou polokalama ohage ko te meʼa kai peʼe ko te gāue fakamālama? ʼI te ʼu afiafi ʼaē ʼe fai ai te ʼu fono, ʼe koutou fai palalau koa ʼo koutou fai he tonu peʼe koutou kau ki te fono peʼe kailoa, peʼe tonu ke koutou nonofo mo ʼokotou ʼu tēhina ʼi tokotou ʼapi? Tokolahi te kau fai faka mafola ʼe nātou manatuʼi lelei te faʼifaʼitaki ʼo tonatou ʼu mātuʼa ʼi te temi ʼaē neʼe nātou matuʼa ai. Neʼe manatuʼi lelei e te tagata ʼāfea, “te meʼa ʼo ʼuhiga mo Papa, neʼe tokaga tuʼumaʼu ia ki tona famili ke nātou ʼolo ki te ʼu fono. Kapau ʼe mahaki he tahi, pea ʼe nofo he tahi ia mātou ʼi fale mo ia, kae ko nātou ʼaē ʼe nātou ʼolo ki te fono!”
5 ʼI te ʼu Minisitelio ʼo te Puleʼaga ʼaē ka hoa mai, ʼe tou palalau anai ki te maʼuhiga ʼo te ʼu fono takitahi ʼo te kokelekasio ke feala ai hatatou leleiʼia ʼaupito te ʼu meʼa kai fakalaumālie ʼaia. Kapau ko takotou kau ki te ʼu fono ʼe feala ke lahi tona fai, ʼe mātou ʼiloʼi papau ʼe tokoni anai kia koutou te ʼu alatike ke koutou mahino ki te meʼa ʼaē ʼe ʼaoga kia koutou. ʼE kau anai kiai mo te ʼu fakamanatu ʼe ʼaoga kia nātou ʼaē ʼe nātou takitaki te ʼu fono, ʼo feiā mo te ʼu tokoni ʼe feala ke tou maʼuliʼi fuli mokā ʼe tou teuteu pea mo tali ʼi te ʼu fono. He koʼe koa ʼe mole tou heheka faka famili pea ke tou vakaʼi ʼi te faikole tatatou kau ʼaē ki te ʼu fono? ʼOsi ʼaia pea tou fai te ʼu fetogi ʼaoga ʼi tatatou polokalama. Ko te kau tuʼumaʼu ki te ʼu fono ʼe ko he faʼahi maʼuhiga ʼaia ʼo tatatou ako faka teokalatike pea ʼe tonu ke fai fakamalotoloto.