Tou Fakamuʼamuʼa Tatatou Kau Tuʼumaʼu Ki Te ʼu Fono
1 Ko te ʼu famili Kilisitiano ʼe nātou fakamuʼamuʼa tanatou kau tuʼumaʼu ki te ʼu fono. Kae ia ʼaho nei, ʼe lahi te ʼu maʼua kehekehe ʼe feala ke nātou faka faigataʼa ia te faʼahi ʼaia. Ko te ʼu gāue ʼo te loto fale, te gāue faka mālama, peʼe ko te ʼu gāue ʼo te faleako, ʼe nātou kamata kaihaʼa koa te temi ʼaē ʼe tuku keheʼi maʼa te tauhi ʼa Sehova? Kapau ʼe tou maʼu te faʼahiga sio ʼa Sehova ki te ʼu meʼa ʼo te maʼuli, pea ʼe tokoni mai anai ke tou haga fakamuʼamuʼa te ʼu meʼa ʼaē ʼe maʼuhiga tāfito.—1 Sam. 24:6; 26:11.
2 Neʼe ʼi ai te tagata Iselaele, ʼaki he loto faʼitaliha, neʼe mole fia mulimuli ki te manatu ʼa Sehova ʼo ʼuhiga mo te tae fafie ʼi te Sapato. Neʼe lagi manatu e te tagata ʼaia, neʼe ina fai te faʼahi ʼaia moʼo taupau te maʼuli ʼo tona famili, peʼe lagi neʼe manatu ko he kiʼi meʼa noa ia. Kae ko te fakamāu ʼaē neʼe fai e Sehova ki te tagata, neʼe hā ʼaki ai ʼe maʼuhiga ke mole tou fai te gāue faka mālama lolotoga te ʼu temi ʼaē neʼe fakatuʼutuʼu maʼa te tauhi.—Fkau 15:32-36.
3 Tou Fai He ʼu Puleʼaki Lelei: Maʼa te tokolahi, ʼe mole ko he meʼa faigafua ke mole kaihaʼa tonatou temi fono e tanatou ʼu gāue faka mālama. Ko ʼihi neʼe nātou fai puleʼaki, ʼo nātou palalau ki tonatou patolo, ʼo nātou fetogi tonatou ʼu hola gāue mo tonatou ʼu kaugā gāue, peʼe nātou kumi hanatou gāue ʼe lelei age, peʼe nātou faka faigafua tonatou maʼuli. ʼE mahino papau ia, ʼe leleiʼia e Sehova te ʼu sakilifisio ʼaia ʼe tou fai ʼo ʼuhiga mo te tauhi moʼoni.—Hep. 13:16.
4 Ko te tahi fihifihia ʼaē ʼe feala ke hoko, ko tatatou ʼu gāue mai te faleako. Neʼe ʼui fēnei e te finemui: “ ʼE ʼau fai taku tahi ʼu gāue ʼi muʼa ʼo te fono, pea ʼe hoki ʼau fakaʼosi ʼi taku toe liliu mai te ʼu fono.” Kapau ʼi he afiafi ʼe fai ai te ʼu fono, ʼe mole feala ke fakaʼosi e tanatou ʼu fānau tanatou ʼu meʼa ako, pea ʼe feala ki te ʼu mātuʼa ke nātou fakamahino ki tanatou ʼu hahaʼi faiako, ko te ʼu fono ʼe ko he ʼu meʼa maʼuhiga ki tonatou famili.
5 Ko he felagolagoʼaki ʼa te famili pea mo hanatou ʼu fakatuʼutuʼu lelei, ʼe ko he ʼu puleʼaki lelei ʼaia moʼo fakahoko te ʼu gāue ʼo te loto fale, ke feala hanatou ʼōmai tautonu ki te ʼu fono. (Taag. 20:18) ʼO feiā mo nātou ʼaē kei liliki, ʼe lava akoʼi nātou ke nātou teuteu pea mo tokalelei ki te temi fono. ʼAki tanatou faʼifaʼitaki, ʼe lava akoʼi e te ʼu mātuʼa ki tanatou ʼu fānau te maʼuhiga ʼo te ʼu fono.—Taag. 20:7.
6 ʼI te ʼāsili ʼo te ʼu fihifihia ʼo te mālama ʼaenī, ʼe maʼuhiga ke tou kau tuʼumaʼu ki te ʼu fono ʼo te kokelekasio. ʼOfa pe ke tou manatu tuʼumaʼu ohage ko Sehova, pea mo tou fakamuʼamuʼa tuʼumaʼu tatatou kau ki te ʼu fono.—Hep. 10:24, 25.