Koutou Fakamuʼamuʼa Te ʼu Meʼa ʼAē ʼe Maʼuhiga Tāfito!

ʼE ʼi ai te fono ʼi te afiafi ʼaenī, kae ʼe ʼi ai takotou gāue. Koteā te meʼa ʼaē ka koutou fakamuʼamuʼa?

KO KOE ko he tagata ʼohoana pea mo tāmai. ʼI te ʼosi ʼo tou ʼaho gāue loaloaga pea mo fakagaʼegaʼe, ʼe ke manatu ki te fono ʼo te kokelekasio ʼaē ka fai anai ʼi te afiafi. Kapau ʼe ke mavae atu aipe ʼi tau gāue, pea ʼe feala pe anai hau maʼanu, mo fetogi tou ʼu mutuʼi meʼa, pea mo kai ʼi muʼa ʼo tau ʼalu ki te fono. Fokifā pe ʼe haʼu tou patolo ʼo kole atu ke ke nofo ʼo gāue. ʼE ina fakapapauʼi atu ʼe ina totogi lelei anai tau gāue ʼaia, pea ʼe ʼaoga kia koe te falā ʼaia.

Peʼe ko koe ko he fafine ʼohoana pea mo faʼe. ʼI tau teuteuʼi te meʼa kai ʼo te afiafi, ʼe ke sio ki te ʼatu mutuʼi meʼa ʼaē ʼe mole heʼeki fakamolemole, pea ʼe ʼi ai ʼihi mutuʼi meʼa ʼe ʼaoga anai ki ʼapogipogi. ʼE ke feʼekeʼaki fēnei: ‘Kapau ʼe ʼau ʼalu ʼo fono afiafi, pea ko ʼafea ʼaē ka feala anai ke ʼau fai ai taku fakamolemole?’ Neʼe mole heʼeki fualoa tau kamata gāue temi katoa, pea ʼe mahino ai kia koe ʼe faigataʼa te fai fakatahi ʼo te gāue ʼaia pea mo te ʼu gāue ʼo te loto fale.

Peʼe ko koe ko he tūpulaga ʼe kei ke ako. ʼI tou pilō, ʼe lahi te ʼu meʼa ako ʼaē ʼe tonu ke ke fai. ʼE lahi tau ʼu gāue neʼe kua fualoa tona tuku atu, kae neʼe ke haga tuku aipe, pea ʼi te temi nei kua lahi te ʼu meʼa ako ʼaē ʼe tonu ke ke fai. ʼE ke fia kole ki tau ʼu mātuʼa peʼe feala hau nofo moʼo fai tau ʼu meʼa ako.

Koteā te meʼa ʼaē ka koutou fakamuʼamuʼa: te gāue ki takotou patolo, te fakamolemole, takotou ʼu meʼa ako peʼe ko te fono ʼo te kokelekasio? Koteā tona faka ʼuhiga ʼi te faʼahi fakalaumālie, ke kita fakamuʼamuʼa te ʼu meʼa ʼaē ʼe maʼuhiga tāfito? Koteā te manatu ʼa Sehova ʼo ʼuhiga mo te faʼahi ʼaia?

Koteā Te ʼu Meʼa ʼAē ʼe Tonu Ke Tou Fakamuʼamuʼa?

Mole faʼa fualoa ʼi te ʼosi foaki ʼo te ʼu Folafola e Hogofulu ki te kau Iselaelite, neʼe maʼu te tagata neʼe tae fafie ʼi te ʼaho ʼo te Sapato. Kae neʼe tapuʼi te faʼahi ʼaia ʼi te Lao. (Faka au 15:32-​34; Teutalonome 5:​12-​15) Neʼe feafeaʼi anai hakotou fakamāuʼi ia te faʼahi ʼaia? ʼI takotou manatu, ko te tagata ʼaia neʼe feala koa hana takuʼaki, neʼe ina fai te faʼahi ʼaia he neʼe ʼaoga ki tona famili, kae neʼe mole ina fai he gāue ke maʼu koloā ai? ʼE koutou manatu anai ʼe lahi te tahi ʼu Sapato ʼaē ʼe feala anai ke ina fai lolotoga te taʼu katoa, pea ʼe feala ke fakamolemole gafua te hala ʼa te tagata ʼaia ʼi te Sapato pe e tahi, tatau aipe pe neʼe ina fai te hala ʼaia he neʼe mole ina tae fakatomuʼa tana ʼu fafie?

Kae neʼe maʼuhiga te faʼahi ʼaia kia mata ʼo Sehova. ʼE ʼui fēnei e te Tohi-Tapu: “ ʼAki te temi, neʼe ʼui fēnei e Sehova kia Moisese: ‘ ʼE tonu anai ke matehi te tagata ʼaia.’ ” (Faka au 15:35) He koʼe koa neʼe mamafa ʼaupito kia Sehova te hala ʼaia?

Lolotoga ʼaho e ono, neʼe feala ki te kau Iselaelite ke nātou tae fafie, pea mo gaohi te ʼu meʼa ʼaē neʼe ʼaoga ki tanatou meʼa kai, mo tonatou ʼu mutuʼi meʼa, pea mo tonatou ʼapi. Kae ko te fitu ʼaho neʼe tonu ai ke nātou tokagaʼi te ʼu meʼa fakalaumālie. Neʼe mole kovi te tae fafie, kae ko te meʼa ʼaē neʼe kovi neʼe ko te fai ʼo te gāue ʼaia ʼi te temi ʼaē neʼe tonu ai ke tauhi kia Sehova. Logope la ko te kau Kilisitiano ʼe mole kei nātou mulimuli ki te Lao Faka Moisese, kae ko te hisitolia ʼaia ʼe mole ina akoʼi mai koa la kia tatou ʼe tonu ke tou fakatuʼutuʼu lelei te ʼu meʼa ʼaē ʼe tonu ke tou fakamuʼamuʼa?​—Filipe 1:​10.

ʼI tanatou nonofo ʼi te toafa ia taʼu e 40, neʼe teuteu ai te kau Iselaelite ke nātou hū ki te Kele ʼo te Fakapapau. Ko ʼihi neʼe kua nātou fiu ʼi te kai ʼo te mane ʼaē neʼe foaki tuʼumaʼu age e te ʼAtua ʼi te toafa, pea neʼe nātou holi ki he tahi meʼa kai. Moʼo tokoni kia nātou ke nātou taupau he manatu lelei ʼo ʼuhiga mo te faʼahi ʼaia, neʼe fakamanatuʼi age fēnei e Sehova kia nātou, ʼi tanatou hū ki te fenua ʼaē “ ʼe tafe ai te huʼa pipi pea mo te meli,” “ko te tagata ʼe mole maʼuli ʼaki pe te pane, kae ʼe maʼuli te tagata ʼaki te folafola fuli pe ʼaē ʼe haʼu mai te gutu ʼo Sehova.”​—Ekesote 3:8; Teutalonome 8:3.

Neʼe tonu ki te kau Iselaelite ke nātou gāue kinakina moʼo maʼu “te huʼa pipi pea mo te meli.” Neʼe tonu ke nātou tauʼi he ʼu kautau pea mo nātou mālo ai, mo nātou laga fale, pea ke nātou gāueʼi tonatou ʼu kele. Logope la te ʼu meʼa fuli ʼaia, kae neʼe fakatotonu e Sehova ki te hahaʼi ke nātou tuku kehe he temi ʼi te ʼaho fuli ke nātou metitasio ai ki te ʼu meʼa fakalaumālie. Pea neʼe toe maʼua foki ke nātou fakaʼaogaʼi honatou temi moʼo akoʼi ki tanatou fānau te ʼu ala ʼo te ʼAtua. Neʼe ʼui fēnei e Sehova: “Tahi ʼaē meʼa, ʼe tonu anai ke koutou akoʼi [taku ʼu folafola] ki takotou ʼu foha, ke koutou palalau kiai mokā ke heka anai ʼi tou loto fale, mokā ke haʼele anai ʼi te ala, mokā ke takoto anai pea mokā ke tuʼu ake anai.”​—Teutalonome 11:19.

Tuʼa tolu ʼi te taʼu fuli neʼe fakatotonu ki te hahaʼi tagata Iselaelite pea mo poloselite, ke nātou tutuʼu fuli ia muʼa ʼo Sehova. ʼI tanatou mahino ʼaē ko te ʼu lakaga ʼaia ʼe fua lelei anai ki tonatou famili ʼi te faʼahi fakalaumālie, koia neʼe tokolahi te ʼu pule famili neʼe nātou fakatuʼutuʼu ke nātou kaugā ʼolo mo tonatou famili. Kae ko ai ʼaē ka ina leʼoleʼo tonatou ʼu ʼapi pea mo tonatou ʼu gāueʼaga naʼa kaihaʼa e tonatou ʼu fili, ʼi tanatou lolotoga pupuli? Neʼe fakapapauʼi fēnei e Sehova: “ ʼE mole he tahi ʼe holi anai ki tou fenua lolotoga tau hake ake ke ke sio ki te fofoga ʼo Sehova tou ʼAtua, tuʼa tolu ʼi te taʼu.” (Ekesote 34⁠:24) Neʼe tonu ke tui mālohi te kau Iselaelite, ʼe mole kaihaʼa anai tonatou ʼu koloā mo kapau ʼe nātou fakamuʼamuʼa te ʼu meʼa fakalaumālie. Neʼe fakahoko koa e Sehova tana fakapapau? Ei!

Koutou Haga Kumi Muʼa Te Puleʼaga

Neʼe akoʼi e Sesu ki tana kau tisipulo ke nātou fakamuʼamuʼa te ʼu meʼa fakalaumālie ia meʼa fuli. ʼI tana Akonaki ʼi te Moʼuga, neʼe ina tokoniʼi fēnei te hahaʼi ʼaē neʼe fakalogo kia te ia: “ ʼAua naʼa koutou hoha ʼo ʼui maʼa koutou: ‘Koteā he meʼa ka tou kai?’ peʼe: ‘Koteā he meʼa ka tou ʼinu?’ peʼe: ‘Koteā he meʼa ka tou kofu ʼaki?’ Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia [ʼaē ʼe ʼaoga] kia koutou.” (Mateo 6:​31, 33) Mole faʼa fualoa ʼi te ʼosi mate ʼa Sesu, ko te kau Kilisitiano ʼaē neʼe hoki papitema, neʼe nātou mulimuli ki te tokoni ʼaia. Ko te tokolahi ia nātou neʼe ko te kau Sutea peʼe ko he kau poloselite, neʼe nātou fagona ki Selusalemi ke nātou kau ki te lafeti ʼo te Penikosite ʼo te taʼu 33 ʼo totatou temi. ʼI tanatou nonofo ai, neʼe hoko te meʼa fakapunamaʼuli. Neʼe nātou fagono ki te logo lelei ʼo ʼuhiga mo Sesu Kilisito pea neʼe nātou tali te logo ʼaia. ʼI tanatou holi mālohi ʼaē ke lahi age tonatou ʼatamai mālama ʼo ʼuhiga mo tanatou tui foʼou, neʼe nātou nonofo ai ʼi Selusalemi. Neʼe mole kei lahi tanatou meʼa kai, kae neʼe mole faʼa maʼuhiga kia nātou te ʼu meʼa fakasino ʼaia. Kua nātou maʼu te Mesia! Ko tonatou ʼu tēhina Kilisitiano neʼe nātou vaevae mo nātou te ʼu meʼa ʼaē neʼe nātou maʼu, ke feala ai kia nātou fuli ke nātou “haga mulimuli aipe ki te ʼu akonaki ʼa te kau ʼapositolo pea mo . . . [haga] faikole.”​—Gāue 2:​42.

ʼAki te temi, neʼe meʼa noaʼi e ʼihi Kilisitiano tanatou fakatahi tuʼumaʼu mo te ʼu tēhina ʼi te ʼu fono. (Hepeleo 10:23-​25) Neʼe lagi tuputupu ia nātou te manako ki te ʼu meʼa fakasino, ʼo mole kei nātou tokagaʼi te ʼu meʼa fakalaumālie ʼi tanatou faiga ʼaē ke lelei te ʼaluʼaga ʼo tonatou famili ʼi te faʼahi ʼo te paʼaga. ʼI tana ʼosi uga te ʼu tēhina ke mole nātou līaki te ʼu fono, neʼe tohi fēnei e te ʼapositolo ko Paulo: “Ke ʼāteaina tokotou faʼahiga maʼuli ʼi te manako ʼaē ki te paʼaga, koutou fakafeauga pe ki te ʼu meʼa ʼaē ʼe koutou maʼu. He neʼe ina ʼui fēnei: ‘ ʼE mole ʼau tukunoaʼi anai koe pea ʼe mole ʼau līaki anai koe.’ ”​—Hepeleo 13:5.

Neʼe to tonu te tokoni ʼa Paulo. Hili kiai taʼu e nima ʼi te ʼosi faitohi ʼa Paulo ki te kau Hepeleo, ko te foʼi solia Loma ʼo Cestius Gallus neʼe ʼōmai ʼo ʼā takatakai ia Selusalemi. Ko te kau Kilisitiano agatonu neʼe nātou manatuʼi te fakatokaga ʼa Sesu: “Ka koutou sio anai ki te meʼa [ʼaia] . . . , ko te tagata ʼaē ka nofo anai ʼi te ʼato fakaheketālaʼa ke ʼaua naʼa hifo ifo mo ʼaua naʼa hū ki fale ʼo toʼo he meʼa ʼo tona ʼapi; pea ko te tagata ʼaē ka ʼi te ʼu gāueʼaga ke ʼaua naʼa toe liliu mai ki te ʼu meʼa ʼaē ʼi muli ke ina toʼo tona kofu tuʼa.” (Maleko 13:14-​16) Neʼe nātou ʼiloʼi neʼe mole lava hāofaki nātou e te gāue lelei ʼaē neʼe nātou maʼu peʼe ko tonatou ʼu koloā, kae ʼe hāofaki anai nātou mo kapau ʼe nātou fakalogo ki te ʼu fakatotonu ʼa Sesu. Ko nātou ʼaē neʼe nātou mulimuli ki te tokoni ʼa Paulo pea mo fakamuʼamuʼa te ʼu meʼa fakalaumālie, ʼe mahino ia, neʼe faigafua age kia nātou hanatou mavae ʼi tonatou ʼapi, mo tanatou gāue, mo līaki tonatou ʼu mutuʼi meʼa, pea mo te ʼu koloā ʼaē neʼe nātou manako kiai, ke feala hanatou feholaki ki te ʼu moʼuga, kae neʼe faigataʼa kia nātou ʼaē neʼe manako ki te paʼaga.

ʼE Nātou Fakamuʼamuʼa Te ʼu Meʼa Maʼuhiga Ia ʼAho Nei

Ia ʼaho nei, ko te kau Kilisitiano agatonu ʼe nātou leleiʼia tanatou fakatahi tuʼumaʼu mo tonatou ʼu tēhina, pea ko te tokolahi ʼe nātou fai he ʼu sakilifisio ke feala ai hanatou kau ki te ʼu fono. ʼI ʼihi kolo, ko te gāue pe e tahi ʼaē ʼe maʼu ai, pea ʼe tonu ke kita gāue kā. ʼI te tahi kolo ko te tokolahi ʼo te hahaʼi ʼe nātou fia fakafiafia ʼi te ʼu Moeaki afiafi, koia ko te tēhina ʼe ina fetogi tana ʼu kaugā gāue ʼi te ʼu afiafi ʼaia, pea ʼe nātou fetogi ia ia ʼi te ʼu afiafi ʼaē ʼe ina fai ai te ʼu fono. Ko te tahi ʼu tēhina ʼe nātou kā pōʼuli, ʼe nātou kau ki te ʼu fono ʼi te kokelekasio ʼaē ʼe ōvi ki tanatou gāue, mo kapau ʼe mole ʼi ai honatou temi ke nātou ʼolo ki tonatou kokelekasio. Koia ʼe mole nātou to ʼi he fono. Ko te fafine ako Tohi-Tapu foʼou ʼi Kanata, neʼe mahino vave kia ia ʼe maʼuhiga te Ako ʼo te Minisitelio Faka Teokalatike pea mo te Fono Gāue, kae neʼe mole feala ke kau tuʼumaʼu kiai ʼuhi ko tana polokalama gāue. Koia neʼe ina totogi ai he kaugā gāue ke ina fetogi ia ia ʼi te afiafi ʼaē neʼe fai ai te ʼu fono maʼuhiga ʼaia ke feala hana kau kiai.

Ko te tokolahi ʼe nātou mahahaki tuʼumaʼu, kae ʼe mole nātou to ʼi he fono. Kapau ʼe mole feala ke nātou ʼolo ki te Fale ʼo te Puleʼaga, pea ʼe nātou fakalogo ki te polokalama iō nātou ʼaki te telefoni, peʼe ʼaki he foʼi fime neʼe puke ai te polokalama. ʼE nātou fakahā he loto fakafetaʼi lelei ki te ʼu fakatuʼutuʼu fakalaumālie ʼa Sehova ʼaē ʼe fai ʼaki te “tagata kaugana agatonu mo poto”! (Mateo 24:45) Ko te kau Kilisitiano ʼaē ʼe nātou taupau tanatou ʼu mātuʼa, ʼe nātou loto fakafetaʼi ʼaupito mokā ʼui e he tēhina peʼe ko he tuagaʼane ʼe feala ke ina leʼoleʼo tanatou ʼu mātuʼa, ke feala hanatou kau ki te fono ʼo te kokelekasio.

Koutou Fakatuʼutuʼu Fakatomuʼa!

Ko te ʼu mātuʼa ʼaē ʼe nātou ʼiloʼi te ʼu meʼa ʼaē ʼe ʼaoga kia nātou ʼi te faʼahi fakalaumālie, ʼe nātou tokoni ki tanatou fānau ke nātou leleiʼia te ʼu fono. ʼI te agamāhani, ʼe nātou fakamaʼua ki tanatou fānau ke nātou fai tanatou ʼu meʼa ako ʼi te temi ʼaē kua hinoʼi ke nātou fai ai, kae ʼe mole tonu ke nātou tuku ki he tahi temi. ʼI te ʼu afiafi ʼaē ʼe fai ai te ʼu fono, ko te fānau ʼe nātou fai tanatou ʼu meʼa ako ʼi tanatou liliu kiō nātou ʼi te ʼosi fono. ʼE mole tonu ki te ʼu gaoʼi ʼaē ʼe nātou leleiʼia pea mo te tahi ʼu meʼa ke nātou tāʼofi tanatou kau ki te ʼu fono ʼo te kokelekasio.

ʼI tokotou ʼuhiga tagata ʼohoana pea mo tāmai, ʼe koutou fakamuʼamuʼa koa te ʼu fono? ʼI tokotou ʼuhiga fafine ʼohoana pea mo faʼe, ʼe koutou fakatuʼutuʼu koa takotou ʼu gāue ke feala ai hakotou kau ki te ʼu fono? Ko koutou tūpulaga, ʼe fakalogo koa takotou kau ki te ʼu fono ki takotou ʼu meʼa ako, peʼe maʼuhiga age te ʼu fono?

Ko te fono ʼo te kokelekasio, ʼe ko he fakatuʼutuʼu ʼofa ʼa Sehova. ʼE tonu ke tou faiga mālohi ke tou kau kiai. ʼE lahi anai te ʼu tapuakina ʼaē ka foaki atu e Sehova kia koutou, mo kapau ʼe koutou fakamuʼamuʼa te ʼu meʼa ʼaē ʼe maʼuhiga tāfito!